سپرنامہ ۔ گنداوہ ۔ سیمی بھر۔ مجاھد بلوچ
گوھرام اژ دوجاہ بے جاہ بات
نئے بات گور ءُ نئے گندواہ
سیمی بھر
مجاہد بلوچ
کساس چار گھنٹہ سپر ءَ پد ما شوران ءَ سر بوتیں، راہاں منی تروزھک ءَ من ءَ مزنیں باگے پیش داشت کہ اے سردار یار محمد ءِ باگ انت،من ابکہ بوتاں کہ اے باگ ءِ کہور پہ ردءُ بند ءُ راھبند کشتگ ات انت،داں چم کار کن انت ڈگار انت آئی کش ءُ کراں کہور ءُ درچک انت کہ لین ءِ سرا انت ڈگار ءِ اے کش ءُ آ کش ءَ کہور انت ءُ نیام ءَ ڈگار ءِ تہا کشت ءُ کشار کنگ بوتگ،واجہ اے ھنداں سال ءِ سرا یک رندے کئیت۔پہ وتی walkءُ سیل ءُ گرد ءِ ھاترا ایش جوڈ کرتگ انت۔بازیں پل ءُ گل ھم ایشی تہا کشتگ،ما گشت کنیں چہ واجہ ءَ شھداد ءِ جنت اے کوھانی تہا جوڈ کرتگ۔ ڈگارانی راستیں نیمگ ءَ چہ دور ءَ واجہ ءِ ماڑی درا بوت،ائی ءِ گس ءِ کش ءُ کراں درچک ءُ سبزگ است ات،واجہ کاردار مدام ادا ساڑی انت،ابید آئی ءِ ھکم ءَ مرگ چہ یک کہور ءَ دومی کہور ءِ سرا نشت نہ کن انت۔
دور لہتیں پکہ ءِ ماڑی درابوت کہ سرکار ءِ گار گس ات انت، ایشانی تہا یک مزنیں ماڑی یے ات،کہ واجہ وتی ھررچ ءَ وانگجاہ ءِ جوڈ کرتگ،اشکنگ ءَ اے باز زیبا انت،من دور ءَ چہ دیست۔بلئے جست ایش انت کہ ایشی ءِ تہا وانوک کئے انت؟بزگرانی زھگ انت یا میر ءُ سردارنی؟
شوران رندانی بنجاہ انت،مروچاں سردار یار محمد رند ءِ چک پہ وتی پت ءُ پیروکی سرداری ءِ پہازگ ءِ ھاترا ادا جاہ منند انت،سردار وت باریں چنکس وھد ءِ سرا اے ھنداں کئیت؟بلئے واج ءِ جنت مدام آبات انت۔
بژن ءِ ھبر ایش انت کہ واجہ وت ءَ میر چاکر رند ءِ اوبادگ گشیت۔واجہ ءِ لوگ ءَ بلوچی ءَ ھبر کنگ نہ بیت،بلکن واجہ ءِ گس ءَ سرائیکی ءُ سندھی ءَ گپ جن انت۔
ھما چاکر کہ آئی ءَ ابید بلوچ راجدپتر نہ سرجم انت،ھما چاکر کہ بلوچی کوھنیں شائری ابید آئی ءَ ھوادگ انت،آئی اوبادگ بلوچی زبان ءَ ھبر نہ کن انت،ایشی مستریں سبب وؤٹ ءُ سیاست انت،کہ واجہ ھماھانی زبان ءَ گپ جنت داں کہ آئرا ووٹ ءُ وزارت برسیت، پرچکہ ایش ھند ءُ دمگاں باز مردم سرائیکی ءُ سندھی زبان ءَ گپ جن انت،چہ ایشی مستریں بد بحتی دگہ چے بوت کنت، پہ واجہ ءَ بلوچی زبان ءَ گپ کنگ نہ کنگ ھچ فرق نہ کنت۔
ھلک ءُ میتگانی بلوچ بلوچی ءَ ھبر کن انت۔
شوران ءِ دگ ءِ دوئیں نیمگاں درچک انت،داں دور روۓ واجہ ءِ ڈگار ءُ سیل ءُ سواد ءِ جاہ انت۔
وھدے چہ شوران ءَ درکاۓ زمین ءِ رنگ ءُ دورشم بدل بیت،پٹ ءُ کوہ ءِ جاہ ءَ پلک ءُ ڈگار دیم ءَ کائینت،کہ روڈ دنز ءُ اھوڈ انت۔دگہ ءِ کش ءُ کراں مردم اُشترانی سرا اپ آرگ ءَ انت،باز جاہ ءَ ٹریکٹر ءُ ٹینکی پہ واجہاں اپ بارگ ءَ انت۔
ھمے دگہ سرا بازیں مردم مئے دیم ءَ گواست کہ اھاں کلاش ءُ دگہ توپک گوں ات،کہ ایشانی تہا بازیں کماش ءُ ورنا ات انت کہ گوں وتی بلوچی درا بوت انت۔
بزاں چاکر ءُ گہرام ءِ ھما وت ما وتی برات کشی ءِ اثر انگت ھلاس نہ بوتگ،ھمک بلوچ دومی ءِ مستریں دژمن اِنت،کہ ایشاں ھم سی سالی جنگ کرتگ ءُ انگت کنگ ءَ انت،
روان انت۔