“علامتی آزمانک،، دوزند،، مقبول انور”
“علامتی آزمانک،، دوزند،، مقبول انور”
من وھدے بَر پِر کت منی گور ءِ دراھیں مچّاں گریوگ بنا کت- بس ایوکا گُنش ءَ من ءَ دلبڈی ءُ حوصلہ دات کہ تئی زپتیں کُلونٹ بوتگ انت ترا مبارک بہ بیت ءُ ھچبر اے ھبر ءَ دل ءَ میار ءُ بژنیگ مہ بو کہ تو دیراں بَر پِر کتگ پدا سُہریں رنگ کتگ انت-ھؤ آ وھد دیر نہ انت کہ تئی رنگ شیرکن ءُ ترا گستا رنگیں ناہ بنت-ترا ھچ میار نیست-من ءَ بگند من چنچو پیر ءُ ھاجز بوتگاں- بلے من ھچبر بزاں تیوگیں زند ءَ بَر نہ کتگ-،،
دومی روچ ءَ من ءَ جِنگل ءُ ادرِکاّں اتک ءُ ٹُگ چت منی دراھیں رنگ کپّی ءُ بدجلواہ کتنے-بلے کس ءَ نا شریں جِنگل بال نہ داتنت نیکہ ادرِک تاچینت انت، من بے وس اتاں…!!
سیمی روچ ءَ من ءَ منی جند ءِ بازار ءِ مردمانی زھگاں اتک ءُ ھرّگ ھرّگیں سنگ ءُ چگل جے پمیشا منی کُنٹ، گرک ،ھوش ریش ءَ ٹپ ٹپ بوت انت-
من ءَ دارو ءُ درمان بس ایوک ءَ منی کش ءِ رُستگیں کُنٹگ کُنٹگیں کُنر ءَ کت-من بازیں سنگ ءُ ڈوکانی ورگ ءَ اے شپ ءَ سک باز ارس ریتک- منی ارس کسے ءَ پیک نہ کتنت-تاں ھماوھد ءَ اے ھون بوتنت ءُ من وت تنگ اتنت روچ پہ روچ منی سرا ھُدا ءِ نیمگا عزاب نازل بوھگ ءَ اتنت- پمیشا من فیصلہ کت کہ ڈیھ ءَ یلہ بہ کناں-من وتی ھلک ءُ دیار یل داتنت، من پیردان ءَ جاہ منند بوتاں- تاں دیراں منی ٹپ وش نہ بوتنت- منی ھلک ءِ یلہ دئیگ ءَ کسءَ برمش نہ کت-من گیشتر ھمے گپ ءَ ھیران اتاں کہ پیردان ءِ سیاھیں ڈلاں بَر کتگیں مچ ودی کتگ ات-آ من ءَ اچ دو سد سال ءَ پیسر بَر اتنے-بلے پیردان ءَ بنیآدم پہ درمانی گواھی دئیگ ءَ نہ ات بزاں ایشانی بروردانی وروک نیست ات- ھؤ! مچ انگت ورناہ ءُ گونگ اتنت- ایشانی برانی سرا مھر ءِ لبز نبشتہ ات-
من ءَ گوں اے زوت ھور ءُ تور بوت انت-بلے آیاں منی بَر ھچ دوست نہ بوتنت-پرچیکہ منی بر دراہ کپّی ءُ چنڈی اتنت-من ھروھد دل ءِ تھا جیڑت کہ من گوں ایشاں ترّ ءُ گرد ءُ نند ءُ نیاد ءَ بدڈؤلاں-پمیشا من زوت پنجگور ءَ شتاں بلے اود ءَ من بیدء سبزو ءَ دگہ ھچ نہ دیست،بلے گُشنت وتی ڈیھ ءِ گم، گم انت من ءَ زھیران زُرتگ ات-من وتی دراھیں ٹپ ءُ ٹور شمشت ءُ کیچ ءَ ماں باگیں گومازی ءَ اتکاں پدا شنکن ءِ مزن بند ءِ سرا رُستاں- دراھیں مچاں دپ پچ لگوشت ءُ گشت،تو پرچا وتی بَر نہ ریتکگ ءُ اتکگ؟
