دستونک ۔۔۔۔ ۔ مجید عاجز

زندگا زندہ گوٗر بوواناں
چمّے آں من کہ کوٗر بوواناں

اَز کناں روشنائی یے گِنداں
کُش چراگاں لگوٗر بوواناں

لاشیں اہدے گَہینگا اِنت منا
کِرم شاناناں ، موٗر بوواناں

کیکّتہ دْریکّگانی آبریشُم
پَچّ زرد ءِ نِزوٗر بوواناں

سِستگاں چہ وتا ہمودا ، کہ
گوں وتی جند ءَ ہوٗر بوواناں

شانک روزرد ءِ سرْمہ دان ءَ منا
دنزے آں ، آڈہوٗر بوواناں

بنگ چاڑیں چِہ موسُمے عاجز
ریزہ ریزہ بُلوٗر بوواناں

3/12/2019 سلالہ