علی سُروزی , نبشتہ: گُلزارگچکی
علی سُروزی
نبشتہ: گُلزارگچکی
اَکس: باسط شیخی بلوچ
بلوچی زیملءِ تامءُ لذ ّت، ایشیءِ شھدءُشکرتامی گْوریشیءِ زگریں سازاں دوسری بیتءُ اگاں اِے سازانی جنوکیں لنکُک وشّ تبیں دلءُ زیمری سنچءُ بودی ئیں اِزمکارےءِ بہ بنت گُڑا چریشاں ساچ اتگیں سازچو کیفاں وتی گوشدوکاں خماران کنت۔ شَیرءُداستانءُزھیروکءِ تامدارکنوکیں سُروزءِ گُروھگانی کمالءَچہ سیمّاں سرکشّانیں اَشرپءد ُرّا،میدی ءُ کبلھی زھیروک بہ بنت کہ فوک سَوتانی سُروزءِ ساچ اِتگیں وشّ تواریں پیس یا کہ جدیدزیمل ءِدستونک ،دْرُستانی سمبھینگءَکُتہ کاریں سازگرانی بلاھیں دستے مانءُ چرے سازگراں یکّے وشّ سازیں علیؔ سُروزی اَت کہ وتی اَھدءُباریگءَ بلوچی کلاسیکل زیمر بزاں شَیرءُ داستان، زھیروکءُ موتْک ءُ وژّنودی سازانی وسیلگ ءَ بلوچءِ زیمری کینوسءَزِیلّءُبامءِبرکتءَ شنگ اتگیں،چوشھجوءَ وشّتامءُسارتءُ تچوکیں سازانی وسیلگءَ ھجبر گارءُ بیگواہ نہ بیت، بے نام ءُ نشانیءِ دیناں نہ رَوت۔
پھلوان علیؔ سُروزی کہ آئیءِسرجمیں نام علیؔ محمد بلوچ اَت، ضلع گْوادرءِ کْوھنءُ کدیمی میتگ جیمُڑیؔءِتلاردیمءُ وشّ کَوشیںپانوانؔءَ بِنگوؔءُنازاتونؔءِ لوگءَسن 1952 ءَ ودی بوتگ۔بَنگو ؔ وتی دھرءُدورءُزمانگءَ وت ھم سُروز ءِ ازمکارے بوتگ۔کلاسیکل گُشندہ دلبودؔ کہ وت سُروزجنگءُ شَیر گْوشیءَ مھشوراِنت ، پھلوان علیؔ سُروزیءِپیرُک(ماتءِپت)پُلّانؔ ءِبْرات بوتگ۔ علیؔءِمکھیں ماتءِ یکّ دگہ ناکوے،پھلوان مقصودؔ کہ پھلوان دلبودؔءُپُلّانؔ ءِبْرات اِنت ھم زیمری کارِستے بوتگ۔ پھلوان علیؔ سُروزی کہ کوڑوھیں اِمرزءَپاداں ایر کنت بلوچی شَیرءُ زھیروک ءِوشّ زیملیں الھان، سُروزءِ سیمّانی گسارگءُ بلوچی زھیروکانی وشّیں ساز آئیءِ گوشاں کپ اَنت ، آ سازءُ سُروزءُ دمبورگ، شَیرءُ داستان گْوشیءِ سارتءُھونکیں ساھگءَ رُدان بیت، آئیءِ ازمی جوھر سرچِست کنان بنت،آئیءِزیمری واھگ باھند کنان بنت۔آ کسانیءَچہ وتی ناکو، غُلامؔ حیدرءَ سُروزءِسازءَ ھیل کنت، میزاں میزاں اِے پِڑءَ گاماں ایر کنتءُدیمتری زندمانءَنامداریں سُروزی یے بیت۔آچہ سورءُ سانگءَ ساری کساس بیستءُپنچ(25) سالءِ اُمرءَ سُروزءِ جنگ ھیل کنت ۔آئی ءَسُروزءَ ابید بینجو ھم وشّ جتگ،تبلہ ءَبدنہ بوتگ،ءُدمبورگءِ ھم سکّیں بلدیں سازگرے بوتگ۔
