ڈُنڈوار یک مُرگے کہ ڈُنڈ وارت۔
بلوچی کِسّہ ۔۔۔۔ شوھازکار: بشیر شوھاز بلوچ
ڈُنڈوار یک مُرگے کہ ڈُنڈ وارت۔
شاھین یک مُرگے کہ شکار کنت، دومی ءِ شکار ءِ ورگ ءَ عیبے زانت۔
“”یک روچے ڈُنڈ وار ءُ شاھین زامران ءِ کوہ اسپیدگ ءَ دَپ کپت اَنت۔
ڈُنڈوار ءَ گْوشت، “اے بزّگیں شاھین، اے زندگی ءَ منی اَرزِشت گیشتر اِنت، من زندگی ءِ تام ءَ گیشتر چَشت کناں کہ 120 سال منی عمر اِنت۔ اے 120 ئیں سالاں من پہ غریبی ءُ سھدار دوستی گْوازیناں، وتی زندگی ءَ ھم دگہ سھداراں نقصان نہ دیاں، نہ کُشت ءُ کوش کناں۔ تئی عمر اَتکگ ءُ بیست سال اِنت، ھمے بیستیں سالاں ھم تئی عمر پہ ذلالت ءُ رسوائی گْوزیت۔ برے گِندئے تو مُرگانی رم ءَ ھیژ بستگ ءُ دارے تئی سگندان ءَ پُترتگ ءُ تو مُرتگ ئے۔ برے مارے چانپتگ ءُ مارا ترا ڈَنگ جتگ ءُ مُرتگ ئے۔ ترا دگہ سھدارانی بد دعا پَشت اِنت، تئی شرّی دروگے منی براس۔۔۔۔۔”
شاھین ءَ دیم گوں ڈونڈوار ءَ کُت ءُ درائینت: “ھیراتیں نباشد، چُکّانی سبیل، تئی مال ءُ متاہ اَتکگ ءُ مُردگ ءُ ڈونڈ پَٹّگ ءُ ورگ اِنت۔ انگت نِشتگ ءُ منی نازاک ءُ گھگیریں سرا شگان گْوندئے! من کوہ ءُ جنگلانی بادشاہ آں۔ منی یک ھیژّابے ءَ اے جنگل ءُ گیابان ءِ دْرستیں مُرگ ءُ مارانی دل چیر ء پُپّانی رَؤت۔ تئی وڑیں گَرّی ءُ ڈونڈ واراں من وتی میشّاں ھم نہ کناں۔ اے گپّ راستے کہ منی عمر تئی عمر ءِ چارک ءَ ھم نہ بیت۔ بلے منی ھمے عمر پہ مردی ءُ پہ شان گْوزیت۔ تئی عمر بِلّے 100 سال اِنت۔ بلے تئی عمر ءِ 100 ئیں سال منی گھگیری ءَ گوں گْوازینتگیں یک روچے ءِ ھم مَٹّ نہ بنت۔ اگاں گِندئے چہ من ءُ مستر مہ بوتین ئے من تئی دوا زانتگ ات، بلے افسوس کہ عمر ءَ مسترئے! “۔۔۔۔۔۔””
نی شُمئے ھیال ءَ شاھین سکّیں بے وقوفے بیتگ یا ڈُنڈوار سکّیں دانائے؟