پیشگال ءِ روایت۔ زاھدہ رئیس راجی ءِ نبشتانک
نبشتانک : پیشگال ءِ روایت
نبشتہ کار : زاھدہ رئیس راجی
ماں بلوچی زبان ءُ لبزانک ءِ پڑ ءَ بازیں روایت چَہ ھمسائیگاں زورگ ءُ دیم ءَ برگ بوتگ اَنت۔ کتابانی پیشگال نبیسگ ءِ روایت ھم چَہ ھمایاں یک اِنت۔ اگں اے روایت ءِ پُشدر چارگ بِہ بیت گُڑا زانگ بیت کہ ایشی ءِ مول ءُ مراد وانوک ءَ چَہ کتاب ءِ وانگ ءَ پیش کتاب ءِ بابت ءَ یک جوانیں سرپدیے دَیگ بیتگ ۔
بلے چوش کہ اے مئے ھمروچی گندگ انت کہ کجام ھم روایتے وھدے باپارے جوڑ بِہ بیت گُڑا تہنا چَہ آئ ءَ نپ ءُ تاوان گندگ بیت بلے آئ ءِ بنوکی لوٹ پہکا سرگوز کنگ بنت۔ ھمے چیز گوں پیشگال ءِ نبیسگ ءَ ھم دیم ءَ اتکگ ۔
پیشگال نبیسگ دنیا ءِ بازیں لبزانکاں یک شرپے زانگ بیتگ کہ پیشگال نبیسوک چَہ کتاب ءِ واھند ءَ گیشتر زانتکارءُ سرپدیں مردمے زانگ بیتگ پدءَ وھدے کتاب ءِ واھند یک نوکیں مردمے بیتگ پہ آئ ءَ پیشگال ءِ نبیسگ گیشتر زلوری بیتگ کہ بے پیشگال ءَ آئ ءِ کتاب ءِ ایر کنگ ءَ کتابانی بہاکنوک ھم رازیگ نہ بیتگ اَنت ۔
پیشگال نبیسگ ءِ بنوکی تیکینک ھمے بیتگ کہ اگں کتاب ءِ واھند نوک انت آئ ءِ گونڈے پجّارے دَیگ بہ بیت پدءَ آئ ءِ اے کتاب ءِ نکان ءِ بابت ءَ گوشگ بہ بیت پدءَ آئ ءِ شری ءُ نزوریانی بابت ءَ گوشگ بہ بیت ءُ اگں کتاب ءِ واھندءَ پہ دیمروئ ءَ سکینے دَیگ زلوری بہ بیت اے کار ءَ ھم بہ کنت ۔ بلے اگں کتاب ءِ واھند نوک باھند نہ انت بزاں آئ ءِ پیسرءَ ھم لہتے کار دیم اتکگ انت گُڑا باید آئ ءَ ھما کار ھم دیم پہ دیم کنگ بہ بنت کہ اے کتاب چَہ پیسریگیناں شرتر انت یا ندکار ءَ دیمروئ ءِ جاہ ءَ پدکنزاتگ یا انگت ھم ھما جاہ ءَ اُشتاتگ کہ اولی روچ ءَ بیتگ۔
چوکہ اے چیز ھمسائیگانی گورا سک باز بیتگ آھای رندگیری ءَ بلوچی ءِ تہ ءَ پیشگال نویسی ءِ روایت ھم نوں باپارے جوڑ بیتگ ۔ نوں نامداریں مردمانی پیشگال کجام ھم کتاب ءِ ارزشت ءَ گیش کنت تری کتاب ءِ تہ ءَ وانگ ءِ لائک دوگال ھم مَہ بنت ءُ ھما کتاب کہ تری مالومداری ءِ ھزانگے بہ بیت بلے بے پیشگال ءَ کسے آئ ءَ مان میارایت۔
منی اولی کتاب کہ اردو شئیرانی دیوان ات آئ ءِ سرءَ پاکستان ءُ انڈیا ءِ سے نامی ندکار ءُ شائرانی پیشگال مان کنگ ءِ سوب منی اولی تجربگ اَت پمشکا من زانتکارانی سوج ءِ سرءَ اے کار کُت بلے چَہ سہیناں یکے ءَ ھم من دومی ءِ پیشگال پیش نہ داشت ءُ ھمے سوب ات کہ ھمک پیشگالے یک جتائیں رنگ ءُ دروشم ءَ کتاب ءُ شائرءِ بابت ءَ وتی چمشانک ءَ دیان اَتنت بلے وھدے اے کتاب چاپ بیت ءُ وانوک ءِ دست ءَ اتکگ نوں وانوک تری اردو ءِ نامداریں مردم بہ بنت یا کہ بلوچی ءِ سوشل میڈیا ءِ وانوک ، درستاں کتاب ءَ گیش پیشگال دیم ءَ کُتگ ءُ وتی چمشانک نبشتہ کُتگ ۔