پانوانتحصیل جیونی ءِ اَبو آذانؔ علیؔ سُروزیءِ بارہءَ وتی نبشتانکءَ گْوش اِیت؛ ’’علیؔ چہ تئی ھوشمندی ءِ سَوَب ءَ ماں نوک ورنائی ءَ یکّ زانتکاریںءُ پُھتہ ئیں سُروزی یے جوڑ بیتگ۔گْوش اَنت علیؔ محمد بلوچ ءَ سُروز اَنچوش جَتگ پورءَ ھبرئِے پرماتگ ۔ پھلوان علیؔ محمد بلوچ ءَ گوں وتی اَھدءِدْراھیں مزن نامیں کلاسیکل گُشندھاں سُروز جتگ کہ اِے لڑءَنامانی مُلّا کمالانؔ، دلبودؔ، لال بکش پیکؔ، مُاّ جاؔن محمد راسکی، مُاّ غُلامؔ قادر،مُاّد قادرؔبکش، پھلوان مزارؔابراھیم، اسحاقؔ مزار، صالح ؔ محمد گورگیج(ملیری)، مُلّا د ُرؔمحمد ،پھلوان شھدؔاد، مقصودؔ،پھلوان حسینؔ حوسل ءُ دگہ بازین ئِے ھوار اِنت ۔ علیؔ محمد بلوچ ناں ایوکءَ سُروزءِباکمالیں سازی یے بوتگ ، آئیءَ بینجوھم سکّ وشّ جتگءُ پہ وت مزنیں نامے کشّ اِ تگ ئِے ۔‘‘
پھلوان علیؔ چہ وتی پت بِنگوؔءَ تھنایکّیں چُکّ بیت ۔ دوسالءِ اُمرءَ آئیءِ کماش بیران بیت۔ آئیءِ مات دومی سانگءَ کنت،آئیءِ یکّ گْوھارے نسیمہؔءُ چار بْرات عبدالغفورؔ، عبدالحمیدؔ، ماسٹر اسلمؔءُ اختر ؔصالح بنت،آ چہ وتی گْوھارءُ بْراتاں مسترین بیت ۔آ وتی زندمانیءِ بنداتی سالءُ روچاں پوریاگری کنت، گِلکارے بیت، گوں اُستا (بان بند)ے ءَ ھمراہ بیت، بان بندگءُ دونگءِ کارءَ لاپ والین ایت ۔ آئیءِبے نامءُپجّاری پوریاگری زندگی آئوکیں زمانگءَ سرءَ دیم پہ سازگریءِ منزل ءَ دنت، چہ بیگواھیءِکپءَ دیم پہ نامداریءِ کھچرءِسَیلءَ بیت، سازانی مراگاھانی بْراہ بیت، وشّ زیملیں مجلسانی سروگان بیت۔ھردیں کہ آ سُروز ءِ اِشک ءَ گْرپتار بیت، گُڑاوتی دْراھیں مھر ءُ مُھبتاں پریشیءَ نْدرکنت،دگہ ھچّ کارءُروزگارنہ کنت، بسّ ھمیشیءَ دست ءَ پتا ایت،وتءَ شے مریدؔءُ سُروزءَھانیؔ کنت پْرائیءَ وتا کُربان کنت۔علیؔ ناوانندگےبیت، ناں مدرسہ یے ءَ نَیکہ اسکولےءَ ونتگ ئِے، بلے سکّیں لائکءُبودناکیں انسانے بیت۔آگیشتر ایرانءَ جھ منند بیت ، البت پانوانیؔ زالءُچُکّانی چارگءَ،سور ءُ پُرسءُپتراں کیتءُروت، برے ماھےءَ برے دودوماھاں جَلّ ایت، آئیءِ گیشتری زندمان ایرانءَ گْوزایت۔
پھلوان علیؔ سُروزیءِبْرات عبدالغفورؔآئیءِبابتءَوتی لیکھاں درشان کنت کہ؛’’علیؔ ءِاُمر ھشت (8)سال ءِ بیتگ منی ناکو غُلامؔ حیدرءَ کسانیں سُروزے، کلیرے تْراشتگ، ناکوءَ کونڈءِسرءَ کتگ ھیل داتگ ،داں چاردہ(14) پانزدہ(15) سالءِ اُمرءَ اتکگ، سازے دربُرتگ۔گُڑاشُتگ ایرانءَ،چُکّ ئِے مئے گْورءَبیتگاں، اتکگ نشتگ،بلے گیشتر زندگی یے ھمانگو کتگ۔