نوکیں سال ۔ نبشتہ کار: ارشاد عالم
نوکیں سال…………ارشادعالم
روچ گوزان, ھپتگ بنت ءُ ھپتگ ماہ, ماہ سالاں بدل بنت وھد گوزان بنت وتی پشتءَ کارست. واکیہ. گم وشی. نہ وشی. مرگ. زند. نادراھی. جنگ بجنگ. پشت گیج انت راجدپترءِ بہر جوڈ بنت گوست پہ ھر کسءَ
درونت ءُ رودپترےءِ ھسابءَ مانیت… ھمک پڑانی مردم. نودربر. سیاستکار. لبزانت. بیپاری تکءَ چہ سیاسی داروکیں مردم چہ گوستءَ دربر انتءُ وتی آیوکیں بانداتءَ شرترءُ گھتر کنگءِ جہدءُ کوشست کن انت. … مروچی اگاں بنی آدماں ھنچو دیمروئی کتگ آہاں وتی وھد سنگءُ شاھیم کتگ. وتی کردءُ کارے خود تنقیدی چکاسءَ گوازینتگ وتی ردیانءَ منتگ.. .. ھنچو گشنت کہ وھد ھما سبکءُ درونتءَ دنت کہ استادءُ وانگجاہ آ درونتاں نہ دی انت… ھمک روچ پہ بنی آدماں سبک ئے یا پنتءُ سوج ءُ رھشونی ئے بلے بئے ھمیش انت کہ مردم چہ وھدءَ در بہ بارت.. مئے وھد گوزان انت مئے دیمءَ روچے بازیں واکیہءُ کارست بنت بلے ما چہ واکیہءُ کارستاں. سیاسی بہ بنت چاگردی بہ بنت, جندی بہ بنت درونت نہ زوریں وتی آیوکیں وھدءَ را شرترءُ گھتر کنگءِ جہدءُ کوشست نہ کنیں…. دیما شتگیں راج مدام وتی گوستءِ بابتءَ جیڑ انت ءُ گوستءِ ردی ءُ کمی آں دور کنگءِ جہدءُ کوشست کن انت ہمیشکا آہانی زندمان روچ پہ روچ شرترءُ گھتر بوھان انت بلے ما روچ پہ روچ مانگیشان ایں ھکیکت ھمیش انت کہ ما دنیگتءَ وتی سرا وت تنقیدی چکاسءِ عملءَ ساڈی بوھگءَ تیار نہ ایں ہمیشکا ناں مئے سیاست شرتریءُ گھتریءِ نیمگا رھادگ انت ناں چاگردی. علمی رنگءُ دروشمءَ چوشیں دیمروئی ئے شہمے مارا گندگءَ کیت کہ اے تیزگامیں دورءَ مارا اوں جوانیں رنگےءَ ایدگہ دیما شتگیں راجانی وڈا چاگردی. سیاسی. علمی. بیپاری تکءَ دیما روگءِ زلورت انت ءُ وھدے لوٹ ءُ گزر اوں ھمیش انت… بلوچ اے وھداں سک نگیگ انت دنیاءِ سیرءُ ازگاریں سرزمینءِ نندوک دنیاءِ پشت کپتگیں راجاں چہ یکے اگاں ما بچاریں تہ گندگءَ کیت کہ بلوچ کوم ءِ توکی نزوری اوں سک باز انت ناوانندگی. نہ منگ. من نہ کشتگ ھلار نہ انت. قبائلیت. وتی پگرءُ عملءِ سرا وت تنقیدی کنگ نہ بوھگ اے درست بلوچءِ توکا ہست انت… سال گوز انت بلے مئے واستا درونتءُ سبک جوڈ نہ بنت ما زوت گوستءَ پراموش کنیں اگاں منی پارٹیءَ یا من یا دگہ کسےءَ ردی ئے کتگ منگءَ تیار نہ انت چہ اشیءَ گھتریءُ شرتری اتک کت نہ کنت بلکنءَ اوشتوکیں آپ ئے ھساب بیت وھدے آپ جاگہے اوشتیت شونز بندیت ساپءُ پلگار نہ بیت من نہ گشاں کہ بلوچ دیمروئی کنگءَ نہ انت یاکہ سنچءُ بودے نیست بلے وھدے گپ شعوری کیت سنچءُ سما ئے کیت گڈا گندگ بیت کہ شعوری ءُ سنچءُ سمائی جہدءُ عمل ءِ جہد تیز نہ انت کہ بوھگ لوٹیت پرچا کہ بلوچ ھنچیں سرزمینےءَ نشتگ آئیءَ را ایدگہ دنیاءِ کوماں چہ گیش علم. وانگءُ زانگ. سیاست. بیپاریءِ نیمگءَ روگءُ جہدءِ زلورت انت اے تکءَ وتی تہی جیڑھاں بگر داں ہمساہگیں ملکانی سیاسی جاور. ءُ طاقتوریں ملکانی سیاسی چستءُ ایر ءُ آہانی نپءُ سیت چارگی انت. بلوچءَ اے ھم چارگی انت ما چے کٹ اتگ چے ببا داتگ. مئے سیاسی پرشتءُ پروش ءُ ناتپاکیءَ مارا چے داتگ. … وھدے اے جاوراں بلوچ مرتءُ مار کن انت بازیں راہ ءُ درے پچ بیت… مستریں چیز وت تنقیدی عمل انت بلے مئے بدبہتی ھمیش انت من گشاں منی پارٹی انت شر کنت گندگ کنت من گشاں شر انت جوان انت ھر رنگءُ ھر وڈءَ من وتی پارٹیءِ. وتی کومءُ چاگردءِ دیمپانیءَ کناں چوش کنگ نہ لوٹیت تعمیری تنقید منی پارٹی بہ بیت. ادارہ بہ بنت چاگرد بہ بیت لبزانک بہ بیت. سک ہژدری انت بلے ما تعمیری تنقیدءَ وتارا مدام گستا داشتگ… مستریں عیب منی نزءَ ناتپاکی نہ انت تنقید گوش دارگ سگگ ءُ پہ تعمیر ءُ دیمروئیءِ ھاترا عمل کنگ انت وھدے راستءَ من ئے. گوش دارے گڈا الما راستیءِ نیمگا جنزان بئے راستی چلءُ پوناں کشان بیت…. 2021 گوست شت. چے بوت چے نہ بوت نوں راجدپترے بہرے جوڈ بوت ھر کسءَ شر کت یا گندگ نوں گوست پدا نئیت بلے الما درونتءُ سبق ئے پشت کپت. نوں نوکیں سالے اتک منی کلوہ گوں وتی نودربراں سیاستکاراں لبزانتاں سلاہ ایش انت کہ وتی رودپترءَ المیءَ نبشتگ بکن انت دانکہ گوست پراموش مہ بیت ءُ آیوکیں بانداتءِ شرترءُ گھتر کنگءَ کمکے برسیت…