پدءَ منی دیم ءَ بلوچی ءِ بازیں کتاب اتک اَنت کہ آھانی پیسر ءَ من پیشگال ونت آنت ءُ رند ءَ کتاب ءِ جند گُڑا دست سرءَ بیت ات کہ پیشگال نبیسوک ءَ کتاب وَ پچ کنگ چارگ ءِ زَھمت ھم نہ کش اتگ ۔
نامداریں ندکارانی وَ ھال چَہ بندر ءَ ھمیش ات کہ تو بگوش من ءَ ھاجی من گوش آں ترا مُلا بلے منی رنگیں نوک باھندانی ھال ھم چَہ ایشاں کمتر نہ بیت۔ بلے آ کہ راج ءِ دوزواہ انت الّم ءَ پگر کن انت کہ اے چیز بلکیں دنیاءِ دگہ کاراں سوبمندی ءِ سَنَد بہ بیت بلے وانگ ءُ زانگ ءِ پڑءَ اے چیز مستریں تاوان انت۔
اے رنگیں پیشگال نویسی ءَ گوں یک نیمگے ءَ ما نوک باھندیں کتاب ءِ واھند ءَ بے راہ ءَ بران ایں ءُ دومی نیمگ ءَ وانوک ءَ ھم پَہ زور پیشگال نبیسوک ءِ پگر ءَ گوں ھمگرنچ کنان ایں ۔
ھمے سوب انت کہ من وتی اولی کتاب ءَ رند کتاب ءِ توک ءَ پیشگال مان کنگ ءِ روایت پروشگ ءِ ارادہ کُتگ ءُ گوں لہتے ندکاراں شورءُ سلاہ ھم کُتگ۔ چونائیا درستاں منی گپ ءِ تائید کتگ بلے یک دوزواھے ءَ گوشت کہ باید ناگمان ءَ بُگوش تئ کتاب ءِ سرءَ نبشتہ بہ کنت گُڑا تئ کتاب ءِ ارزشت گیش بیت ۔
من چَہ اے گپ ءَ ھیران بیت آں کہ کتاب زاھدہ ئیگ انت باید اے چارگ بہ بیت کہ زاھدہ ءَ چے نبشتہ کُتگ بلے چارگ اے بَیگ ءَ اِنت کہ کئے ءَ زاھدہ ءِ پیشگال نبیس اتگ ءُ چون ساڑاھیتگ۔
من اے گپّے منوک نیاں۔ کسے ءَ منی کتاب وانگی ایں آ اے بچارایت کہ زاھدہ ءَ چے نبشتہ کُتگ۔ نزوری یے است بگوش ایت ، نیست بگوشیت بلے کئے ءَ بے کتاب ءِ وانگ ءَ آئ ءِ توسیپ ءُ ستا کُتگ یا ایر جتگ اے چارگ ءُ دلگوش دَیگ بہ بیت، من اے چیز ءِ منوک نیاں ۔
کسے بے پیشگال ءَ منی کتاب ءَ وانگ نہ لُوٹیت من ھجبرآئ ءَ منّت نہ کن آں کہ من ءَ انچیں گران تبیں وانوک لوٹیت کہ آ زاھدہ ءَ مہ چارایت کہ کئے انت، کئ چُک انت ، کجا نشتگ ، آئ ءِ بُن پیروک کئے بیتگ اَنت آئ ءِ کتاب کجام سیاد وارس ءَ چاپ ءُ شنگ کُتگ بلکیں من ءَ ھما لبزانت ءِ دوزواہ وانوک ءِ دروشم ءَ لوٹنت کہ آ کتاب ءِ تہ ءِ استیں نکاناں بہ چاراَنت ءُ اگں چیزے گنجائش پشت کپتگ من ءَ ھال بہ دَئینت تاں دوبر ھمے ردی کنگ مہ بیت۔
سلامت بات ات۔