ناٹک ۔ نسیم عادل ءِ پٹ ءُ پولی نبشتانک ۔ ششمی بھر
ناٹک (ششمی بھر)
نسیم عادل
عشرت رحمانی ءِ رد ءَ ناٹک ءِ ھما بھراں پرّیچیں کہ ارسطو ءِ لوٹانی لڑ ءَ مان نہ اَنت البت درستاں یکّیں لڑ ءَ کمائیں دانکہ ناٹک ءِ لوٹ سرجم بہ بنت.
1. رد ءُ بند:- برز ءَ پرّیتکگ.
2. کسّہ ءِ بنزہ:- پہ ناٹک ءَ یک الّمیں کسّھے ءِ بیگ ھژدری اِنت البت ناٹک ءِ چندے بھر انچیں است کہ کسّہ ءَ چشیں ارزشتے نیست(بھرانی بابت دیمتر) نوں ھما کسّہ ءِ بنزہ چے اِنت، اے چیز ءِ گیشّ ءُ گیوار ءَ کسّہ ءِ بنزہ ما گشت بئیں، باز بری کسّھے کہ بنگیج بیت تہ آئی ءِ تہ ءَ دگہ دو سئے کسّہ مان بلے کسّہ ءِ بنزہ اگاں ھمے دو ءُ سئے ئیں کسّھانی تہ ءَ گار بوت تہ بزان کہ نبیسوک ءَ رد وارتگ ءُ وتی بُنُکّی کسّہ چیر ترّینتگ یا گشت بئیں کہ پدّر کت ئِے نہ کتگ.
3. بندات:- بندات ما برزتر گیشّینتگ.
4. کارست ءُ کارستانی ڈیلّ ءُ ڈول. کجام ھم ناٹکے ءَ کارستانی ڈیلّ ءُ ڈول، پچّ ءُ پوشاک، جاہ ءُ مکان ءُ گپّ ءُ گالوار آیانی گیشّ ءُ گیوار ءَ کمک بیت. ما اگاں ناٹک ءِ بندات ءَ بہ گندیں کہ تلو ءِ سرا تھتے ءَ ورنایے وپتگ ناتاھیری نارگ ءَ اِنت ءُ پیریں بلّی یے آئی ءِ سر ءَ پْرنچگ ءَ اِنت تہ مارا گـُمان بیت کہ ورنا بلّی ءِ چُکّ یاں و نماسگ اِنت، نوں اگاں بلّی ءَ رنگیں گُد پوش اِتگ تہ مارا کسے مہ گش ایت ھم ما زانیں کہ بلّی ءِ لوگواجہ ھست ءُ ھیات اِنت ءُ اگاں بلّی ءَ بلّے توری رنگی ئیں گد گْورا بلے درتگ ءُ پُچ اتگین انت تہ ما اے ھم ماریں کہ بلّی نیزگارے، بلّی ءِ پوشاک جْوانین بہ بنت ءُ دیمتر ءَ بگیر ء دگہ وئیلے بلّی نیزگارے پیشدارگ بوت تہ بزان کہ نبیسوک ءَ نبیسگ ءَ رد وارتگ.
5. تْران:- تْران ما برز ءَ گیشّینتگ.
6. کسّہ ءِ جھل ءُ برزی:- اے ناٹک ءِ ھما بھر اِنت کہ کسّہ یک جاگھے مان گیشّ اِیت ءُ چاروک نزانت کہ نوں دیمتر چون بیت پہ درور ناٹک ءِ بُنُکّی کارست کیچ کؤر ءَ اوژناگ گْوزگ ءَ ات کہ اناگاہ کؤر ءَ دگہ آپے آورت ءُ کارست آپ ءَ چامپ اِت ءُ بُرت ءُ اد ءَ چاروک بھ ءُ بکّڈ اِنت کہ کارست آپ ءَ چامپ اِت، دیمتر باریں چے بیت!
7. کارستانی دیم پہ دیمی:- اے ھما بھر اِنت کہ سستگیں/چیریں کارست دیم پہ دیم بنت/ دچار کپ اَنت ءُ کسّہ ءِ دیمتری جاورانی سھرائی بیت.
8. گُڈّی سرکپ:- رد ءِ بند ءِ گُڈّی سرکپ کہ ما برزتر گیشّینتگ.
ما اگاں ارسطو ءُ عشرت رحمانی ھردوانی ناٹکی لوٹاں یک لڑے ءَ بہ کمائیں تہ ناٹک ءِ درائیں لوٹانی گیشّ ءُ گیوار شرتر بیت.
لڑ اے پئیم اِنت.
1. رد ءُ بند.
2. کسّہ ءِ بنزہ.
3.کارست ءُ کارستانی ڈیلّ ءُ ڈول.
4. بندات یا بنداتی واقعہ.
5. تْران
6. زبان ءُ درشانداب
7. کسّہ ءِ جھل ءُ برزی.
8. کارستانی دیم پہ دیمی.
9. گُڈّی سرکپ.
10. آسرال.
11. ساز.
12. میک اپ.
(قدیم ناٹک ءَ تلو اولی لوٹ بوتگ ءُ اے گپّ ءَ ما انگت ڈالچار کت نہ بئیں کہ پیشدارگ ءِ وھد ءَ تلو ءِ مُکام ھما اِنت کہ پیشی بوتگ البت مرچی ئیں دیمروی کتگیں چاگرداں اوپیرا ءَ ابید سنیما ءَ ھم ناٹک پردہ ءِ سرا پیشدارگ بیت ءُ ھمے پئیم لوگاں ھم مھلوک نشتگ ناٹک چار اِیت تہ ھمے گندیں کہ وھد لوٹانی ھساب ءَ مٹّان اِنت یانکہ لوٹ وھد ءَ مٹّینان اَنت)
روان اِنت…