ماراپیرُکے بیتگ، دلبودؔنامی، آپیشکانءَ بیتگ، آئیءَ ڈیکّ داتگ ئِے گُڑا آئیءَ ھم سرءُسوج کتگ ،بلے مستریں اُستادئِے غُلام حیدراِنت۔غُلام حیدر کہ ایران شُتگ ، علیؔ پیشکانءَ دلبودؔءِ گْورءَ سُروز دربرگءَ شُتگ اَتکگ۔ ‘‘ ایرانءَجھ منندیءِ سَوَب ایش بیت کہ ھردیں آئیءِاُستاد غُلامؔ حیدر ایرانءَ پہ سازءُسُروزءَ روت گُڑا آدمبورگی ئِے بیت، ھمراہ ئِے بیت روت گوں۔غُلامؔ حیدر ھمودءَ سانگ کنت، علیؔ ھم ھمودءَ ھم سی ، سیءُپنچ سالءِ اُمر ءَسانگ کنت دائمی جھ منند بیت۔ علیؔ سُروزیءَ دو سانگ کتگ، یکّے چہپانوان ءَ شے اَمیرُکؔ ءِ جنکءَ،دومی چہ ایران ءِھیبتانؔ ءِ جنکءَ۔چہ پھلوان علیؔءِبچّاں باقیؔ علی(پانوانیؔ) سُروزءُدمبورگ جنت، سَوت جنت،شائری کنت، تژن ءُبچکندی (کامیڈی) شَیرپربندایتءُجنت۔دومی بچّ لیاقتؔ علی (پانوانیؔ) ھم سُروز، بینجوءُتبلہ جنت، گْواتیءُنیمّونی مست کنت۔چہ ایران ءِ چُکّاں نسیمؔ علی شرّیں ردھمسٹءُ بینجو ماسٹرے، سَوت ھم جنت۔ اولی بچّ وسیمؔ علی ھم بینجو جنت،ا نچوش آئیءِ سیمی بچّ نعیمؔ علی ھم سازءُ زیمرءِ پڑءَ ایرکپتگ۔‘‘
نامداریں شَیرگْوش مُلّا کمالانءِبچّ حاجی عبدالرسول علیؔ سُروزیءِ بارہءَ گْوش ایت’’ علیؔ سکّیں شرّیں سازگرءُاعلیٰ اخلاقءِ مالک اَت ۔باز وشّیں شرّیں انسانے اَت،وتی کومءُ قبیلہ ءِ توک ءَ اخلاقی لھازءَ باز شرّیںءُشوکیں انسانے اَت۔ اَزلھازء مالءُ دنیا باازّتی ئیں مردمے اَت ، حریسے نہ اَت کہ منءَ گیشتر بہ رس ایت، ھرچی کہ دات ،زُرت ئِے۔اگاں سیراں شُتگ،مردمانی گْورءَ سوال ئِے نہ کتگ، سبرءُ اوپاری مردمے اَت۔ علیؔ مئے کماش ءِ گْورءَایرانءِ انکلابءَ پد اتکگ اَت، اِے وھدی جْوان اَت ۔ اولی کاروبارئِے گیشتر کلاچءِ زھیروکءُ سازاں زُرتگ اَت ۔وت کہ اتکگ اَت چھبارؔءَ گُڑا گیشتر رسول بکش زنگی ؔشاھی سُروزیءُ درؔمحمد سُروزیءِ لینءُ ترتیب ئِے زُرت۔ درؔمحمدءِ آکری سُروز کہ نام ئِے ’’زَرد‘‘ اَت، آ علیؔ محمدءِ دستءَ کپت۔ مئے کماشءِدستءِ چیر ءَ دراتک، جْوانیءَ بگر داں مزن بیتءُ آکری ھدّءَ داں مئے پتءِ دستءَ اَت۔ گاھے سازءُ آوازانی توکءَ اگاں اِشکالےپیش بہ اتکیں گُڑا مئے پتءَڈکّانی، بندانی، سیمّءُ سازانی ھسابءَ سرءُسوج کت ۔مئے پتءِ عادت اَت کہ دیوانءِ توکءَ سازی یے ھبر نہ دات، ھکّل ئِے نہ کت،تاریپ ئِے کت ۔بلے رندءَکہ دیوان ھلاس بوت گُڑا آئِے سر ءُسوج کت کہ اِے بندءَ اِے وڑءَ بیار، اِے بندءَ اِے وڑءَبیار۔