شِزِرد چہ کجام مِھروانیں دُژمِنان اِتاں ؟
دستونک ۔۔۔ مجید عاجز
شِزِرد چہ کجام مِھروانیں دُژمِنان اِتاں ؟
کہ کانکڑویں نوبتانی بانزُلاں چِنان اِتاں
اِے آس مَھرمیں دلوں ناں انگر اِت ، ناں تْراوَل اِت
زھیر داگوان اِتنت ءُ زھر سُوچّنان اِتاں
کَے اَنت ھما ، کہ کُوکُواں درامدیں کپوتے ءِ
چو میھے ءَ منی شکِستیں مازَگاں مِنان اِتاں
تو پُلّے ئے ، نہ ارسے ئے ، نہ بالویے ، نہ پاتویے
من بے سَبب تئی رندپدانی مُھرگاں چِنان اِتاں
اے بے مرادیں چورھانی چونیں سیاہیں تالِھے
کہ چمّ ئِے تاپگان اِتنت ءُ ارس ئِے شیکِنان اِتاں
اے زِر پتاریں لیپگانی عاقبت نوں بُڈّگ اِنت
شِلنگیں بوجیانی لَڈّ ءُ بار ئِے راچِنان اِتاں
کئی نہ زاناں جنتریں کہیباں چھر وارتگ اش
مبارکیں بشارتانی واب گیچِنان اِتاں
من گار ءُ سیاہ عاجز ءِ کجام باریں کُرتِناں
پہ کَے سدکّہ ئیں دل ءَ چو پُکّی ءَ شِنان اِتاں
12 مئی 2022 ۔۔۔۔ معبیلہ مسقط