راجدپترءُ جناور۔ ڈاکٹر مبارک علی / لعل جان بلوچ
*********** راجدپترءُ جناور ***********
ڈاکٹر مبارک علی / لعل جان بلوچ
انسان ءُجناورانی نیامءَ راجدپترءِ کوھنیں ءُ نزیکی سیادی ہست انت ۔ شکاری زمانگ ءَاے جناوراں انسان ءِ وردن ءِ ضرورت پیلو کتگ ات ۔ وھدے کہ آئی ءَ کشاری زند اختیار کت گڑا شکارءِ ہمراہی ءَ انسان ءَ جناوراں رامگ کت ءُ دارگ ءِہم بندات کت ۔بلے ہمک جناور انسان ءِ واہش ءِ ردءَ نہ رامگ بوت انت ءُ نہ آئی ءَ گوں نزیک بوت انت ۔ انسانی فطرت ہم چونیں چیز انت کہ ہماجناور کہ رامگ کت انت ءُ آہاں گوں وتا داشت پدا ہمے جناور گوٖں کینگ ءِ نگاہ ءَ چارت ات انت ۔ پہ درور ۔ بینگ ،مادگ ، گامیش ءُ اُشتر، ہما جناور انت کہ آہاں زحمت کشی کاراں بگر داں پہ وردن ءَ بنی آدم ءِ کمک کت ۔بلے بینگ ءِ وفاداری ءِ اے مُز رست کہ آئی ءَ پہ دژمان کار مرز کنگ بیت انت ۔ مادگ دابا پہمگ بیت انت ءُ آئی ءَملنڈ مسکراہ کنگ بیت انت ۔ “بھینس کے آگے بین بجانا” بتل آئی ءِ احمقی ءَ کاررمرز کنگ بیت انت ءُ “اونٹ رے اونٹ تیری کون سی کل سیدھی ” آئی ءِ کور پیمی پہمگ بیت انت ۔ہما جناورا ں کہ انسان دیما گہگیری کت ءُ آئی ءِ پالتو جوڑ نہ بوت انت ، چوشیں جناورانی واستہ انسان ءِ دل ءَ شرپ ءُ عزت ہست انت ۔ پہ درور شیر ءِ تمردی ،پُلنگ ءِ چالاکی ءُ تولگ ءِ اژہاری ۔ ہنربازی ءُ ایدگہ ۔
ہما وھدءَکہ انسان ءَ وتا جناورانی پیما پہمتگ ات ، آ وھدءَ دوئیناں فطرت ءِ مادی آسراتی ہوار کارمرز کتگ ات انت،نپ ءُسیت ذرتگ ات ،بلے وھدےکہ انسان ءَماذوہی ردءَ دیمروی کت ءُ آئی ءَ سلاہ جوڑ کت گڑا آئی ءِ طاقت ءِ تہا گیشی اتک ءُ نوں آئی ءَ اے جھد کت کہ فطرت ءِ تہا ایوکا آئی ءِ کُل مستری بہ بیت انت ۔ اگاں جناور آئی ءِ بادشاہی ءِ تہا دزمانجی بکن انت ، گڑا جناوراں گوں مقابلہ بہ کنت ءُ آہاں تاوان بار بہ کنت ۔ انچوش وھدے کہ اے جناوراں فصل تاواان بار کت انت گڑا اے عملءَ انسان ءَ جنگ پہمتگ ات ءُ پدا آہاں جناورانی ھلاپءَ اُرش کنگ ءِ جار جت ۔اے پیمیں تب ءِ دارگ ءَ چہ جناوارانی سرءَ باٰز لٹ کٹ کنگ ءِ بندات بوت ۔ایشی ءَ ابید جناور کشاری اہدءَ ہم آئی ءِ وردن ءِ ضروریات پیلو کنگ ءَ اژدری ات ۔
ہندوستان ءَ ابید جناوراں گوں غمواریں تب دگہ ہچ دودمان تہا ءِ گندگ نئیت انت ۔ اھنسا فلسفہ ءِ ردءَ جناورانی جذبگانی ھیالداری کنگ بوتگ ات ۔ آئی ءَ گوشت پہ وردنءَ کارمرز کنگ پہریز کتگ ات ۔جناورءُ کڑوکانی حیال داری کنگ بوتگ ۔ انچوش کہ جین نیکراہ ءِ منوگر پادشپاد بیتگ انت ءُ پونز سرءَ گدءِ بستگ ات کہ کڑک ءُجراثیم مہ مرانت ، ہندوستانءَ اے ربیدگ بوتگ کہ جناورنی آپ ءُ تام ءِ انتظام کنگ بوتگ ۔ مورانی واستہ آرت زمین ءِ سرا ریچگ بوتگ ات ۔ جناورانی واستہ نادراجاہ پچ کنگ بوتگ انت کہ اُودءَ آہانی علاج کنگ بوتگ ات ۔لھتیں انگریز جہانگوالاں وتی دیدن ءِ تہا نبشتہ کتگ کہ وھدے کہ یورپی مردماں جناورانی شکار کنگ لوٹ ات گڑ ا ہندوہاں آہاں ذر کلدار دات ءُ اے کار ءِ کنگ ءَ مکن کت ۔