ھمے ترتیبءَ علیؔءِ گیشتریں اُستادی گوں مئے کماشءَ اَت۔ ساز ءُزیمل ئِے سکّ شرّاِت اَنت۔ ھما زمانءَ کہ ما دشتیاریءَاتیں، کساس منی سِندءُسالءِ مردم اَت ، گُڑا ا نچش کہ مئے پتءَ مارا دوست داشت، آئِے ھم دوست داشت ۔ سازگری ءِ ھسابءَ چو کلاچیؔ سازیانی دابءَ اَت ۔چوش کہ غُلامؔ حیدراَت، غُلامؔ جان اَت ، دلبودؔ اَت ۔عمرؔءُ ارزینؔ اِت اَنت، ھمے سُروزیانی وڑءَ بوتگ،بلے آکرءَ وتارا کشّ اِت ئِے مئے دشتیاریءُ باھوءِترتیبءِسرءَ شُت،سازءُ آوازئِے شکّ شرّاِت اَنت۔سکّیں سازگریں سُروزی یے اَت،مُدام شائرءِاکتیارءَ اَت ۔ یکّ سازی یے بیت کہ آشائر(پھلوان)ءَ وتی لینءِ توکءَ کارایت، چوش کہ درؔمحمد بیتگ کہ شائرھمائیءِ ترتیبءَ شُتگ، اِے ناں۔۔۔! اِے شائرءِ رندءَ شُت۔باز براں منی پتءَعلیؔءُرسول بکش زنگیؔ شاھی ھور بُرتگ اَنت، انچیں وھدءَ علیؔ سُروز جنگ پرماتگ ئِے رسول بکش زنگیؔ شاھیءَپنجگ(دمبورگ) جتگ، یا رسولؔ بکش ءَ سُروز جتگ گُڑا علیؔءَ پنجگ جتگ ۔ کماشءَ باز براں دمبیرگ علیؔءَ را داتگ وت بے دمبیرگءَ شَیرئِے جتگ۔ انچوش محبوبیت بوتگ ایشانی درنیامءَ ۔علیؔ گْواتی، پُرّیءُ شیخیؔ سازانی بارہءَ ھم سکّ شرّ بیتگ۔مئے مُلکءَ شیخ صابرؔے ھست اَت ، ھمائیءِگْورءَ شُتگ سازئِے جتگ۔ پیش چہ شائری (پھلوانی ءُ زھیروک ) ءِ لین ءِ توکءَ، دھمالی سازئِے جتگ۔ ھردیں کہ شائری لینءَ اَتک گُڑا آئِے ویل کت اَنت۔بھرھال سَوتءُ زیملءِ توکءَ باز آشنائی ءُ زانت ئِے ھست اَت ، اللہ ئِے مغفرت بہ کنت ۔‘‘
علیؔ ھما سازگراِنت کہ آئی ءَناں ایوکءَ پہ نامداریں گْوشندہ سبزلؔ سامگی، برکتؔ بلّ والا،موسیٰ ؔسَوتیءَسُروزجتگ بلکن آئیءَپہ بازیں زالبول سَوتیاں ھم سُروز جتگ۔زالبول گْوشندہ شریفہؔ سَوتی،حبیبہؔ جیمُڑیءُشِمشوکؔ ایرانی ءِ ھمرائی ءَھم بازیں سیر ءُ آروسی مراگاھاں بینجو ءُ سُروزءِوشّیں سازے ساچ اتکگ ، سَوتءُزھیروک ئِے ریکارڈکتگ۔علیؔ بلوچی زھیروکانی بلاھیں ساز گر ے بیتگ،گْواتی ءِ سازانی جنگ ءَھم گوں شیخ مھدیؔءُ شیخ صابرؔ ءَ دْراجیں مُدتے ءَ ھمراھداری ئِے کتگ۔اَبید چہ ایران ءُ پاکستان ءَ سویڈن، فرانس، جرمنی، کینیا، عربستان، تُرکی ءُاِے دگہ مُلکاں شُتگ وتی اِزم ئِے درانگازاَتگءُدادءُستائِےکٹّ اتگ ۔ وتی زھگ وسیم ؔعلی بلوچ ءِ اولی پیت بند’’لال ءِ بالاد‘‘ءَ سُروزئِے جتگ ءُ وتی کستریں بْرات اخترؔ صالح ءِ یّک گزلی پیت بندے ءَھم سُروزئِے جتگ۔
