ھدا اوں بے ھدا بوتیں۔ پزل شیر بلوچ
ھدا اوں بے ھدا بوتیں
وتءٓ چے بے سما بوتیں
ھما کہ بوگی اَت بوت
نہ بوتگ بِھ ھما بوتیں
منی ھستیءِ وت کوشی
ترا چو بد وپا بوتیں
نھنگیں ارس ھزّام انت
بھار چم ءِ تھا بوتیں
سپر بے مز نہ اَت انچو
تئی منزل آبلہ بوتیں
تئی گندوکیءٓ چے پد
درھیں دگنیا تباہ بوتیں
منا چنچو کروجاں انت
ھمے گم اوں ترا بوتیں
وتی شوھازءٓ دزموشاں
تئی شوھاز منا بوتیں
مئے مھرانی جَلیں میدان
چو ھونیں کربلا بوتیں
تئی وشبوھیں وابانی
اے کسہ ھر کجا بوتیں
تئی نازبوھیں پیگوراں
منی دل چونڈگءٓ بوتیں
ترا پجا میارتیں من
تئی دروشم وتءٓ بوتیں
تئی ارواھ کُشیں ٹھلاں
مئے دل توسی پدا بوتیں
من شیرءِ گال پیلاشتاں
اگاں اچ وت دگا بوتیں
پزل شیر بلوچ