گُڈّی مِنزل ۔ مولا بخش رئیسی ۔ دومی در ۔ (سبزیں جنک ) 1۔
گُڈّی مِنزل
مولابخش رئیسی
دومی در ( سبزیں جنک ) 1
من ریل گاڑی ءِ سُھر رنگیں اوتاگ ءَ مان بیتاں ، اوتاگ ءَ بازیں مھلوکے ھست ات ۔ ریل گاڑی ءِ دومی سیٹّ کش ات ، بزاں دیر ءَ ات نی من پیداگاں ۔ ریل گاڑی ءِ گام تْرندتر بیان ات انت ، منی چمّ ھما چار موٹیں مُلّا ءِ سر ءَ کپت انت ، گپڑّے مردم ئِے مُچّ کتگ ات ءُ شش نمبر ءَ بیان کنگ ءَ ات ۔ مُلّا ءِ چَمّ منی سر ءَ کپت انت : مردماں کیامت ءِ مزنیں نشانیاں یکےّ وَ ھمیش انت کہ مردیں ھم وتی سر ءَ یکّ مُٹّ کنگ ءَ انت ، مردم نزانت اے جنین انت یا مردین انت ، دگہ مزنیں نشانی ے وَ آ انت ، تُوبّہ انت ھُدا ءِ ، بچارات وتی جوجُکاں کشّ انت مردمانی دیم ءَ چُکّ ءَ میچین انت ۔ من ءَ کندگ ءَ گپت ، وتی دل ءَ گْوشت اوں مُلّا تر ءَ تُوراش کُشات ، تو من ءُ بیچارگیں جنین بوٹاگ کُتگ ، بلے من ھم تر ءَ چاراں ۔ دیم تر ءَ شُتاں جنینے کہ گْوَرئِے کشتگ ات ءُ چُکّ ءَ میچینگ ءَ ات ، من کہ آ دیت وتی مات ءِ یاد ءَ کپتاں کہ کسانی ءَ منی مات ءَ ھم انچوش من ءَ میچینتگ ۔ آ دیم تر ءَ شُتاں یک کُرشی ے ءِ سر ءَ نشتاں ، لھتے بیّلیں جنین نشتگ ات ( بیلّ ھند و ) من ءَ انچوش بیت اے اوتاگ منی وڑ ءَ نہ انت ۔ اوتاگ ءَ دراھیں داب ءِ مردم ھست ات ، بید ء ھما زاگُل چمیں جنک ءَ ۔ ملّایا وتی واز ھلاس کُت ءُ دیم پہ من پیداگ ات ۔ ملّا تئی اولی ڈیک ورگ ءَ گوں منی زند تو ابیتکیانی آماچ کُت ۔ من چے کُت ؟ ! ۔ زاگُل چمّ تو بْراھینت ۔ کجام زاگُل چَمّ ، جنینے ؟ ۔ جنینے ات نی وَ تئی ٹیلگاں بیت ءُ شُت ۔ کجا شُت ؟ ۔ ملّا من زانتیں کجا شُتگ ، من در گیتکگ ات ۔ پریشاں مبی درکیت ۔ کجا در کیت ، بلے پد ءَ ھم اے ریل گاڑی ءِ تہ ءَ من شوھاز کناں بلکیں بہ گندان ئِے ، ھاں ملّا بزاں کیامت ءِ یک نشانی ے مناں ۔ اُڑ ئے لالو تو منی گپّانی سر ءَ زھر گپتگ ئے ؟ ۔ نہ نہ ، من پر چہ زھر بہ گراں تو وتی ھیال منی بارو ءَ درشان کُت ، بلے آ جنین ءِ بارو ءَ تو شَرّ گپّ نہ کُت ۔ اُڑ ئے گُناہ انت ، مردمانی دیم ءَ جوجکاں ڈَ ن ءَ کن انت چُکّْ میچین انت ، مردم دگہ دابے بیت ندر اوں ۔ مُلّا من اے جنین ءِ جوجُک دیت انت ، وتی مات ءِ تْرانگ ءَ کپتاں ، من دگہ داب نہ بیتاں باریں ۔ من ءَ گوں ایشی ءَ کارے نیست تر ءَ ھِچّ نہ بیتگ ، من ھمینچک گْوشاں اے سر ءِ ڈَنّ ءَ کنگ جوجُکانی ڈَنّ ءَ کنگ چُکّ ءِ میچینگ گناہ انت ۔ مُلا جان تو نشتگ ئے من آدگہ اوتاگاں تُرّے وراں چاراں بلکیں پد ءَ اتکاں ۔ اُڑ ئے کجا رو ئے ، بہ نند گپّے کن ایں ۔ نہ نہ ، من پیشی گومازاں گریزیگاں تو پد ءَ گومازی نگن پتکگ ، تو واز کن ، من تَرّ ءُ تابے کناں ۔ من چارموٹیں ملّا کِرّ ءَ چے پاد اتکاں دگہ اوتاگے ءِ نیمگ ءَ شُتاں ۔ یکےّ ءَ گٹارے گون ات جنگ ءَ ات ئِے ، یکے ءَ باجہ ءَ گون ات گلائیش ات ، چیزے ورناھیں جنکاں کینکانچ ات ، یک سبزیں جنکے دریگ ءِ دیم ءَ نشتگ ات ، مود ئِے گْوات ءَ گون ات انت ، ڈَنّ ءِ ندارگ ءَ چارگ ءَ ات ، سبزگ ءُ وش چیدگیں جنکے ات ، من وتی دل ءَ گْوشت تئی جاہ ھمے اوتاگ ءَ انت ، ملّا یا منی زند ابیتک کُت ۔ اے اوتاگ ءَ گندگ ءَ گیشتر آزات ھیالیں مردم ات انت ۔ من ھم کُرشی ے ءِ سر ءَ نشتاں ، کافکا ءِ کتاب “” بیران “” ءِ وانگ ءَ لَگ اتاں ۔ منی ھیال کتاب ءِ نیمگ ءَ ات , ورنائیں جنکے گوں گٹار ءَ وشّیں سازے چیڑگ ءَ ات ۔ من کتا ب ءِ تہ ءَ اتاں یک وھدے گنداں ریل گاڑی ءِ گام سُست تر بیان بیت انت ، منی ھیال ریل گاڑی ءِ نیمگ ءَ شُت کہ دارگ ءَ ات ، من دریگ ءَ چے سر ڈَنّ ءَ کشّ ات ، ندارگ ءَ چارگ ءَ اتاں ریل گاڑی وتی اوشتنجاہ ءَ اوشتات ۔ مئی کش ءِ اوتاگ ءَ لھتے بیلّیں جنین چہ ریل گاڑی ءَ ایر کپت انت ، کسا نُکیں بچکے کوکّار ءَ ات بیاات کپلی چا انت ، بیاات گرم ءُ لھڑیں چاانت ، بیاات کپلی چاانت ۔ من بچک توار کُت : بچہ بیا من ءَ چاے دئے ۔ سبزگیں جنک چہ وتی جاہ ءَ پاد اتک ، وش کَدّ ءُ بالادیں جنکے ات ، سیاہ ءُ ھُماریں چَمّ ، دُکّانیں گْورئِے چو گْوش ئیگاں تراس گپتگیں سیسیگے ءَ ھنزار ءَ ات انت ، سرین ئِے چو لکُڑی گْومز ءِ میان ءَ بارگ ات ، انچوش بارگ ءَ ات کہ من پگر کُت سھت نہ سھتے پْرشیت ۔ ھر چیز ئِے بے درورات ، منی کش ءَ گْوست ءُ چہ ریل گاڑی ءَ ایر کپت دیم پہ اوشتنجاہ ءِ در کپگ ءِ دروازگ ءِ نیمگ ءَ شُت ءُ چہ دروازگ ءَ در اتک ، من سھتُکے پگر کُت ھُدا ءَ گوں وتی دستاں تراشتگ ات ، یک در جھانی ازمی ساچشتے ات ۔ من دل ءَ گْوشت اے وَ شُت ۔ بیا ناکو چا انت ، اُو ناکو تو کُجائے ؟ ، تئی ھیال کجانگرانت ، بیا تئی چا انت ۔ زَرئِے چینچُک انت ؟ ۔ ناکو دہ کلدار ۔ دہ کلدار ؟ ! ۔ گران نہ انت ؟ ۔ نہ ناکو اے کپلی چا انت ، چوشیں چا تو پیسر ءَ نہ وارتگ ناکو ۔ بچہ من ءَ ناکو مہ گْوش منی دل ایر رچیت ۔ شرّ ناکو تر ءَ دگہ رندے ناکو نہ گْوشاں ، بچک ءَ پد ءَ من ءَ ناکو گْوشت ٹھکے دات ئِے ، رَوَگ ءَ لَگّ ات ، بیاات کپلی چاانت بیاات گرمیں چاانت ۔ من وتی دلگوش پد ءَ ریل گاڑی ءِ اوشتنجاہ ءِ نیمگ ءَ گْور کُت لھتے دگہ جنین ریل گاڑی ءَ سر کپت انت ۔ ریل گاڑی ءَ سیٹّے کشّ ات ، مردماں ڈاہ دیگ ءَ ات کہ من رَوَگ ءَ یاں ، دگہ کسّے نہ ایر کپت ءُ نہ دگہ کسّے سر کپت ۔ ریل گاڑی ءَ پد ءَ سیٹّے کَشّ ات ءُ لَھم لَھمک ءَ رَوَگ ءَ لگّ ات ۔ کم کم ءَ ریل گاڑی ءِ گام تْرند تر بیت انت ۔ من انگت چہ دریگ ءَ ڈَنّ ءَ چارگ ءَ اتاں ۔ من اجکّہ کنوکیں چیزے دیت ، جنک ریل گاڑی ءِ اوشتنجاہ ءِ دروازگ ءَ پُترات ءُ دیم پہ ریل گاڑی ءَ تچان ءَ پیداگ ات ، گاڑی ھم تْرندتر روان ات ۔ من چہ وتی جاہ ءَ پاد اتکاں دیم پہ اوتاگ ءِ دروازگ ءِ نیمگ ءَ در ئِے نزیک کُتگ ات من دست آئی ءِ نیمگ ءَ شھارت ، اول ءَ ھز ئِے کُت ءُ بلے ناچار ی ءَ منی دست ئِے گپت من سرگیتک ریل گاڑی ءِ سر ءَ ۔ ھمود ءَ نشت ءُ دَھَنُسک جنگ ءَ ات ، دَم ئِے بُرتگ ات ۔ اُو مُٹی ، اُو مُٹی ۔ توار چہ در گْور ءَ پیداگ ات ، پد ءَ ڈنّ ءِ نیمگ ءَ سر اوں کَشّ ات ، گِنداں ھما چار موٹیں مُلّا انت دْرّک ءَ دیم پہ ریل گاڑی ءَ آ ھم مئی اوتاگ ءِ نیمگ ءَ دْرّک ءَ پیداگت ۔ منی دست ءَ گِر ۔ تو کجا م جھندم ءَ بیتگ ئے مُلّا ، تر ءَ ٹوپے بہ لَگّات ، بیا زیت کن ، بیا گرک بی ۔ مُلّا ھم من ریل گاڑی ءَ سر گیتک ۔ مُلّا ھم یہ کِرّے نشت ءُ دست ئِے سر ءَ داشت انت ۔ مُلّا یا دمے ساسارت ، اے نیمگ ءُ آ نیمگ ءَ چارگ ءَ لَگّ ات ۔ رنگ ئِے بِر گشت ۔ سر دریں جنک بُژ بلانژیں بچک ءُ گٹار ءُ ڈُھل ءُ دگہ بازیں سازے مئی اوتاگ ءِ نشتگیں مردماں گون ات ۔ یکبر ءَ چمّ ئے سبزگیں جنک ءِ سر ءَ کپت انت ، ھُشک بیت ، چمّ ئِے سبزگیں جنک ءِ سر ءَ سَکّ ات انت ، من شھکارگے جت ، مُلّا منی نیمگ ءَ چارگ ءَ لَگّ ات ۔ ھچ ئِے نہ گْوشت ۔ سبزگیں جنک چہ وتی جاہ ءَ پاد اتک شُت ھما دریگ ءِ دیم ءَ نشت ، منی نیمگ ءَ چمّے شانک ئِے دات ، پد ءَ ڈَنّ ءَ چارگ ءَ لَگّ ات ۔ مُٹّی ، نہ جنین نہ مردین ۔ من ٹھک دات کند ات ۔ اوتاگ ءِ مردم مئی نیمگ ءَ چارگ ءَ لَگّ ات انت ۔ تو من ءَ گْوشت تر ءَ ٹوپے بہ لَگّات ؟ ، تو زان ئے من مزنیں مُلّا ے یاں ۔ من پد ءَ ٹھک دات کند ات ۔ بیا بیا منی گْور ءَ بہ نند ، بیا اے کُرشی ءِ سر ءَ بہ نند ۔ مُلّا ءِ چمّ ترّان ات انت ۔ من اے اوتاگ ءَ نشت نہ کناں ۔ پرچہ ؟ ۔ اے وَ بیرگیں جھندم انت ، جنکانی پچیں جیگ ءُ پد ءَ آئی ءَ سر ءَ سگریٹ ءِ ھم کَشّگ ، نہ نہ من اد ءَ نشت نہ کناں ، تو گوں من بیا ۔ مُلّا جان منی جاہ ھمدان انت ۔ تو وَ ھؤ ، تو پیسر ءَ زاگُل چمےّ ءِ شوھاز ءَ ات ئے ۔ من انگت شوھاز ءَ یاں ، ملّا تر ءَ تور اش کُشات ، تو زا گُل چمّ براھینت ۔ من چے کُت ، من زاگُل چمّے ندیتگ ۔ تو کاگد من ءَ نہ دات پہ ونگ ءَ ؟ ۔ گُڑ ا ؟ ۔ کاگد ءِ وانگ ءَ چانک بیتاں ، وھدے تو شُت ئے چہ آئی ءَ نشانے ھم پشت نہ کپتگ ات ۔ گُڑ ا ، من تاچینت ؟ ، آ کسّے کہ تر ءَ لوٹ ایت ، پہ یک کاگدے ءِ چارگ ءَ نہ رؤت سُنٹُک ، دگرے شوھاز کن ندر اوں ۔ ملّا ءِ گپّ منی دل ءَ نشت ، یک جھانے مُلّا راست گوشگ ءَ ات ۔ من گُڑ ا شُتاں ۔ ملّا ھمد ءَ بہ دار گانا ماناے گوش داریں ۔ کَمبہ ساز ءِ گوش دارگ گناہ انت ، من شُتاں ، زندگ بئیں گندگ بئیں ۔ ملّا دیم پہ وتی اوتاگ ءَ شُت ، من لوٹ ات سگریٹے روک بہ کناں ، من ءَ باکس گون نیست ات ، من نوکی دلمانگ اتاں پہ باکس ءَ کسّے ءَ جُست بہ کناں ، سبزگیں جنک ءَ بزاں زانت من ءَ باکس گون نیست انت چہ وتی جاہ ءَ پاد اتک ءُ باکس ئِے آس دات ءُ منی سگریٹ ئِے روک کُت ءُ منی کش ءَ نشت ۔ من دگہ دابے بیتاں من ءَ ھِژمے ءَ گپت ، اے دست ءَ گوں تراشتگیں بالاد ، اے ھُورانی چید گ منی کَش ءَ نشتگ ات ۔ تو ھِژم گپتگ ئے ۔ راستیں ھؤ ، منی جان لرزگ ءَ انت ۔ پر چہ ؟ ، زاناں پیسر ءَ ھچ جنکے تئی کش ءَ نہ نشتگ ؟ ۔ نشتگ ۔ گُڑ ا ، منی کَش ءِ نندگ ءَ تو ھژم گپتگ ئے ۔ بس جُست مکن ۔ منی تئی منّہ واراں تو منی دست گپت ریل گاڑی ءَ سر گیتک ، من ءَ المّ ءَ رسگی انت ، یا نہ اے کارے کہ من ءَ رستگ ، چہ منی دست ءَ رؤت ۔ لوٹ ئے کار بہ کن ئے ؟ ۔ ھؤ بے کار ءَ ھم بیت ؟ ۔ مروچاں ھر کس گیش وت نہ بیت ۔ راست گوش ئے ۔ تو چے گنگ ئے ؟ ۔ دبئی ءَ بیتگاں ، اے سَھت ءَ بیکاراں ۔ من تئی جند دیت ، تئی بستگیں مود دیست انت ، من زانت تو دگہ دابیں مردمے ئے ۔ ھؤ راست گوش ئے من دگہ دابیں مردمے یاں ، بلے دگہ داب پگر کناں ۔ آ ملّا کے ات ، تئی سنگت ات ؟ ۔ نہ منی سنگت نہ انت ، دلمانگ انت سنگت بہ بیت ۔ ملّا تئی دابیں ، آزات ھیالیں مردم ءِ سنگت چتور بیت کنت ؟ ۔ من ھر دابیں مردماں گوں پَئیم باں ۔ ھؤ ما گوں ھر دابیں مردماں پئیم بَئیں ، مردم گوں ما پئیم نہ بنت ۔ ھؤ راست گْوش ئے ۔ بیا اینگو ۔ ملّا من ءَ توار ءَ ات ، ھَنّی کایاں ۔ ھاں ، مُلّا تو من ءَ توار ءَ ئے ؟ ۔ بیا مئی اوتاگ ءَ من تھنایاں ، من ءَ وشّ نہ بیگ ءَ انت ۔ من پیشی گومازاں گریزیگاں ، تو پد ءَ گومازی نگن پتکگ ، من ٹھک دات کند ات ۔ تو اڑ ئے بیا گرک بی ۔ مُلّا تو واز ماز بکن دلگوش بئے من ءَ چے کن ئے ؟ ، بچار آ بَزّگ اتکگ منی گْور ءَ نشتگ ۔ رند ءَ کائے؟ ۔ ھؤ کایاں ۔ مُلّا یا پُشت مان دات شُت ۔ من پد ءَ سبزگ ءِ گْور ءَ نشتاں ۔ مُلّا سَکّ سِلّ تئی رند ءَ کپتگ ۔ باریں ، من وت ھم نہ زاناں ۔ راست بہ گْوش تئی مُلّا ءِ راز چی انت ؟ ۔ ھاھاھاھا ۔ پر چہ کند گ ءَ ئے ؟ ۔ تو مُلّا یا سوچ جنک ءَ گوش دار وشّیں گاناے جنگ انت ۔ جنک ءَ بِلّ بہ گْوش ، تئی ءُ مُلّا ءِ کسّہ چی انت ؟ ۔ شرّ گْوَشاں ۔ شاباش شرّیں چُکّ ۔ من دو سگریٹ کشّ ات ءُ آس دات انت ، یکّے سبزگ اوں دات ءُ دگرے وت اوں زُرت ۔ مُلّا من ریل گاڑی ءِ اوشتنجاہ دیت ، اولی رند ءَ گْوشگ ءَ یاں ، من ھمے ریل گاڑی ءِ ودار ءَ نشتگ اتاں ، جنکے منی دیم پہ دیم ءَ نشتگ ات ، دَبوکہ ئِے جتگ ات ، بلے زاُگلیں چمّ ئِے گیشّتگ ات انت ءُ روک روک ءَ من ءَ چارگ ءَ ات ۔ دیم ئِے پچ کت ، من ءَ انچوش بیت ھدایا گوں وتی دستاں تراشتگ ات ، اسپیت چو ھَکئیم ءَ ات ، من ءَ لبز نیست کہ آئی ءِ وَرّمی ءَ گوں ھما لبزاں بہ ساڑ ءَ یاں ۔ من وَ ھور نہ دیتگ انت ، بلے منی ھیال ءَ ھُورانی وَرّمی ءَ اے جنک ءِ دیم ءَ گُوہ وارتگ ات ، آ تھنا من ءَ چارگ ءَ ات ۔ آئی ءِ نیمگ ءَ چار ات اوں ، منی گپّانی تہ ءَ گارات ، سگریٹ ءَ دست سوتک سِٹّے کُت ئِے ، ھاں باریں تر ءَ چون بیت ؟ ، تر ءَ دلگوش انت سُنٹُک ؟ ۔ ھؤ ، من تئی گپّانی جُھلانکی ءَ بُکّ اتگ اتاں , سگریٹ ءَ منی دست سوتک ۔ ھؤ ، من ھم آئی ءَ چارگ ءَ اتاں ، آ ھم منی نیمگ ءَ چارگ ءَ ات ، یکبر ءَ مُلّا منی دیم ءَ اوشتات ، گْوشت ئِے : اے کاگد ءَ بچار چے نبشتگ ، من کاگد ونت ، مُلّا کہ شُت من سر چست کت کہ جنک ءَ بہ چاراں گِنداں کُرشی ھُورک انت ءُ جنک شُتگ ۔ تو شوھاز کُت ایں ۔ من وتی کُدر کُت ، چہ آئی ءَ ھچ نشانے ھم نیست ات ۔ ھؤ ،، تو وابے ندیتگ ؟ ۔ نہ ، من آگاہ اتاں ۔ بزّگ ۔ ھؤ شُت ، من نہ گْوشاں مُلّا میاریگ انت ، بلکیں ۔ ۔ ۔ ۔ بلکیں چے ؟ ۔ من گْوشاں مُلّا منی دیم ءَ مہ اوشتات ایں ، بلکیں من دیتگ ات کُجا شُت ؟ ۔ شموش ئِے ، کسّے کہ شُتگ ، آئی ءَ یاد مکن ، کسّے کہ ھست انت دلگوش ءَ گوں ھمائی ءَ کن ۔ کے ھست انت ؟ ۔ ھست انت ، دل ءِ چَمّاں پچ کن ۔ دل ءِ چَمّاں ، ھَؤ دل ءِ چَمّ پچ کنگ لو ٹ انت ۔ آ دیم تر ءَ مئی اوتاگ ءِ دگہ لھتے ساز جنگ ءَ ات ، ما ھما ساز ءَ دلگوش بیت ایں ۔ آ کَشُکائی من ءَ چارگ ءَ ات ، بلے من ءَ لَجّ بیگ ءَ ات من آئی ءَ بہ چاراں ۔ من آئی ءِ گپّانی تْرانگ ءَ کپتاں ” کسّے کہ شُتگ آئی ءَ یاد مکن ، کسّے کہ ھست انت دلگوش ءَ گوں ھمائی ءَ کن ۔ ساز جنگ بند بیت ۔ تو کتابے وانگ ءَ ات ئے ؟ ۔ ھؤ کافکا ءِ کتاب ات “” بیران “” ( The Metamorphosis) ۔ تو کافکا وان ئے ؟ ۔ ھؤ من ءَ کافکا دوست بیت ۔ کافکا ءِ دْراھیں کتاب من ونتگ انت ، داں اد ءَ کہ کافکا ءَ یک زنڈیں کتابے ھست انت “” فلیسہ ءِ سر ءَ نبشتگیں نمدی “” من آ ھم ونتگ ۔ تو وَ ھِچّ نہ اشتگ ۔ ھؤ کافکا منی دلدوستیں ندکارانت ، ھاں ھاں ، تو کافکا ءِ ھمے بیران ءِ سر ءِ نگد ونتگ ؟ ، کہ ولادیمیر ناباکوف ءَ ( Vladimir Nabokov ) نبشتگ ۔ نہ من نہ ونتگ ۔ تو گُڑ ا پشت کپتگ ئے ۔ منی گْور ءَ ایر انت ، بلے من انگت نہ ونتگ ۔ تو بوف کور ونتگ ؟ ۔ صادق ھدایت ءِ ؟ ۔ ھؤ ھؤ صادق ھدایت ءِ ۔ من بلوچی ءَ رجانک کُتگ ۔ چَمّ ئِے چہ ھئیرانی ءَ رُژنا بیت انت ۔ بلوچی ءَ ، بلوچی ءَ ؟ ! ۔ ھؤ بلوچی ءَ ۔ چاپ بیتگ کتابی دروشم ءَ ؟ ۔ نہ انگت چاپ نہ بیتگ ۔ نی تھار بیان انت ۔ ھؤ نی تھار بیان انت ۔ سنگت دراہ بے توار بیت انت ۔ ھؤ بے توارانت ، جنک سگریٹ کَشّگ ءَ انت ، مردیں ھم ژند پند انت ۔ کمّے آ دیم تر ءَ جنکے بچکے لُنٹ پہ لُنٹ ات انت ، بچک ءِ دست جنک ءِ جیگ ءِ تہ ءَ ات ۔ سبزگ ءِ ھم دلگوش ھما نیمگ ءَ گْور بیت ۔ وَ ئے اشاں چار ، کم بھتاں وت ءَ کمّے اندیم بہ کن ات شمارا ٹوپ لَگّات ۔ بِلّ اش ، آزات انت ، یک داناگے گْوش ایت “” اے مہ چار تئی زندگی ءَ چینچو وھد پشت کپتگ ، ایشی ءَ بہ چار اے پشت کپتگیں وھدانی تہ ءَ چینچو زندگی مان انت ۔ واہ تر ءَ ۔ منّہ وار ۔ ریل گاڑی ءَ سیٹّے کَشّ ات ۔ نی پھک ءَ تھار بیتگ ات ۔ جنکے ءَ گٹار چست کُت ءُ گانا جنگ ءَ لَگ ات “” اپنے مرزی کے کھاں اپنے سفر کہ ھم ھیں “” سبزگ ءَ جاک کُت “” واہ تر ءَ جنک بجن تئی جنگ ءِ روچ انت ۔ تر ءَ چے بیت سُنٹُک ؟ ۔ من ءَ جگجیت ءِ جتگیں اے دستونک سَکّ دوست بیت ۔ ھؤ ، باز وشّ انت ۔ ھؤ یار ھمے ھبر ءِ سر ءَ سگریٹے بہ بیت ؟ ۔ بلکل بہ بیت ، شرّیں وتی نام ءَ من ءَ بہ گْوش ۔ ماھکان ۔ واہ ماھکان ، واہ تر ءَ ۔ مھربانی ، تر ءَ دوست بیت ماھکانیں نام ؟ ۔ زان ئے اگاں تئی نام دگرے بیت ایں ، تر ءَ نہ لَگّ اتگ ات ۔ مھربانی ، دیم ئِے جنک ءِ نیمگ ءَ کُت “” ونس مور ، پد ءَ یک رندے ۔ جنک پد ءَ ھمے دستونک ءِ جنگ ءَ لَگّ ات ۔ دست ئِے منی دست ءِ سر ءَ ایر کُت ، منی جان ءِ پُٹ لِکّ بیت انت ، ھژمے ءَ منی سر ءَ مانشانت ۔ دل ءِ تہ ءَ چہ گل ءَ بال اتاں ، آ دستونک ءِ جُھلانکی ءَ اوژناگ گران ات ، من آئی ءِ مھر ءِ گرمی ءَ اِئید ایر ریچ اتاں ، یک نوکیں ساچے ات ، زندگی چہ سر بُنگیج بیتگ ات ۔ نہ زمین ءَ اتاں نہ آزمان ءَ ، ھیالانی لُنجمیں زر ءَ اوژناگ ءَ اتاں ۔ جنک ءَ دستونک جنگ بند کُت ۔ گاڑی ءِ رواج سُست بیان ات انت ، گاڑی ءَ سیٹّے جت ، لھم لھمک ءَ اوشتات ۔ مئی اوتاگ ءِ مردم ایر کپان بیت انت ، من ءُ ماھکان ءُ دگہ یکّے کہ سازانی بُنپان ات اوتاگ ءَ اتیں ۔ من ایر کپاں ، شامے چاراں ، بیا بریں من تھنایاں ۔ من ءُ ماھکان ھم ایر کپت ایں ، ریل گاڑی ءِ اوشتنجاہ ءَ تھنا مئی ریل گاڑی ءِ مساپر البت چیزے ایر کپتگ ات انت ۔ مئی اوتاگ ءِ مردم ھم ٹیلہ والا ے ءِ چار دؤر ءَ اوشتاتگ ات انت ءُ شام ورگ ءَ ات انت ۔ بیاات گوں ما شام ورات ۔ نہ مھربانی ، ماھکان ءَ دگہ کارے ھست انت ۔ تو راست گْوشت من ءَ کارے ھست انت ۔ راست گْوش ئے ؟ ۔ ھؤ ، من پسیل ءَ رواں تو ھم بیا پسیل ءِ دپ ءَ اوشت ۔ من ءَ لَجّ کنت پسیل ءِ دپ ءِ اوشتگ ءَ ۔ من ءَ ترسیت ۔ من ناکامیں دلے گْوشت : شرّ ۔ ما دیم پہ پسیل ءَ شُت ایں ، پسیل تھاریں جاھے ءَ ات ، کس نیست ات ۔ ماھکان ءَ سریگ چہ سر ءَ کَشّ ات دات من ءَ ۔ بیا سُنٹُک منی سریگ دار ، دگہ چے دردے ورئے ، بچکندے جت ئِے ۔ من آئی ءَ دکانیں گْوراں چارگ ءَ اتاں ، گْوش ئیگاں چو دام شاپ بیتگیں سیسیگ ءَ پہ ھنزار کنگ ءَ ساڑی اتاں ءُ تراشتگیں بالاد ئِے گْوش ئیگاں میکلانژ ءَ گوں وتی ازمگریں دستاں تْراشتگ ات ۔ ھاں چے چارگ ءَ ئے ؟ ۔ میکلانژ ءِ دست ءِ تْراشتگیں بُت ءَ چارگ ءَ یاں ۔ بچکندگے جت ئِے پسیل ءَ پُترت ۔ ٹیلہ والایا بلوچی سوتے عارف ءِ توار ءَ پر کُت “” زیبائیں شپے گُل ھم در اتکگ شپ ءِ نیم ءَ ………. ریٹائیں دل ءِ ھُلّ ھم در اتکگ شپ ءِ نیم ءَ ۔ یک وھدے گِنداں مُلّا میدان ءَ دیم پہ پسیل ءَ پیداگ انت ۔ ھاں مُلّا تر ءَ چے بیت ؟ ۔ اڑ ئے من واب کپتگاں منی نماز کزا بیتگ ، من دز نمازے گْراں وتی کزائی نماز ءَ کناں ۔ ھؤ ، بلہ کمّے دار بانُک در کیت ۔ شرّ ، من کمّے آ نگُشتر اوشتاں بانُک پسیل ءَ انت ۔ مُلّا کمّے آ دیم تر اوشتات ۔ بانُک چہ پسیل ءَ در اتک ۔ منی سریگ ءَ بہ دئے ۔ چَکّ ئِے مُلّا ءِ نیمگ ءَ تَرینت ۔ مُلّا بلکیں وامداراں گَٹّ کُتگ ۔ ھؤ گندگ ءَ انچوش انت ۔ تو پد ءَ من ءَ چارگ ءَ ئے ، یک وھدے من ءَ چمّ نہ کن ئے ۔ منی چمّ نہ گرانت ۔ ھؤ تئی چمّ نہ گرانت ، بریں چیزے ورایں ۔ بریں ۔ ما دیم پہ ٹیلہ والا ءَ شُت ایں ، مئی اوتاگ ءِ مردم انگت نشتگ ات انت ۔ ناکو ، عارف بلوچ ءِ ھما سَوت ءَ پد ءَ پر کن ۔ ھما گُل محمد وپا ءِ پربند ءَ ؟ ۔ جی جی ، تر ءَ دوست بیت ؟ ۔ جی سَکّ باز ۔ شیتان ۔ ماھکان ءَ گوں بچکندگے من ءَ گْوشت ۔ ٹیلہ والا ءَ عارف ءِ سَوْت پد ءَ پر کُت ۔ مارا چیزے دئے ما شُدیگیں ۔ جی واجہ ، چے لوٹ ئے ؟ ۔ من کہ گوژد نہ وراں ۔ من ھم گوشت نہ وراں ۔ شر واجہ ۔ مئی اوتاگ ءِ یک مردمے کہ تبلہ جت ات ئِے وتی سنگتانی دست ئِے گپت انت ءُ شُت ۔ ملّا دْرکّ ءَ پیداگ ات ۔ ھاں مُلّا تو چے ورئے ؟ ۔ من شام نہ کناں ، من نمازے کناں رند ءَ گاڑی چُٹّ ایت ۔ ھؤ مّلّا جان شرّانت ۔ ریل گاڑی ءَ اولی سیٹّ کَشّ ات ، مئی اوتاگ ءِ مردم دیم پہ ریل گاڑی ءَ شُت انت ۔ مارا نوکی ٹیلہ والا ءَ ورگ داتگ ، ما ھم اشتاپی ءَ ورگ ورگ ءَ اتیں ۔ ریل گاڑی ءَ دومی سیٹّ کشّ ات ۔ ماھکان نی گاڑی رؤت ۔ انگت اوشتاتگ روگ ءَ لَگّ ایت ، سر کپ ایں ۔ مُلّا پہ دْرکّ ءَ دیم پہ ریل گاڑی ءَ روگ ءَ ات ۔ بہ تچ مُلّا پشت نہ کپ ئے ۔ تر ءَ سوچ ، تو منی گُور ءَ نیائے ۔ مُلّا تئی دیم شر تر انت یا اے سُنٹُک ءِ ؟ ۔ تر ءَ رَپَل پْروشات ۔ ماھکان ءَ بچکندگے جت ۔ پر چہ مُلّا یا نیل ئے بیچارگ ءَ ۔ گوں مُلّایا گپ رپ کناں ، اے مُلّا دل ءَ نیارایت ۔ ھؤ مُلّا تو رامگ کُتگ ۔ ھاھاھاھاھا ۔ ۔ ۔ ۔ ۔ ۔ چو تئیگ ءَ ۔ من انگت رامگ نیاں ۔ رامگی ءَ تئی بند نوک انت ، سُنٹُک ۔ ماھکان ءَ چہ لَجّ ءَ وتی سر جھل کُت ۔ ریل گاڑی ءَ سیمی سیٹّ جت ءُ روگ ءَ لَگّ ات ۔ بیا بریں ، من پاد اتکاں دیم پہ ریل گاڑی ءَ شُتاں ، من سر کپتاں ، ماھکان ءِ د ست اوں گپت سر گیتک ریل گاڑی ءَ ، یکبر ءَ سینگ ئِے گوں منی سینگ ءَ لَگّ ات ۔ دگہ دابیں چاڑے پہ من ءَ ودی بیت ، من وتی دل ءِ تہ ءَ گْوشت : گلباگ چہ اے دمان ءَ کہ آئی ءِ دُکّانیں گْوراں گوں منی سینگ ءَ جنگ وارتگ ات ، شرتر نہ انت ۔ گلباگ وَ ھمیش انت ۔ گوں منی سینگ ءَ لِچّ اتگ ات ۔ چوشیں نرمیں بدن ، نرم چو کرپاس ءَ ات ۔ یکبر ءَ دیر اتک ۔ تر ءَ ھم وش نہ بیت گند ئے ؟ ، مَڑاہ مکن دگہ چے لوٹ ئے ؟ ۔ دل وَ باز لوٹ ایت ، بلے پہ دلکش کزور کندھار نہ بیت ۔ ماھکان ءَ سر جھل کُت شُت وتی پیسریگیں جاہ ءَ ھما تاک ءِ دیم ءَ نشت ۔ ریل گاڑی تْرندتر روان بیت ۔ ھر کس وتی جاہ ءَ نشتگ ات ۔ شپ ات ، ریل گاڑی شپ ءِ دل ءَ دِران ات ءُ روان ات ، چہ مئی اوتاگ ءَ ، یکّے ایر کپتگ ات ۔ مئی سپر جُنزان ات ۔ جنکے ءَ گٹار چست کُت ءُ سازے ءِ چیڑینگ ءَ لَگّ ات ۔ من ماھکان ءِ نیمگ ءَ چارات ، انگت کندگ ءَ ات ۔ من سر سْرینت کہ بیا ۔ سر ئِے سْرینت کہ نہ ۔ من پد ءَ سر سْرینت کہ بیا ۔ پاد اتک منی کَش ءَ نشت ۔ من وتی دست آئی ءِ دست ءِ سر ءَ ایر کُت ۔ تر ءَ سگریٹ گون انت ؟ ، اے ساز ءِ سر ءَ سگریٹے بہ لَگّ ایت ۔ ھؤ سکّ وش بیت ۔ من دو سگریٹ آس دات ، یکّے دات اوں ماھکان ءَ ، یکّے وت کشّگ ءَ لَگّ اتاں ۔ جنک ءِ ساز مئی اوتاگ ءَ ملار دْرنزگ ءَ ات ۔ من ءُ ماھکان وَ دگہ دگنیا ے ءَ سر بیتگ اتیں ، من ءُ آ ھَنوش اتیں ، گوں من ڈُکّ اتگ ، آئی ءِ بدن ءِ گرمی ءَ مارگ ءَ اتاں ۔ سر ئِے منی کوپگ ءِ سر ءَ ایر کُت ۔ ریل گاڑی شیلّ کشّان ءَ روگ ءَ ات ۔ اوتاگ بے توارات ، گٹار جنوکیں جنک دریگ ءِ دیم ءَ شُت نشت ، سگریٹ ءَ چرس پُر کنگ ءَ لَگّ ات ۔ سگریٹ ئِے پُرّ کُت ءُ کَشّگ ءَ لَگّ ات ، چرس ءِ بو دْراھیں اوتاگ ءَ شِنگ ات ۔ شمار ءَ بو تَوْرینگ ءَ انت ؟ ۔ نہ نہ ، تو آزات ئے ۔ آئی ءِ سر انگت منی کوپگ ءِ سر ءَ ایرات ۔ مُلّا رست ، جنک ءَ وتی سر چہ منی کوپگ ءَ چست کُت ءُ کمّے گستا تر نشت ۔ بچہ مُٹّی ۔ مُلّا آ دیم ءَ چارگ ءَ لَگّ ات ۔ چرسے ءِ بو نہ انت ؟ ۔ نہ مُلّا چرس کے کشّگ ءَ انت ۔ من نزاناں ، بلے چرس ءِ بو انت ، شرّ بِلّ تو بیا من ءَ کارُکے گوں تو ھست انت ، پاد ءَ ، زیت کن اوڑ ئے ۔ مُلّا تو گوش ئیگاں آس ءِ بَرَگ ءَ اتکگ ئے ۔ برو تر ءَ تئی کاڑ لوٹگ انت ۔ سُچ ۔ من پر چہ بہ سُچاں ۔ گُڑ ا دیت چہ تئی سر ءَ پاد آیگ ءَ انت ۔ شرّیں برو مُلّا ھَئیک ءَ گپتگ ۔ من کندگے جت مُلّا ءِ رند ءَ کپتاں ۔ ھاں مُلّا تو زھم کُتگ ، تر ءَ چون انت ؟ ۔ اوڑ ئے تو ناپگ ءِ گرگ زان ئے ؟ ۔ کئی ناپگ ؟ ۔ منی وتی ناپگ انت ۔ شرّ دل بالک ءَ وپس ۔ ھؤ گُڑ ا تو زان ئے ؟ ۔ ھؤ وپس ، من چاران ئِے ۔ مُلّا دل بالک ءَ وپت ۔ پشک ءَ کَشّ بُرز ءَ ، نہ اُڑ ئے ، اد ءَ من ءَ لَجّ کنت ۔ گڑ ا شرّ تو لَجّ بکن من شُتاں ۔ شر بیا بیا جھندم انت ئِے بُرز ئِے کناں ۔ پشک ئِے لیٹینت ، من ناپگ چارات ۔ مُلّا تو پھک ءَ بے بنُ ئے کمبہ ۔ تر ءَ وللہ ؟ ۔ ھؤ سَک سِلّ کپتگ ۔ یکبر ءَ منی ھیال دروازگ ءِ نیمگ ءَ شُت ، ماھکان اوشتاتگ ءُ مارا چارگ ءَ ات ۔ من سر سُرینت کہ بیا ۔ سر ئِے سُرینت نہ ۔ من مُلّا ءِ ناپگ گپت ۔ مُلّا نی لھم لھمک ءَ پادا ۔ مُلّا پاد اتک نشت ۔ ھُدا تر ءَ ھئیرے بہ دیات کمّے گھترُک بیتاں ، لاپ اوں چو کَؤر ءَ تچگ ءَ ات ۔ مُلّا شریں تو وت ءَ نہ گھینتگ ۔ ماھکان کندگ ءَ لَگّ ات ۔ مبات ئے ھئیرات ، من وت ءَ گَھیناں ۔ ریل گاڑی ءِ سیٹّ ءِ توار پاد اتک ۔ ماھکان ءَ سر سُرینت کہ بیا ۔ شرّ مُلّا گُڑ ا من رواں تر ءَ کارے بیت من ءَ گْوانک کن ۔ شَرّ برو تر ءَ توار ءَ انت ۔ من ءُ ماھکان دست ماں بیت ءُ وتی اوتاگ ءَ شُت ایں ۔ اوتاگ ءَ دْراہ بے توارات انت ، ھریکّے وتی جاہ ءِ سر ءَ نشتگ ات ، من ءُ ماھکان ھم شُت ایں دریگ ءِ دیم ءَ نشت ایں ، ریل گاڑی روان ات ۔ ماھکان اتک گوں من ءَ ڈُکّ ات ، سر ئِے منی سینگ ءِ سر ءَ ایر کُت ءُ وپت ۔ من ھم وتی سر گوں دریگ ءَ تِکو دات ءُ وپتاں ۔ گوں ریل گاڑی ءِ سیٹّ ءِ توار ءَ من آگاہ بیتاں , ماھکان انگت واب ات ، من ھما داب ءَ وت ءَ داشت نہ سُر اتاں کہ ماھکان چہ واب ءَ جَہ مہ سِرّایت ۔ آ واب ات ، بدن ءِ باپ ئِے منی بے اوست ءُ سارتیں جھان ءَ گرمینگ ءَ ات ۔