2021۔ منی یاتانی آزمان ءَ شینک نیست۔
2021۔ منی یاتانی آزمان ءَ شینک نیست۔
(پنجگور مراگش)
چندن ساچ
ایڈوکیٹ منیر احمد کلانچی سپری مردمے، ھر جاھے رؤگی بہ بیت۔ مارا ھم گوں وت بارت۔ پد ءَ سپر ءَ وشیں ھمراھے۔ 2020 ءُ 2021 ءَ گوں ایڈوکیٹ ءَ بازیں سپرے جتگ۔
ایڈوکیٹ ءِ ھمراھی ءَ مارچ ءِ ماہ ءَ سر پنجگور ءَ کپت۔ پنجگور ءَ لبزانکی مراگشے ات۔ پنجگور ءِ ھما اکس کہ پیسر ءَ مارا مردماں پیش داشتگ ات۔ اسل ءَ پنجگور آ رنگ ءَ نہ ات۔ مردمانی پیش داشتگیں اکساں چہ ھمے گُمان بوتگ کہ پنجگور ءِ مردم سکیں بند ذھنیں مردم اَنت۔ بلے وھدے ما کہ پنجگور ءِ ھمے لبزانکی مراگش ءَ بَھر زرت۔ پد ءَ ما دراہ ھیران بوتیں کہ پنجگور چہ مروچی ئیں گوادر، پسنی ءُ تربت ءَ گیش آزات ھیال انت ءُ اود ءَ نشتگیں مردمانی ذھنی شاھیگانی ءُ لنٹانی سر ءِ بچکند ءُ مزاکی گپاں مارا ھم زندگ کُت ءُ پما جیڑگانی در بُتک اَنت۔ (ایوک ءَ من ناں مئے دراھیں ھمراھاں ھمے گپ جت) پنجگور ءِ مراگش ءَ چہ مردیناں، جنین آدم ءُ چُکانی کساس گیشتر ات ءُ دُراہ وتی بلوچی چادران ات اَنت (مئے دمگاں بازار ءُ اسپتالاں بگندئے پیریں بَلُکے یا کہ کوچگی جنیں آدمے گوں بلوچی چادر ءَ در بئیت بلے گیشتر بُرکھان اَنت۔ مراگشاں وَ کس نئیت) ءُ پنجگور مراگش ءِ یک شرّی یے ایش ات کہ کس ءَ شراب نہ وارتگ ات ءُ پُورت نہ ات۔ مئے نیمگ ءَ پروگراماں جنیں آدم ءُ چُکانی بھر نہ زورگ ءِ یک سببے ھمیش انت کہ اد ءَ گیشتر مردم نشہ بنت ءُ کاینت۔ مراگشاں سر ءَ زُور اَنت۔ شراب بور بَلے دگراں وَ تنگ ءُ بیزاری مکن۔
گوادر ءَ گال ءِ مراگش ءَ من اسٹیج ءِ سر ءَ نشتگ اتاں چار پنچ مردم برز ءَ اتک ءُ آیاں لھتیں مردمانی زنگ جت کہ اِے نشہ اَنت ءُ مارا دیوان ءَ پہ آرام نئیلگ ءَ اَنت کہ دیوان ءَ گپے گوش بداریں۔ بازیں بچک ءُ سرپدیں مردمے ءَ چہ دیوان ءَ زھر کت ءُ در اتک ءُ شت اَنت۔ آ دیوان ءَ کہ بچک ءُ سرپدیں مردم نشت مکن اَنت آ دیواناں جنیں آدم ءُ گونڈو کُجا نشت کن انت۔
بلے پنجگور چش نہ ات۔ پنجگور ءَ مردم دیوان ءَ اتکگ ات اَنت۔ دگرانی بیزار کنگ ءُ کم شرپ کنگ ءَ کس نیاتکگ ات۔ شپ، پد ءَ ھیر مئے وتی ات ءُ من لھتیں سنگتاں گوں جتا کوٹی ءَ نشت ءُ دیوان کُت۔ مئے سر ھال ات کہ نوکیں پدریچ چے وانگ ءَ انت۔ سوشل میڈیا ءَ وَ مردم کتابانی پُشت ءَ بازیں شو بازی ئِے کن اَنت بلے راستی اِے نہ انت۔ یکے ءَ گوشت کہ ما ھر ماہ یک یک نودربرے ءَ کتاب داتگ کہ تو اِے کتاب ءَ بوان ءُ پد ءَ ایشی ءِ سر ءَ گپ بکن۔ آ نودربر ءَ کتاب ءَ چہ لھتیں گپ زرتگ ءُ پد ءَ سوشل میڈیا ءَ کتاب ءِ بابت ءَ پٹ ءُ پول کتگ۔ یک ءُ دو دگہ مردمانی داتگیں چمشانک ئِے ونتگ انت ءُ اتکگ دیوان ءَ گپ ئِے جتگ۔ بلے نوں ما مارگ ءَ ئیں کہ ما سک رَد بوتگیں۔ ما مدام نودربر مزنیں کتاب داتگ اَنت کہ ایشانی سر ءَ گپ بکن ات۔ بلے ما اِے نہ جیڑ اتگ کہ اِے نودربر ءَ کہ ما اِے کتاب ءَ دَیگ ءَ ئیں آ اِے کتاب ءَ سرپد بوت کنت یا نہ کنت۔
