گپور در ملکی ءِ پربند
داد ءِ شاری ءُ آجز ءِ زیبلُکّ ءِ نام ءَ
او لیمَلو او لیمَلو
او مھبلو او مھبلو
تو شانتلے نَپر بہ کن
کپوت کْوھنیں کاسدے
کپوت پیر ءُ آجز انت
کرناں کاسدی کناں
ءُ سرجناں
برے چو ملا پازل ءَ
من مند ءِ باگیں ڈلسراں روان کتگ
برے آ اِزّت ءَ وتی پہ مھرک ءَ روان کتگ
برے آ مستیں توکل ءَ پہ سمّو ءَ زراں کتگ
کپوت بَزّگ آجز انت
برو تو بامگواھے ءَ
شاری ءَ اوں پاد بہ کن
زیبلک ءَ زیر گوں
باندا بامگواھے ءَ
رویں پَپکّ چینی ءَ
پہ اوسپانی ءَ رویں
َ آ جاڑیں گُوش ءِ ساھگ ءَ دُچار کپ ایں
رویں آ شھر ءَ ناکو ءِ
پَپُک چن ایں
.
اود ءَ وھدے سر بہ اِت
نند اِت امب ءِ ساھگ ءَ
سرد آپ ءِ نیمگ ءَ
کُلی چری چری کن انت
نود سباہ ءِ زیمر ءِ
گوں کندگی ءَ سوھویں
بگوش تو شاری ءَ گلیں
کہ داد مرچاں بے ترا
ابیتکیں گار اِنت جنگل ءَ
سوار اِنت گوات ءِ مرکب ءَ
کلوہ روان گوں دیگر ءَ
تئی نام ءَ لِکّ اِیت تاکے ءَ
گوں سھب ءِ کوش ءَ بال دنت
برے بَجن من مندراں
برے وتی گس ءِ دپ ءَ
یک چیپوے اوں روک کنت
ءُ کْوھنیں اکسے ایر کنت
داد مرچاں بے تب انت
من زاناں گورجتگ تئی
زھیر ءُ زپتیں انگراں
یا نوکیں شاری ءِ گماں
بلے اے راز کیپے ءِ
شیشگے ءَ بند کنت
من وت نہ زاناں پرچے ءَ
چو سنگے ءَ بے ھاجتیں
تلارے مِک انت یکَّش ءَ
من ءَ ھمے گُمان بیت
تئی زھیر ءِ شنگریں
برپ بستگیں گماں
کہ داد مئے وڑی نہ انت
چو بگش تو شاری ءَ
پہ داد ءَ ھالے راہ بدے
یا گواچی یے پہ کور بھائیں زینت ءَ
تو چوش مہ کن
ھما اِنت تو یلہ کتگ
شپکدگ پہ منزل ءَ
گار اِنت ءُ شُھازی انت
تاسیں دید ءِ گندگ ءَ
دْروھاپے ءَ کہ تلوس ایت
کوش ءِ بندیں انگراں
شپ تھارین زندے ءِ
شپ تھاریں زندے ءِ
..
نوں دیما زیبل ءَ بہ کن
بگوش تو چوش زیبل ءَ
مجید دیر انت آجز انت
تئی زھیراں تراولیں
تئی گماں بے موسمیں
برے آ نشتگ جنگلاں
شیشگانی آپ وارت
زھیر کچ ءُ کیل کنت
برے کھیر ءِ بنڈی ءَ
زگالیں دیدگاں وتی
کنت ارجان دوتے ءِ
درد ءُ رنجاں کم کنت
برے موالیں ٹولیاں
شھداں زھر ءُ تام کنت
من انچو مرچاں اشکتہ
کہ مرچاں بھرن ءَ گلیں
زھیر ءُ اَرس ھور کنت
گمانی شیشگیں لداں
چو منجلے ءَ جوش وارت
زر ایت پہ ترا مدام
گوش ایت منی میار چے ؟
گوش ایت منی چے اِنت ھتا؟
بگوش تو اے وڑ ءَ مہ کن
او زیبلک
کلوھاں بند چادر ءَ
کپوتے ءِ گورا بدے
روان بہ کن
اناں.! اے وڑ ءَ مہ کن
کپوت بَزگ آجز انت
کلوھاں گوات ءِ چادر ءَ
بہ بند برز ءَ بال بدے
گوں سھب ءِ سارتیں وشبوھاں
روان بہ کن
بلے تو آجز ءَ کدی
دل ءِ دیار ءَ در مہ کن
دل ءِ دیار ءَ در مہ کن
گپور درملکی