لبزانکی نمدی یے پہ ذوالفقار علی ذلفی ءَ ۔۔۔۔۔۔ گڈی نمدی
سلام ءُ دروت۔۔۔۔۔
لکھ منت کہ نمدیانی نبشتہ کنگ ءِ اے سفر ءَ تو منی ہمراہ داری کُت۔۔۔۔ باز وشیں سفرے اَت۔۔۔ چہ تو من بازیں چیزے دربرت۔۔۔۔ اے یات گاریں سفر ءَ ھمدا ہلاس کنیں۔۔۔۔ ترا من دیم پہ دیم نہ دیستگ بَلے اے نمدیانی وانگ ءَ پد تئی بازیں دروشم منی دیما پدر بوتگ اَنت۔۔۔

نوں اگاں من ترا دیم پہ دیم مہ گنداں ہم ہچ پرواہ نیست چیا کہ من زاناں۔۔۔۔ ندکاریں ذلفی دگہ مردمے ءُ تو دیم پہ دیم ءَ دگہ مردمے بئے۔۔۔۔۔ ذلفی اگاں مورے بوتیناں بانزل رودینتگ اَت ءُ بس یک روچے بادشاہی کُتگ اَت ءُ مُرتگ اتاں۔۔۔ بَلے اپسوز کہ من مردمے آں۔۔۔۔ ءُ پدا ہما مردماں کہ انگت اے سرپد نیاں سیاہ ءُ اسپیت ہور بہ باں گڑا کُجام رنگ جوڑ بیت۔۔۔۔
’’ہرچی دیستہ اے مہیم ءَ بس اِنت‘‘
ذلفی مروچی ئیں روچ پہ بے تواری گوست۔۔۔۔ باندات یک امیتے۔۔۔۔ ھو برے برے وابانی دنیا ءَ من بانزل رودیناں بال کناں۔۔۔ بَلے وابانی دنیا ءَ مُدام بال بُوگ وش نہ اِنت۔۔۔۔ ہر ٹِک معنا دارنت۔ بس۔۔۔ چمے بہ بیت پہ گندگ ءَ ۔۔۔۔۔ گوشے بہ بیت پہ اشکنگ۔۔۔
ذلفی دل گوشیت کہ نوں چماں نز بہ کن ءُ بہ وپس۔۔۔ دانکہ دگہ سفرے بندات بہ بیت۔۔۔
گڈسرا مُلا فاضل ءِ اے شعر ءَ گوں اللہ حافظ
ریچگی اَنت ملک ءُ مال ءُ کوٹ ءُ جاگاہ ءُ دیار
توشگ ءِ پگر ءَ بہ کن تئی کاروان بوتگ تیار
تئی کستر چندن ساچ
4 مئی 2016