مُرگ ھم سوت جنت۔ تالب کاموش
مُرگ ھم سوت جن انت
کماشیں ھُدا داد ءَ مُدام اچ من جُست گپت:
“تو گْوات چول جنّگ ءَ دیستگ؟”
من پسّہ دات۔
“ناکو گْوات گِندگ نہ بیت۔”
“تو اوں دل ءِ ڈاکٹر ءَ برو ءُ وتی چمّاں پیش کن۔”
ناکو ھُدا داد بْرانز گپت۔
“دل ءِ ڈاکٹر ءُ چمّ۔۔۔۔۔۔۔۔دل ءِ ڈاکٹر چمّ چوں چار انت؟”
من ناکو ھُدا داد ءِ گپ ءَ نوکی وتی تہ ءَ پدجنّگ ءَ اِت آں کہ آئی ءَ دِگہ جُستے آس دات۔
“شرّ اِنت تو بہ گْوش۔۔۔مُرگ سَوت جنت انت؟”
“مُرگ؟”
من ھیران بوت ءُ پُرس اِت۔
“ھو!۔۔۔مُرگ۔”
“من سَوت جنّگ ءَ نہ دیستگ انت۔”
من پسّہ دات۔
“تو امریکہ نہ دیستگ ایشی ءِ متلب اِے نہ اِنت کہ امریکہ نیست۔”
آ گپ جنان ءُ منی جیڑگ ءِ زُلپاں رندان بوت۔
“چاتی پوگُٹّ۔۔۔تئی آسر ھمیش اِنت۔”
ناکو ھُدا داد ءِ ھر گپ ءِ تہ ءَ اجب گونگیں کْراماتے مان اَت۔آ کْرامات ءَ من ءَ جیڑگ ءُ پدجنّگ ءَ لاچار کُتگ اَت۔ناکو ءِ گپّانی کْرامات ءِ برکت ءَ من جیڑگ ءُ پدجنّگ دربُرتگ۔ناکو ھُدا داد ءِ جُستانی پسّہ من آئی ءِ زندگی ءَ دات کُت نہ کُت انت۔ناکو ءِ مرگ ءَ پد،آئی ءِ جُست منی سر ءَ انچو میلانک بوت انت کہ من ءَ ماں واب ءُ آگھی ءِ میان ءَ ٹنگ اِت اِش۔من چہ آیاں دور تکک کُرت نہ کُت۔لگور بوت کُرت نہ کُت پرچا کہ جُستانی مول ءُ مُراد زندمان اَت۔
ناکو ھُدا داد ءِ گْران بھائیں جُستانی پسّھاں سُھبی منی پتر لگت دات ءُ وتی وشبو اِش ھیرات کُرت ءُ شُت انت۔
دل چہ گل ءَ بال بوت۔دل ءَ پہ کوکارے اومان کُت۔
من چم آزمان ءَ جت انت ءُ گْوانک جت۔
ناکو۔۔۔۔۔او ناکو۔۔۔۔ناکو ھُدا داد۔۔۔۔۔۔بیا کہ من ءَ تئی جُستانی جواب گون انت۔کُجائے ایر کپ جھل ءَ!
من زاناں تو وت نیا ئے بلے وتی گوشان گوں پھم ءَ روان دات وَ کن ئے تاکہ پسّہ پتّو بیا انت۔
تئی اولی کُرتگیں جُست ءِ پسّو ایش اِنت:
ھو! گْوات گِندگ بیت ءُ چول ھم جنت۔من دوشی گْوات چول جنّگ ءَ دیستگ ءُ بانگواھی سمین ھم۔
ترا یات بیت تو من ءَ بْرانز گپت ءُ گْوشتگ اَت کہ “تو اوں دل ءِ ڈاکٹر ءَ برو ءُ وتی چمّاں پیش کن؟” من ڈاکٹر ءَ روگ ءَ ابید ھم تئی اِے گپ پھم اِتگ کہ گْوات گوں دل ءِ چمّاں چارگ ءُ گِندگ بیت۔دل ءِ چمّانی بندی،گْوات ءِ نہ گِندگ اِنت۔پمیشکا تو من ءَ گْوشتگ اَت کہ”دل ءِ ڈاکٹر ءَ برو ءُ وتی چمّاں پیش کن۔”
تئی دومی کُرتگیں جُست ءِ پسّو ایش اِنت:
جی ھو! من سُھبی دیست ءُ سرپد بوت آں کہ
مُرگ ھم سَوت جن انت۔
تالِب کاموش