آزمانک: بہشت ءِ سئیل۔ اصغرلعل
آزمانک
بہشت ءِ سئیل
اصغرلعل
آئی ءَ اَلماری پچ کُت گنجیں گُدانی تہا سیاہ گچین کُت اَنت ،نِشت اِستری اِش کنگ ءَ لگ اِت۔
آئی ءَپِت ءِ بیرانی ھوش نہ کنت بلے مات آئی ءِ چمانی دیم ءَ گُٹّگ ءِ نادْراہی ءَ روچ پہ روچ وَران کُت ءُ قبر ءَ سرکُت۔آئی ءَ چہ وت ءَ کستریں یک گہارے ہست اَت منگوپیر ءَ وتی دُور سیادانی تہا سُور ئِےداتگ اَت۔آئی ءِ گُہار ءَ آ مدام گُشت’’ من تئی واستہ جِنکے چاراں سُور بہ کن، تو تہنا ئے ،جنجال ئے،تئی عمر ھم چِلّ سال ءَ گْوستگ‘‘۔آئی ءَ ہر وھدے سُور ءِ حیال اَتک آئی ءَ گوں ھمے گپ ءَ وت ءَ دلجم کُت کہ ’’لُنڈی بادشاھی اِنت‘‘۔
آئی ءَ گُد اِستری کُت اَنت ،جانے شُشت ءُ گْور ءَ کُت اَنت ،آدینک ءِ دیم ءَ اُوشتات سر ءِ ھُشک کنگ ءَ۔
’’اِے سیاہیں گُدانی گْور ءَ کنگ ءَ لوگ ءَ منی ساہ پُر بِوگ ءَ نہ اِنت گُڑا اِے گرمی ءَ من چون شُت کناں۔۔۔۔۔۔‘‘آدینک ءِ دیم ءَ اُوشتاتگ اَت وتی دیم ءِ ہیداں پہک کنگ ءَ اَت ءُ گوں وت ءَ گپ ءَ اَت۔’’گوں اِے سیاہیں گُداں دانکہ منگوپیر ءَ بِہ رساں(سربہ باں) منی جِند سیاہ ترّیت‘‘۔
آئی ءَ پدا اَلماری پچ کُت ،اِسپیتے جوڑہے نرمیں گُد کش اِت کہ اِے گُدآئی ءِ گُہار ءَ گْوستگیں عید ءَ سوگات کُتگ اَت اَنت۔اِستری ئِے کُت اَنت ءَ گْورءَ ئِے کُت اَنت نوں وت ءَ سُبک مارگ ءَ لگ اِت ،چہ لوگ ءَ دَر اَتک۔
ماہے یک رَندے منگوپیر ءَ وتی گُہار ءِ لوگ ءَ روگ آئی ءَ پہ وت ءَ فرض لیک اِتگ اَت۔
چہ آئی ءِ لوگ ءَ منگوپیر ءِ بس ءِ اسٹاپ دُور نہ اَت، آ پیدل روان اَت ،ہید چہ آئی ءِ پیشانیگ ءَ پیداوَر اَت اَنت ،دَم پہ ساعت گوں دست ءِ کسانیں اِسپیتیں دَزمال ءَ پیشانیگ ءِ ہید ئِے پہک کُت اَنت۔دَگّ ءِ اِے کش ءُ آ کش ءَ گْوزوکیں زالبول ئِےگوں “سیاہیں” بُرکاءَ دیست اَنت آ سک پدرد بوت ءُ آ ہانی بے وَسی ءِ سرا بش بش وَرگ ءَ لگ اِت۔
آمنگوپیر ءِ بس اسٹاپ ءَ سر بوت،بسے اُوشتاتگ اَت کہ روگ ءِ چِن ءُ لانچ ءَ اَت بس ءِ دیم ءَ شست نمبر تْرپگ ءَ اَت۔آتہا پُترت جنینانی سیٹ ءِ پُشت ءَ سیٹے حالیگ اَت نِشت،بس ہارن جنان ءَ درآہان بوت۔بس کمو دیما شُت آ ئی ءَ پُشتہ نندوکیں مردمانی نیمگ ءَ نگاہ شانک دات اَنت ،کسے گوں موبائل ءَ دلگوش اَت ،کسے ءَ چہ لیمارکیٹ ءَ کُکّڈ گپتگ اَت گوں ھماہاں دلگوش اَت ءُ کسے وتی کش ءَ نندوکیں مردم ءَ گوں گپ ءَ اَت۔
’’اِے دْرستاں زانتگ کہ گرماگ اِنت ءُ سیاہیں گُد گیش گرم بیت پمیشکا اِیشاں چہ کسے ءَ سیاہیں گُد گْورءَ نہ کتگ‘‘۔آئی ءَ دل ءِ تہا گُشت ءُ پدا دلگوش ئِے گوں بس ءَ لگ اِتگیں سوت ءَ کت،بس ءِ اِنجن ءِ توار ہمنچوباز اَت کہ سوت ءِ توار آئی ءِ گوشاں شرّی ءَ نیاھگ ءَ اَت۔بس روان اَت،گْوات ھم کشّگ ءَ اَت۔گاڑی وھدے گولیمارءِ قبرستان ءَ پُترت کُنڈے ءَ بِِرک ئِے کُت،گوں بس ءِ اُوشتگ ءَ جنینے گوں وتی دوازدہ سالی نوک ورنائیں بچک ءَ لِک کپت زالبول ءَ سیاہیں پھٹانی بُرکایے سر ءَ اَت ،آ ئی ءِ دیم ءِ سیٹ ءَ نِشت ۔نندگ ءَ گوں بُرکا ئِے سر ءِ دُور کُت،آئی ءِ سر ءِ ہید اَنچو آئی ءِ نرم ءُ نازُرکیں گُلانی سرا رِچگ ءَ اِتاں گشئے کہ کئور ءِ بند ءَ سِستگ۔آ جنین ءِ گین شرّی ءَ پُر بوگ ءَ نہ اَت ،آئی ءَ وتی سر چہ دْریگ ءَ ڈَنّ کش اِت ،آئی ءِ سُہر ءُ سیاہیں مُود گْوات ءَ شِنگینت اَنت،دَمانے ءَ سارتیں کوش ءَ آ چہ دُوزہیں گرم ءَ کش اِتگ اَت ءُ بہشت ءَ سئیل ءَ بُرتگ اَت۔آ بہشت ءِ سئیل ءَ اَت کہ گوں بس ءِ بِرک ءَ گُڈ اِت سرئِے توک ءَ کُت ۔چُکّ ءِ چم مات ءَ سک اِتاں ،مات ءَ نِگایے چُکّ ءِ نیمگ ءَ چار اِت پدا گوں ڈَنّ ءِ سارتیں گوات ءَ گار بوت۔