ہندوستانءَ جناوراں گوں غمواری ءِ تب ودی بوھگ ءِ سبب ایش بوت کنت کہ وھدے کہ اے راجمان ءِ کشاری ردءَ دیمروی کت ءُ غلہ ،شِیر ،دوگ مزنیں کساسے ءَ آہانی ضرورتاں پیلو کتگ ات ، گڑا اے صور ت ءَ آہاں جناورانی گوشت ءِ ذیادئیں ضرورت پش نہ کپت ءُ آہاں داشتگیں جناورانی فائدگ دیست ءُ آہاں زندگ داشت ۔مادگ ، گامیش ،بُز ءُ ایدگہ شیر ءِ واستہ ،اسپ ،اوشتر ،پیل ءُ لاگ ، ایدگہ لڈءُ بارءِ واستہ کارمرز کت انت بلے ہما راجمان کہ آہانی تہا کشت کشاری ءِ وردن ءِضرورت پیلو نہ کت انت گڑا اودءِ جناورانی گوشت کارمرز بوت ۔
بلے میزان میزان راجمان ءَ دیم روی کت ،آہانی ماذوی سماء گیش بوت ، آلات و ازباب ءِ سبب ءَ کشت کشاری پیداوار ءِ تہا گیشی اتک ،ایشی ءِ ہمراہی ءَ جناوراں گوں ہمدردی ودا ت ۔ یورپ ءِ تہا جناورانی بابتءَ تب ہما وھد ءَ بدل بوت وھدے کہ اودءَ سائینسی علم ءَ دیمروی کت ءُ جناورانی بابتءَ پٹ پول کنگ ءَ پد اے گپ دیما اتک کہ آہانی ہم مارشت بنت ءُ آ ہم ڈکھ ،درد ءُ وشی ءَ مارشت ایر کن انت ۔
اے تبءِ تہا ہما وھد ءَ گیشی اتک وھدےکہ یورپ ءَ انسانیت دوست جنز ءِ بندات بوت ءُ بنی آدم ءَ اے مارت کہ شُد انسان ءُ جناوراں یک پیما گر ات ۔ اے پگرءُ حیالانی سبب ءَ یورپ ءَجنزےءِ بندات بیت ، کہ جناورانی وت ماوتی جنگ دئیگ بند کنگ بہ بیت۔ چونائی ہمک دودمانانی تہا جناورانی حون ریچیں جنگاں انسان َوشی ءُ لذت بخشاتگ ات ۔ ایشانی تہا پیل ،اُشتر ،بینگ ککڑ ءُ ایدگہ جناورانی جنگ ءُ میڑھ نامدار انت ۔
جناوراں گیش جوا نیں درجہ ہما وھدءَ رست وھدے کہ یورپ ءِ راجمان کشت کشاری اہدءَ چہ صنعتی اہدءَ داخل بوت ۔مشین ءِساذین ءَچہ یک نیمگءَ انسان ءَ مشقت ءَ چہ آجو کت دومی نیمگ ءَ جناور ہم کہ دنیگتہ لڈ بار ءِ کاراں گوں بندوک ات انت ،ہم آذاد بوت انت ۔ صنعتی اہدءَ نیامی ٹک کہ اُمراہانی مراعاتانی ھلاپ ءَ زہرشانی کنگ ءَ ات انت،اودءَ آئی شکار ءِکھار سرءَ ہم ایراد گپت ءُ آئی ءَ یک جبلوتیں تبءِ لیکت۔
نوزدھمی کرنءَ یورپ ءِ تہا داشتگیں دلوتانی دارگ ءِ حب ودی بوت ءُ ایشی ءِ ہمراہیءَ جناورانی پہریزگ جُنز ہم بندات بوت گڑا اے گپ ءِ سرا زور دئیگ بوت کہ گوشتءِ کارمرز کنگ مہ بیت انت ایوکا سبزی پہ وردن کار مرز کنگ بہ بیت ۔
جناور انسان ءِایوکی ءِ ہمراہ ءُ غم وار بنت انسان ءَ جناورانی صحبت چہ وشی ءُ شادمانی حاصل کنت ۔پمیشکہ دلوت آئی ءَ کہول یک باسک ءِپہمگ بیت انت ۔جناورانی نزیکی انسان تہا مھہر و شاہستگی ودی کنت ءشدت ءُ تُرندیں تب ءِ ھلاس کنت ۔ اے انسان ءَ ابرم ءِ سیادی ءَمحکم کنت ۔
وھدے کہ انسان ءَ مزنیں شہر جوڑ کت ابرمءَ گوں آئی ءِ سیادی سست ءُ جناوراں گوں ہم ۔ نوں جناوراں گوں وتی کوھنیں سیادی ءَ برجاہ دارگ ءِ حاترہ آئی ءَ ہمک شہر ءَ بگیچہ جوڑ کت ۔دانکہ ایشانی سیادی مہ پروشیتءُ دوئیں یک دومی ءَ گوں ہمگرنچ بہ بنت ۔
۔۔۔۔۔۔۔۔۔۔۔۔۔۔ھلاس۔۔۔۔۔۔۔۔۔۔۔۔۔