علیؔءِازم ءِبارہءَ نامداریں گْوشندہ گُلؔ محمد کسرکندی گْوش ایت؛ علی یکّ شخصیتے اَت ، باز مخلصیں، بے تکبریںءُوشّ کَولیں مردمے اَت۔ اِے مردءِ ازمءِ باروءَ گْوشاں کہ علیؔ وکتے ھرکسی سازی بیتگ بزاں آئیءَ رَھواریں اَپسے گون بوتگ، انچوش وتی گْوشندہ ئِے راحت کتگ کہ آ گْوشندہ داں سُھبءَ پریشان نہ بیتگ کہ منی گُٹّ رَوت، منءَ ضربہ لگّ ایت۔اِے واجہءَ سَوتءَ چو کلمءِ رنگءَ سُروزجتگ۔گیدی سَوتاں ھما رنگءَ جتگ ئِے کہ گوشداروک اَسل ھیران بیتگ اَنت۔اِے مردءِ سازگریءَ ھدّ تَوام اَ ت۔اَنچوش اِے مرد سازگرےاَت کہ سینزدہ(13)سیمّ سُروزءَ پراَت، ھمک سیمّ ایشیءَ یکّ وڑےءَ سُرسازکتگ اَت ۔بے اندازہ بلداَت ۔کلاسیکل ساز ایشی ءَمُلّا کمالانؔءِ گْورءَ ھما رنگ ءَجتگ کہ ما لذّت کتگ، وتی گْوشندہ ئِے ھجبر ناراز نہ کتگ۔اگاں من گْواتی سازانی گپّءَ بہ کنیں، اِے پڑءَھم سکّ بلد بوتگ۔چہ مئے مُلک(روبرکتی مکران)ءِ گْواتی سازاں، چہ شُمئے مُلک(روٹکّی مکران)ءِ گْواتی سازاں سکّ بلد بوتگ، سجّئیں الاکہءِ گْواتی سازاں یکّ ھسابءَ بلد بوتگ۔دوئیں نیمگانی گیدی سوَتاں زانتکار بوتگ،لھتیں مئے سُروزی ھست اَنت کہ آ فقط مئے مُلک(ایرانی مکران)ءِ سازاں زانت، شُمئے مُلک (کیچ ءُکلاچ) ءِسازاں بلد نہ اِنت، ایشیءَ دوئیں نیمگانی ساز الکاپیءَ زانتگ اَنت۔ مرچی اگاں منءَ زھیریگانی بارہءَ مالومات ئِے ھست اِنت،منءَ چہ علیؔءِ نیمگءَ ھست اِنت، ءُھرزھیریگ ئِے انّوں من جنوں،من ئِے گْوشوں، من دیوانءَ کہ نندوں ھُداءِبرکتءَ چہ علیؔ سُروزیءِ برکتءَمنءَ رس اِتگ۔ انچوش بلد اَت کہ نام گپت سازئِے جت اَنت ، بے ھدّءُ بے ھساب زانتکاراَت ۔ھرکسءَ علیؔءِ گْورءَ شاگردی کتگ ، سازءِ ھدّئِے گپتگ ،آ وتی فیلڈءَ بروبراِنت، کامیات اِنت۔ یعنی اِے مردءَ ھروڑیں ساز کہ دست جتگ، چوش کہ دمال، سَوت،زگریں بلوچی کلاسیکلءُزھیروک،ھرچیءَ کہ سُروزئِے دست جت مارا دوست بوتگ۔ ایشیءِ ساز مردمءِ وجودءِ توکءَ پُتِرتگ اَنت۔ھاس زھیریگاں سکّ ھُژ ّارءُزانتکاراَت، زھیریگ ئِے کپّی چُنڈ ّی نہ کت اَنت، کامل ئِے کت ءُ جت اَنت ئِے، ھما ھڈ ّءُ ھُنڈالءَ بُرت ءُ رس اینت اَنت ئِے نوں ھلاس ئِے کت اَنت، نیمراہ ءَنہ دْروہ اِت اَنت ئِے۔چوناھا سُروز دْراجیں لنکک لوٹ ایت، اِے مردءِ لنکُک گْونڈیں لنکُکبوتگ اَنت،بلے گْورے گْونڈیں لنکُکاں اِے مردءَ انچوش اداکاری کتگ کہ مردمءِ دلءَ تاھیر زُرتگ۔ انچوش سُروزئِے وشّ جتگ، ھمے رنگءَ بینجوئِے ھم وشّ جتگ۔ سکّیں رحمدلءُ ساپ دلیں مردمے اَت۔ تو دستءِ تِلا بُرتین پَوڑے دستءَ داتین، ھچّ ئِے نہ گْوشت۔ ایشیءِھوبی یے اِے ھست اَت اگاں شپءَ شام ئِے نیست اَت،شُدءَ لوگءَ بہ مُرتین،بلے کسّی گْورءَ تلب ئِے نہ کت، گْومے ھالتءُ تبیتءَ مردءَ زندگی وتی گْوازاینت۔ دہ (۱۰) سالاں منی سازی بیتگ، ماکہ زیملی سپرےءَشُتگیں کُلّیں جپاکاریءُ بوجایے زُرتگ۔راہءِجنجال،مئے ٹکس،مئے سازءُ سامان، دْروہ ھمائیءَ سنبال اِتگ اَنت، سکّیں ھیال داروکیں ءُ باپگریں مردے اَت ۔انچیں ازمے گون اِت ئِے کہ زبان قاصراِنت ایشیءِ ازمءِ نامءِ گرگءَ۔ من موسیکی ھمے مردءِ گْورءَ سِکّ اِتگ، منی اُستاد بیتگ۔ اگاں من ازمءِساھب آں اَنّی،ھرچی کہ من زانیں ، چمئے مردءِنیمگءَ رس اِتگ۔ ھرچی کہ بابتءموسیکی علیؔءِکرّءَ بوتگ، منءَ داتگ ئِے،آئیءِنزّیکیں شاگردمن بیتگاں۔ زھیریگانی بارہءَ ھرچی کہ زانتگ ئِے، ھرچ علمے کہ بوتگ ئِے منءَ ھیل داتگ ئِے، اَنّی کہ من زیملی دیوانےءَ نندیں، ھمے مردءِ برکتءَ کہ منی سرءَ باز زھمت ئِے کشّ اِتگ۔ چوھانا ھم پہ وتی شاگرداں سکّ مھربان بیتگ۔ شاگردءِ دلءَ نہ بوتگ کہ چرائی لوگءَ دربہ روت، انچوش مھروان بیتگ۔ شوک تبیت ءُ وشّ تبیتے ، دور گندیں مردمے بیتگ۔‘‘
علیؔ سُروزیءِازمی کمالءُ زانتءُ زانگءِپدرندمارا ناں ایوکءَ مُلّا کمالانؔ وڑیں داستان گْوشءِھمسازیءُ ھمراھداریءَ گندگءَ کاینت بلکن آئیءِچرائیءِ ازمءِ چمّگءَ پِٹّ اتگیں زیمری نوک آپ آئیءِبچّانی زیمری بودءُ سنچءَھم الکاپی ءَ سھرءَ بنت۔ آئیءِ بچّ وسیمؔ علی بہ بیت کہ نسیمؔ علی، دوئیں بے دروریں سازگرءُگْوشندہ اَنت۔ علیؔ ءِازمی جاگہ آئیءِ دو ورناھیں بچّ نسیمؔ علی بلوچ ءُ وسیمؔ علی بلوچ پہ الکاپی گوں بلوچی ساز ءُ زیمل ءَداشتگ۔دوئیں بْرات پجّارءِ واستیگءُ مُھتاج نہ اَنت۔دوئیں تبلہءُبینجو ءِپجّیءَگْوشندھی ھم کنگءَ اَنت۔
پھلوان علیؔءِبچّ وسیم علیؔ وتی کماشءِ بارہءَ گپّ کنت کہ’’منی کماش مئے ھاندانءَ نرم تریں مردم بیتگ، بلے مئے بارہءَ سکّ حساس بیتگ، مارا دل نہ بوتگ ئِے، گْوشتگ ئِے منی چُکّانی بارہءَ شکایتے بیت منءَ بہ گْوش اِت، اگاں بدی یے، ھرابی یے کن اِنت، منءَ ھال بہ دیئت،لٹّءُکُٹّ مہ کن اِت ئِے۔ وت تبلہ نہ جتگ ئِے بلے لےءُ سُرءَ سکّ سرپد بیتگ منءَ ھیل داتگ ئِے کہ چوش بہ جن، منی استاد بیتگ۔ دست ئِے گپتگ سکّاراینتگ ئِے ، مئے سرءَ باز مھنت کتگ ئِے۔ وت سروز، دمبورگءُ بینجوءَ بلد بوتگ۔ کی بورڈ ھم جتگ ئِے بلے کمّ کمّءَ۔استاد عبدالرحمنٰ سوری زئیءَ ھم چہ کماش ءَ دربُرتگ، زھیروک، سَوت، شَیروندی ھیل داتگ اَنت۔انچوش اسحاقؔ مزار اِنت کہ چہ کماشءَ ھیل ئِے کتگ۔ کماش ءِ اسل فیلڈ زھیروک، کلاسیکل ءُ شَیروندی بوتگ۔ بیگاھاں سروزئِے کشّ اِتگ، سازے جتگ،ساریءَ گیشتر اَشرپء د ُرّائِے جتگ۔اَشرپء د ُرّاءِ دْراھیں ڈکّ ئِے جتگ اَنت، نوں دگہ زھیروک ئِے جتگ۔بیاک، باھوءِ زھیروک، جنوزامی، کبلہءِ زھیروک ، کر،بشکرد، دْرست ئِے جتگ اَنت، دم نہ بُرتگ ئِے، ماآئیءِ وڑءَ کت نہ کنیں، نیم کلاکءَ یکشلہ نشت نہ کنیں۔ کماشءِ دلدوستیں گْوشندہ مُلّا کمالانؔ ،مُلّا غُلام قادرؔءُ لال بکش پیکؔ بوتگ اَنت۔ حاجی کمالانؔءِسکّ توسیپ ئِے کتگ کہ زبان ئِے سکّ شیرین اِنت۔پہ زانتکاریءَمُلّا غُلام قادرؔراسکی ءِ باز ستائِے کتگ کہ مُلّاءَ وتی دمبیرگ دائم وت سُرءُساز کتگ، اِے دگراں انچک نہ زانتگ دمبیرگ ءِ جنگ۔مئے گیشتر سروزیاں اسٹوڈیوءَ ریکارڈنگ کت نہ کتگ،ترکٹ داتگ، دراتکگ اَنت لےءَچہ ،انڈین راگاں سرپد نہ بوتگ اَنت،میار ئِے ھم نیست کہ آبلوچ اَنت، بلوچیءَ ھیلدار بوتگ اَنت بلے کماش ءَ اسٹوڈیوریکارڈنگ سکّ وشّ کتگ۔ کماشءِ ھوبی اِے بوتگ کہ ھِندی راگءُراگنی زانتگ اَنت ئِےءُ فارسی راگءُراگنی ھم زانتگ اَنت ئِے۔چوناھا من ابّا توار پرجتگ بلے چوش کہ منی استاد ھم بیتگ، جاھے جاھے کہ دیوانے بیتگ گُڑا من استاد ھم گْوشتگ ۔من کسان اِتاں منءَ شوک ات سازءِ، پمن کولمنے زُرت ئِے تبلہ یے کت ئِے منءَ ھیل دیائینت ئِے۔ من دگہ کسی شاگرد نہ آں، تھنا وتی کماشءِ شاگرداں، من سروز ، دمبورگ، باجا، کیبورڈ،گٹار، تبلہ، جوڑی،نال،ڈھولک، دْرست ھمائیءِ برکت ءَ جناں۔گْوشندھی ھم منءَ ھیل داتگ ئِے، وتا آوازئِے نہ بیتگ بلے باجا ءِ سرءَ منءَ سوج داتگ ئِے ۔ منی بْرات نسیمؔ علی،نعیمؔ علی،ندیمؔ علی، نصیبؔ علی، اِے دْرست کماشءِءُ منی شاگرداَنت۔ کساس ھژدہ (18) سالاں من کماشءِ گروپءَ بیتگاں۔ مرگءَ پنچ(۵)سال پیش من کماشءَ را گْوشت نوں تو کسانیں دیواناں مہ رو،سرکاریءُ اے دگہ مزنیں دیواناں بہ رو، گُڑادیواناں نہ شُت، گروپ ءِ زمہ ئِے منءَ دات۔‘‘