آیاں بلوچستان ءِ بازیں وانگ جاھاں تر ءُ تاب کتگ ات۔ آیانی ھساب ءَ نوکیں پدریچ اینچو کہ پیش داریت اینچو وانوک نہ انت۔ بَلے یک گپے آیاں مَنّ ات کہ بلوچستان ءَ کتاب سک باز بَھا بیت۔ بازیں نودربر ایشاں گر اَنت ءُ وتی گور ءَ ایر کن انت ءُ بازیں نودربر اِے کتاباں دگراں سوگات کن انت۔
چہ ھمے گپ ءَ من ءَ سنگتے ءِ کسھے یات اتک۔ آئی ءَ مدام کتاب گِپت ءُ ایر کت۔ من گوشت کہ تو چی ءَ چو کن ئے؟ کتاباں نہ وان ئے بلے مدام کتاب گرئے۔ پرچا؟۔ گوشت ئِے کہ ریٹائر بُوّگ ءَ پد وانان اش۔ من گوشت اگاں پیسر ءَ مُرت ئے۔ گڑا؟
گوشت ئِے کہ “گڑا اِے کتاب وھدے لوگ ءَ برگ ءَ بنت منی مات ءُ پت، برات ءُ گوھار ءُ سیاد منی کتاباں گند اَنت ءُ گوش اَنت۔ اِے سکّیں مزنیں وانوکے بوتگ”۔
کتاب ءِ گرگ ءُ لوگ ءَ ایر کنگ ءِ ھم باز پائیدگ اَنت۔ لوگ ءَ کستریں مردم اِے کتاباں گند اَنت آ اِش الم وان اَنت۔ محسن خان ءِ ناول “اللہ میاں کا کارخانہ” ءِ تہ ءَ گونڈو وتی ناکو ءِ کبر ءِ شکّ ءِ سر ءَ نبشتہ کنت کہ “شَرّیں مردم کہ مِر اَنت آ وتی لوگ ءَ شرّیں کتاب پشگیج اَنت ءُ رؤ اَنت”
روسیانی گوشتنے است ” آ لوگ ءَ کہ کتاب نیست۔ آ لوگ ءَ آپ مہ ور”
منی کِرّ ءَ بازیں کتابے است۔ گونڈواں ونتگ اَنت۔ یک روچے گونڈوے ءَ من ءَ جُست کت کہ تئی ھیال ءَ البرٹ کامیو مستریں نبشتہ کارے یا میلان کُنڈیرا؟
من ھیران بوتاں۔ اِے ٹیبرو ءَ اِے چوں ونتگ انت۔ ھیر من چہ وتی نیمگ ءَ پسہ دات۔
دگہ روچے من ءَ گوشیت کہ اگاں کائے پمن ذی شان ساحل ءِ کلیات ءَ بیار گوں۔ اِے انگہ کسان اَنت بلے وانگ ءَ اَنت۔ ما ایشانی اُمر ءَ وانگ نزانتگ۔ بلے ایشاں لوگ ءَ منی کتاب دیستگ انت، ونتگ انت ءُ مروچی اِے نبشتہ کاراں پجہ کار اَنت۔
سھب ءَ ما عزت اکیڈمی ءَ شتیں۔ عزت اکیڈمی ءَ الطاف ساجد ءِ نام ءَ زیمل جاھے ھم است ات۔ یک مزنیں جاھے ات کہ اود ءَ آیانی دیوان بوتگ انت ات۔
مارا سنگتاں عزت اکیڈمی ءِ نیمگ ءَ چہ شنگ بوتگیں کتاب سوگات کت اَنت۔ ما دیراں نہ داشت ءُ دیم پہ شال ءَ راہ کپتیں۔
ھاں بے ھالاں۔ پنجگور مراگش ءَ کتابانی اسٹال ھم است ات اَنت۔ ھمد ءَ کش ءَ گونڈوے ءَ اسٹالے جتگ ات ءُ اسٹال ءِ سر ءَ نبشتہ ات کہ ھرکس اگاں کتاب سوگات کنت۔ اِے کتاب کتابجاھے ءَ دَیگ بنت۔ رحیم مھر منی ھمراہ ات۔ رحیم مھر ءَ ھمے گونڈو گوشت کہ تو برو دو کتاب اچ منی نیمگ ءَ اسٹال ءَ گِچین کن۔
گونڈو ءَ دو کتاب گِچین کت۔ آیانی تہ ءَ یکے اورحان پاموک ءِ گِدار “بَرپ” ات۔ من رحیم مھر ءَ گوشت کہ اِے گونڈو گچین ءَ سک زَبر اِنت۔ اِے گونڈل ھم زانت کہ اورحان پاموک مزنیں نبشتہ کارے۔ گونڈو ءَ گوشت کہ ھو اِے کتاب ءَ پد ءَ کتابجاہ ءَ من وت واناں۔
پہ کتابجاہ ءَ من ھم دو کتاب سوگات کت۔ گونڈو ءَ گوشت کہ وتی نام ءَ نبشتہ کن۔ من گوشت کہ من ءَ نام نیست۔ ھما روچی کہ من ءَ نامے بیت۔ گڑا من ھم کتابانی سر ءَ وتی نام ءَ نبیساں ءُ پہ کتاب جاھے ءَ کتاب سوگات کناں