دومی روچ ءَ درائیناں منی جند ءَ مُچی ءُ میڑی کت پمن جرگہ نادینگ بوت-چہ جرگہ ءِ نیمگا سزا اتک-من ءَ ششمی نیمروچ ءِ یک شنمبے ءِ روچ ءَ وتی کنٹ بُرّ زُرت ءُ من ءَ گُڑّ ات ءُ دورش دات-پدا ایشاں منی پیش جتا اتنت ءُ کنٹ جتا… آہانی ھساب ءَ آ چہ منی وش لذّتیں کوش ھم وتی بالاد ءَ وشنود کنگ ءَ دلمانگ اتنت ءُ آھاں کت ھم انچوش… کوشانی زہری ءَ پد منی کنٹ ھمودا ایرکت اش کہ لہتیں روچ ءَ بِلّے ھُشک بیت بلے ناگت ءَ ھارے اتک ءُ منی سربر ءِ بہر کہ گُڑگ بوتگ ات بُرت ئےِ ءُ منی کنٹ ءَ گرانی ءِ سبب ءَ ھار ءِ ھمراہداری کت نہ کت-منی سر ءِ بہر ءِ سر کیاّ ءِ کہیر ءِ گورا کپت-آئی تھا کمیں زند ءِ برمش ھست ات-دو وار ءَ چونا جوڑے ءَ سُبک سُبک ءَ روتگ جناں ءُ گہتر بوھان بوت تانکہ سرجم ءَ مِک بوت-ھمودا ایریں کُنٹ ءَ را کُنٹ تراش ءِ دست ءَ دئیگ بوت- آئی ءَ دوتل پہ وت ءَ کار ءِ مُزّ ءِ ھساب ءَ زرت ءُ دوتل واھند ءَ را دات کہ دھکانے ات-کنٹ دروشمے دات ئےِ… پدا آئی ءَ وتی دوئیں تل یک نوک سوریں ورناھے ءِ کرّ ءَ بھا کتنت-کہ ورنا پہ وت ءَ بانے بندگ ءَ ات- آئی ءَ دگہ دار ءُ کنٹ ءِ ھم بند ءُ بست کتگ ات بلے منی دوئیں تل آئی بان بندیں اُستا ءَ را کش پہ کشی ءَ ھم دل نہ بوتنت- بلکیں مارا نوک سوریں مرر ءُ جن ءِ بان ءِ اے کرّ ءُ آ کرّ ءَ منگ بوت- وھدیکہ دھکان ءَ وتی دوھیں تل میر ءَ را انچو منّت ءُ داتنت-میر ءِ مردماں مارا گرّیناں کت ءُ میر ءِ بیھٹک ءِ دیم ءَ بُرت ئےِ ءُ دؤر دات- پدا میر ءَ وتی بھیٹک ءِ سر ءِ بندگ ءِ کار بنگیج کت- آئی اُستا ءَ مارا کش پہ کش ءَ جاگہ دات-من میر ءِ لوگ ءِ تھا ھرروچ گنداں میر ءِ زالاں گنداں ءُ آوانی کرداراں ھم،من وت نزاناں کہ من چتوریں دو زند گوازینگ ءَ آں-میر ءِ زوراکیاں گنداں منی دل گشیت کہ کش پہ کشی ءَ ابید ھم من دُور تر بُرواں ءُ “آَ،،مرر ءُ جن ءِ مھر ءُ مھبت ءَ گنداں دلوں گشیت کہ اینکہ دُوری ءَ ابید ھم منی دوھیں تل ھوار بہ بنت-تراشوک ءَ را وتی قیمت پہ زرّ رستگ بلے بھا ءَ من ءَ عجب رنگے ءَ زندگ کتگ-یک نیمگے مھر ءِ لذّتاں گنداں ءُ سدبراں دل بود کاریت ءُ یک گورے زوراکیاں گنداں گڑا دل سدبراں سدیت-من اے دو زندانی نیام ءَ انچو بیوساں، کہ ھرروچ، ھر شپ ھمے پریات ءُ چیھال ءَ دم بُرتگوں… ،،ھست کسے کہ منی ھمے دو زندی ءَ ھلاس بہ کنت-