بلوچی میوزک پروموٹرز سوسائٹیءِبُنجاھی کماش(دومی) اَشرپؔ محمود کسّہ کنت کہ ’’پھلوان علیؔ سُروزی من وتی سیاد حاصل کلمتیؔءِ دیوان ءَ شپے گْوادرءَ دیستگ اَت۔ حاصلؔ ءَ منءَ کال کت کہ علیؔ اتکگ وتی باجاءَ زورءُ بیا مجلسے کنیں۔ من باجاءِسرءَ سَوتءُ گزل جت ،علیؔ سُروزیءَ وتی سُروز زُرتءُ سازاں ھمساز بوت۔من گْوشت علیؔ باجاءِتوارسکّ جھل اِنت، سُروزبُرزاِنت، گْوشت ئِے ،’’تو بسّ وتی کال ءَبہ بگر من سُروزءَ ھما ھسابءَ ساز کنیں۔‘‘من باجاجت،علیؔءَ ساز گپت، سکّ وش جت ئِے۔ انچوش مھروانیں انسانے اَت،ھمینکس زانتکاریں سازگرے اَت ۔ وشّ تبے اَت، مزن گِندیءُشانءُ تکبر وڑیں تبءُ رَوِشت من آئی ءِ تہ ءَنہ دیست ۔ گونمن ھمےدیوانءَانچو رِتکءُ ریچ بوت گْوش ئے مُدتے بیت ما یکّے دومیگءَ زانیں۔ ھمے شپءِ دیوانءِ کساس پانْزدہ روچاں پد حاصل کلمتیؔ ءَمن ءَ ھال دات کہ پھلوان علیؔ دلءِ نادْراھیءِآماچ اِنت، سکّ تکلیپ اِنت۔ مادوئیناں پیسلہ کت کہ کراچیءَ کارین ئِے ھلاجءَ ئِے کنیں، حاصلؔءَ آئی ءِ پسائندگ گْوشت اَنت کہ کراچیءَ بیاراِت ئِے، بلے سیمی روچ ءَپدءَدلءِدْریکگ ئِے بند بوت اَنت چہ اِمروزءَ لڈ ّءُبارئِے کت۔من سکّ بژن بوتوں کہ ملکموتءَ ماراوتی اِے زانتکاریں سازگرءِ زندگی ءِ رکّینگءِ ھچّ موہ نہ دات۔‘‘
زندھست، گُڑامرگ ھم ھست،بلے سکّیں کمّیں انسان بنت کہ آ چہ دگنیاوَءَ گسربنت بلے پہ نامءُ مشھوری ابدمان بنت، آھانی مرگ آھاں چہ راجءِدلءُ دینّاں کشّگءَ سوبمند نہ بیت،آوتی ازمی کُتہ کاری،زیمری ھزمتءُانسانی شرّکاریانی سَوَبءَ داں جھان ھست اِنت زندگ مان اَنت۔پھلوان علیؔ سُروزی چمئے کُتہ کارءُ سوھوئیں ازمکارءُشرّیں انساناں یکّے اَت کہ22 دسمبر 2016 ءَ شستءُ چار (64) سالءِ اُمرءَ چرے کوڑوھیں دنیاءَ لڈ ّ اِت، بلوچی سازءُ زیمل ءِ گوشداروک ئِے پُرسیگ کت اَنت ءُ وتی مکیمی جاہءَ شُت، بلے وتی وشّیں سازانی برکتءَدائم زندگ اِنتءُ ھردیں کہ بلوچی کلاسیکل زیمرءِ بارہءَ گپّ بیت گُڑا آئیءِنام پہ شرپ ءُ گوں توسیپءُستا گرگ بیت۔
سرشون؛
ابوآزانؔ(27ستمبر2021)جُستءُپُرس ،پانوان جیونی
عبدالغفورؔ(27ستمبر2021)جُستءُپُرس،پانوان جیونی
ابوآزانؔ(27ستمبر2021) جُستءُ پُرس، پانوان جیونی
عبدالرسولؔ، حاجی(26ستمبر2021)ٹیلیفونک جُستءُپُرس،چھبار(ایران)
ابوآزانؔ(27ستمبر2021)جُستءُپُرس ،پانوان جیونی
گُل محمد کسرکندی(21اکتوبر2021)ٹیلیفونک جُستءُپُرس،کَورسر (ایران)
وسیم ؔعلی(27اکتوبر2021) ٹیلیفونک جُستءُپُرس چھبار(ایران)
اَشرپؔ محمود(25اگست2021)جُستءُپُرس، گْوادر
