عطاشاد سینزدہ فروری۔۔.ارشادعالم
عطاشاد سینزدہ فروری…….،………..ارشادعالم
مروچی عطا شادءِ روچ انت ھمے روچءَ اچ ما سستءُ جتا بوت سنگانی سر تربتءِ محمد اسحاقءِ عطا شاد بوھگءِ سپر چہ اسکولءَ بوت بنداتی زمانگءَ آئیءَ اردو شاعری کت پدا سنگتانی سکینءُ گشگءِ پدءَ بلوچیءِ نیمگءَ دلگوش گور کنت…. عطا شاد بلوچیءِ روایت پروشیں ءُ رحجان سازیں شاعرےءِ بستارءَ زانگءُ پجارگ بیت عطاءُ سیدءَ ساری بلوچی نوکیں شاعری پارسیءُ اردو زدگ ات… ھنچو گندگءُ اتک کہ اردوءُ پارسیءِ رجانک انت بلے وھدے سید ہاشمیءُ عطا شادءَ وتی شہسواریں بور تاچینت بلوچی نوکیں شاعریءَ را جتاھیں درشاندابءُ ڈکشن ئے دات. وھدے مردم شعرءَ وان ایت ھمے ساھتءَ اٹکل جنت کہ اے عطا انت گشگءَ انت چہ دورءَ پجارگ بیت شاعرءِ واستا المی انت کہ چہ ایدگراں گستا ءُ جتا بہ بیت آئیءِ ھیال ءُ درشان داب جتا بہ بیت ھمے پیما عطا شادءِ شاعری عطا شادءَ چہ ایدگراں جتا کنت…. عطا شادءِ ھنچو لبزانی امبار شاھیگان انت ھمے رنگءَ آئیءِ پگر اوں شاھیگان بوتگ آ پہ بنگپ ءَ ھجبر نہ کپتگ ااندری ءُ دری مارشت درشانتگ انت بلے عطا وتی گشگ ھمیش انت کہ داخلیت دراسل ڈنی دری مارشتءُ تورشت انت کہ شاعرءِ دلءُ دماگاں جاہ کن انت… وھدے مردم عطاءِ شاعریءَ وانیت گڈا المیءَ زانت کہ عطا ھورت گندءُ ماروکیں شاعرے ات.. آئیءَ بلوچ راج بہ بیت یا دنیاءِ ایدگہ زلم آماچیں راج بہ بنت آہانی مارشت ءُ تورشت بیان کتگ انت شریں شاعرےءِ ھاسیت ھمیش انت کہ آئیءِ شاعریءَ سیمسر مہ بیت ھر کس ھمے پیم بہ پہم ایت کہ اے شاعری منی واستا انت منی پگرءُ لیکہءَ ھمگرنچ انت…. آفاقیتءَ شاعریءَ مزنیں ارزشتے ہست ھمے شاعرءَ را مزن کنت… وھدے ساہ کندنءَ زلم آماچیں راجے وانیت آ ھم ھمے سما کنت ءُ جیڑیت
سال کندنءِ چم پانچیءُ بے وانکءَ ہست انت زبان
چمے بہ بیت پہ گندگءَ
گوشے بہ بیت پہ اشکنگ
امروزءِ گران باھندیں آشوب اکبت اوبادگاں پہ ساھت انت
عطاءِ پگر جہلانک انت عطاءِ زانگءُ سرپد بوھگءَ بلوچ راجدپتر. بلوچی دودربیدگ. بلوچ سیاستءَ ابید دنیاءِ چستءُ ایرانی بابتءَ سرپدی المی انت…. عطا شادءَ نعرہ نہ جتگ بلے وتی شاعریءَ سیاست کتگ آئیءَ بلوچانی ناتپاکی پرشتءُ پروش ءُ ناروائیءُ بووکیں زلمءُ زیادتی ایر جتگ..
مُولاءِ شہجوءَ بگند گیر آر تلءُ تازیاں
چاکری ھاریں گورمءَ ملتہ کہچر وتی
عطا شاد تو بلوچی نوکیں شاعریءَ را نوکیں رنگءُ دروشمے دات پہ پدریچاں نشانے چیدگے ایر کت شت ئے… بلوچ مردگ پرستیءَ سک نامدار انت تو مزنیں ھستی ئے ات ئے آ وھداں ترا کسءَ ارزشت نہ دات باید انت تئی زندءَ نبشتہ کاراں چہ تو تئی ازم ءُ فن ءُ شاعریءِ گیشینگءَ چہ تو گیشاں چہ گیش باوست بکتیں مروچی تئی لیکہ تئی پگرءَ وانوک شریں رنگےءَ آشنا بوتگ ات انت… دنیگتءَ عطا شادءِ درجنگءُ پولگءِ زلورت انت اے ردا حکیم بلوچ ءُ اے آر داد ءَ تئی شاعریءِ تکءُ پہناتاں گیشینگءِ جہدے کتگ ءُ ترارا پولتگ بلے انگت تئی بالاد مزن انت…. شر انت کہ نوں بلوچاں سما کتگ ترا یات کن انت تئی نامءَ عطاشاد ڈگری کالج عطا شاد پارک دگہ ادارہ ہست انت تو یات کنگ بوھگءَ ئے…. دوھزار سینزدہءَ بگر داں دوھزار بیستءَ ھمے روچءِ درگتءَ سید ہاشمی ڈگری کالج گوادرءَ اوں تئی روچءِ درگتءَ مراگش بوتگ… سید ہاشمی ڈگری کالج کہ سید ھاشمی نامءَ نامینگ بوتگ بلے تنی وھدی سرکاری کاگداں سید ہاشمی نوٹیفیکیشن نہ بوتگ. باید انت سرکاری ردا گوادر کالج اوں سیدءِ نام سرکاری ہسابءَ نامینگ بہ بیت… ھمے کرونا اتک مئے کالجءَ مراگش مھتل دارگ بوت انت من وھدے گوستءِ یات چہ فیس بکءَ دیست انت . اے سال ءَ اوں کالج ءَ تئی یات ءَمراگشءُ دیوان نہ کت بلے منی دل ءَ گشت کہ چندے دانک نبشتہ بکن بلکنءَ تئی ارواہ تاھیر بزوریت کہ مہلوک چہ من بیہال نہ انت…