زندگی یک باڑئی لوگے
۔۔ شریف مومؔن
زندگی یک باڑَئی لوگے
چہ کرناں ھُورک ءُ ھلیگ اِنت
ءُ من تھنا ھمے لوگ ءِ درا اُوشتاتگاں
بلکِن ءَ باندا آدم زادگے کیت ءُ ھمے لوگ ءَ کِرا زوریت
وتی وابانی مانا ءِ جلشکیں موسمانی شات ءِ پیوندیں گِر ءُ دار ءَ
گُلابیں لُنٹاں تلکاریں تلب بچکند ءِ وامداراں
من شر گاراں
اگاں اَستیں کسے کیت اِیں منی باڑائی لوگ ءِ چارگ ءَ بئیت اِیں
دو شرّیں ساپ ءُ سلّھیں چہ مہراں سر چکاریں شوکیں کوٹی اَنت
ءُ یک چُلّے جِتا بستگ
من زاناں زندگی ءِ اے تِلاہ رنگیں ماں کمپان ءِ تہ ءِ لوگ ءَ
اگاں ھر کس پہ ماہانہ کِرا زوریت گم ءُ درداں چہ آجو بیت
توامیں ھاجتاں چے در
ناں آپ ءُ لئین ءِ مُشکل اَست
ناں جاکویں دگے ھمساہگے کِرّ ءُ کش ءَ اَست اِنت
منی اے زندگی ءِ باڑئی لوگ ءَ ھمُک آسراتی ءِ وشبوہ چہ گْوات ءِ دستاں ھر سُھب ءَ بُجیت کیت اِنت
اے کمپان ءِ تہ ءَ دمّال کنت پہ اِیمنی وشیں بشارت دنت
کِرا ماہانہ ءِ اِنچو نہ اَنت کہ اَچ شُمئے زور ءَ مہ بنت پیلو
مں ماہانہ کِرا بس دہ ھزار کلدار مُزّ ءِ ھاتِرا بستگ
اگاں کیت اِیں کسے زوریت منی باڑائی مہر ءِ آسریں لوگ ءَ
گُڑا زرّاں وتی الّم بیاریت گوں۔