گوں من ءَ سمل ءِ اجبیں مھر۔نبشتہ کار: سکی ساوڑ۔ اولی بھر
گوں من ءَ سمل ءِ اجبیں مھر
نبشتہ کار: سکی ساوڑ
اولی بھر
(دلگوش: اے کسہ ءَ الم بہ وان اِت لک منت)
11 اگست 2016 ءَ، کائد آباد نپسیاتی ھسپتال ءَ سُھب ءِ یانزدہ ءِ وھد ءَ من رسپشن ءَ نشتگ اِت آں، یک نادراھے ءِ پائلے جوڑ کرتگ ءُ دگہ نادراہ ءِ وداریگ اِت آں کہ نادراہ جاہ ءِ دیم ءَ کرولا گاڑی یے آھت ءُ داشت، چَہ گاڑی ءَ سے مردم ایر کپت آوانی تہ ءَ یک کماشے ءُ دگہ یک بچکے ءُ جنکے اَت، اینگر ءُ آنگر چارگ ءَ پد جنک ءَ مے نادراہ جاہ ءِ نیمگ ءَ اشارہ کرت ءُ پد ءَ آ نادراہ جاہ ءِ تہ ءَ آھت اَنت ءُ سلام اِش دات.
منی ھمراہ یک جنکے اَت کہ گوما کار ءَ اَت ،آئی ءَ گوشت ” جی “.
کماش ءَ گوشت” منی زھگ نشہ ءِ آماچ اِنت ءُ ما الاج کنگ ءَ آؤرتگ”.
کماش ءُ منی ھمراہ زَر ءُ ایدگہ چیزانی بارو ءَ گپ اِت اَنت بلے منی ھیال برے گوں کماش ءَ اَت ءُ برے گوں جنک ءَ اَت، جنک ءِ دیم درا اَت ءُ سکیں شوکیں جنکے ات، وھدے جنک ءَ دیست بچک ءِ چم من ءَ سک اَنت گڑا آئی ءَ وتی دیم ترینت، بلے انگت اے چم آئی ءَ سک اِت اَنت ، من زانگ ءَ اِت آں اے بلوچ اَنت بلے آ من ءَ بچاہ آرگ ءَ نہ اِت اَنت.
بچک پاد آھت ڈن ءَ روگ ءَ لگ اِت، گڑا جنک ءَ گپت ءُ پد ءَ نادینت، منی ھمراہ ءَ من ءَ سوچنے دات ءُ اشارہ ئِے کرت کہ سوچن ءَ ئِے بہ جن دانکہ آرام بہ کنت، من سوچن زُرت ءُ بچک ءِ کرّ ءَ آھت آن ءُ گوشت” دست ءَ بدار ترا سوچنے جَن آں ٹیٹ بَہ ئے گڑا پد ءَ برو ءَ ترا موکل اِنت”.
من کہ بلوچی ءَ گپ کرت گڑا جنک ءَ من ءَ چار اِت گوشت: تو بلوچے ئے.”
جی ھو بلوچے آں” من پسہ دات”.
آئی ءَ کمو بچکند اِت ءُ گوشت” من ھمے پھم اِتگ تو پٹانے ئے پرچاکہ تئی مود ءُ اسٹائل ھمے وڑ اَنت نوں کہ تو گپ کرت ءُ تئی پوشاک من دیست اَنت گڑا زانت تو بلوچے ئے.”
من ءَ وَ چوناھا گوں جنک ءَ گپ کنگی اَت ءُ من ھم بچکند اِت ءُ گوشت” جی ھو اگاں اد ءَ پٹانے کیت گڑا گوں من پٹانی کنت ءُ بلوچے کیت گڑا اولسر ءَ اردو کنت، پد ءَ زانت اے بلوچے، تو میاریگ نہ ئے چوش بیت…….”.
ھو کہ تئی اسٹائلے انچوش اِنت” آئی ءَ یکبرے پد ءَ کند ءُ گوشت”.
سوچن منی دست ءَ اَت ءُ ما گپ ءَ اِت ایں کہ منی ھمراہ ءَ من ءَ توار جت” سکی پد ءَ دیوان بہ کن اِت انوں دیوان ءِ وھد نہ اِنت”.
من وتی ھیال ءِ تہ ءَ گوشت” گرک اِنت دیوان ءَ نیل اِیت کہ مردم گپے بہ کنت”.
یکبرے بچک ءَ من ءَ سوچن جَنگ ءَ نیشت بلے بازیں منّتے ءَ پد من سوچن جَت ءُ آئی ءِ جان ءِ واک شُت گڑا ما بچک زُرت ءُ وارڈ ءَ بُرت داں بچک بے ھوش بوت ءُ ما تھت ءِ سر ءَ واپ اینت”.
مئے پُشت ءَ ڈاکٹر ھم آھت ءُ نادراہ ئِے چار اِت ءُ پائل ءِ تہ ءَ درمان ئِے نبشتہ کرت، من جھل ءَ آھت آں داں جنک ءُ کماش دوئیں نشتگ اِت اَنت، من ءَ کماش ءَ جست کرت” بیٹا تو بلوچے ئے؟”
جی ھو ابا من بلوچے آں”
کماش ءِ گپ در نیات کہ جنک ءَ گوشت” منی براس ءِ ھیال ءَ بدار کہ کدی تھنا نہ بوتگ، باریں چون بیت”.
من گوشت” نا شما ھچ پریشان مہ بہ اِت انچوش بہ پھم اِت آسپ( بجک ءِ نام اِنت) منی براس اِنت”.
شر تئی منتوار ایں اگاں منی براس بے وار بوت گڑا الم مارا ھال بہ دے یا گوما پون ءَ کمو گپ ئِے داریں “.
من گوشت” جی الم شمارا ھال دے آں بلے پون ءَ گپ دارینت نہ کن آں کہ موکل نیست”.
، ھمے وھد ءَ کماش ءَ من ءَ وتی لمبر دات ءُ گوشت” اے منی لمبر اِنت من ءَ مسکالے بہ دے دانکہ تئی لمبر منی کر ءَ بئیت، گوں ترا گپ کن ایں اگاں وڑ بوت گڑا مارا ھم گپ ئِے داریں کہ ما سک پریشان بہ ایں”.
کماش ءِ لمبر چوناھا پائل ءِ تہ ءَ درپ اَت بلے من کماش ءِ ھاتر ءَ زُرت ءُ مسکالے دات، روگ ءِ وھد ءَ جنک ءَ بچکند ءُ گوشت” بلے من ترا وتی براس ءِ بارو ءَ باز کلوہ نہ دے آں”.
من ھم کند اِت ءُ گوشت” من ھم باز کلوہ زورگ نہ لوٹ آں پرچا کہ باز کلو گوں من بَڈ نہ بیت”.
آئی ءَ کند اِت ءُ گوشت” اللہ ھاپز”
من ھم گوشت” اللہ ءِ باھوٹ اِت”.
آ گاڑی ءَ سوار بوت اَنت ءُ چَہ چماں اندیم بوت اَنت
روان اِنت