مردم زانتی : باقی بلوچ ..
نبشتہ کار: ارشاد عالم 

چندے ھنچیں بلوچ سیاستدان. لبزانتءُ شاعر گوستگ انت کہ ھر وھدءَ گیر آرگ بنت چہ اشاں یکے باقی بلوچ ات کہ اے مزن نامیں سیاستکار بے برمشءُ بے تواری اچ ما سستءُ جتا بو۔ باقی بلوچ ءَوانگ ءِ زمانگءَ گوں شاعریءُ سیاست ھبءُ واھگ داشتءُ مکرانءِ وانندگیں مردمانی تہا شمار بوت۔
مچات بلنگورءِ اے ورناءَ گورنمنٹ کالج لاہورءَ بگر داں پاکستانءِ پارلیمنٹءَ وتی نامءُ توار بُرز کت. باقی بلوچءَ سیاستءِ بندات چہ وتی بُنکی میتگ بلنگورءَ کت۔ اودءَ لوکل الیکشنءَ بہر زرتءُ باسک بوت. باقی ءِ زانتکاری، مردم دوستی ءِ سببءَ مکرانءِ وانندگءُ سرکیلیں مردماں شست ءِ دھکءَ ووٹءَ اوشتارینت کہ آئیءِ دیم ءَ  شے عمر گچکی اوشتاتگ ات۔  آ زمانگءَ مکران، آواران، کولواہ یک سیٹ یے  ات۔باقیءَ باج بُرت.بلوچستانءُ مکرانءَ بووکیں ھمک زلمءُ زورانی ھلاپءَ توار چست کت۔ آ زمانگءَ گیشتر سیمسرانی سرءَ جنگءُ جیڑہ بوتگ ات انت۔
باقی بلوچ ءِ گُشتانک سک نامدار بوتگ انت وھدے کہ باقی بلوچ ءَ اسمبلیءَ گشتانک داتگ اسمبلی چہ مکتبی آں دپ ماں دپ بوتگ۔  پنجاب یونیورسٹی ءِ جنکءُ بچکیں مکتبی باقی ءِ گشتانکانی گوش دارگءَ شتگ انت.ءُ نامداری  ءِ سببءَ بلوچ جنین آدم دوچ ءِ نامءَ اوں باقی بلوچ ایر کن اَنت ۔
ھمے وھداں باقی بلوچ ءِ سرءَ بھیڑ آرگ بیت ھسپتال چَہ مھلوکءَ سرریچ بیت،  ھر کس گشیت کہ من ھون دیاں۔ ھمے وھداں حسین سُہروردیءِ نماسگءُ باقی بلوچ ءِنیامءَ عشق بیت ءُ کورٹ میرج کن انت۔ بلے لہتیں روچءَ رند  سُہروردی ءِ نماسگ چَہ باقی بلوچءَ جتا کنگ بیتءُ لندنءَ دیم دیگ بیت۔سُہروردی ءِ نماسگ شاھدہ جمیل ءِ نامءَ زانگ بیت شاھدہ جمیل ءِ جتائیءَ پد ، باقی بلوچ سرءَ پہ دیوانگیءَ کش ایتءُ ھیروین ءِ نشہ کنت۔وتی پشت کپتگیں زندءِ روچاں کراچی بھادر آبادءِ فلیٹ ءَ گوازین ایت۔ بلے وتی سمل ءِ یاتءُ زھیر انگت آئیءِ زردءَ بندوک بنت۔
نوزدہ سدءُ نودءُ ششءِ گڈی ماہاں یا نوزدہ سدءُ ھپت ءِ بنداتءَ ھما سالءَ کہ روتاک رَھبر نوکی چھاپءُ شنگی ءِ سیمسران اَت،  اِے وھداں منی ناکو واجہ اکرم دشتی ءُ بلوچی زبان ءِ پٹءُ پولکار واجہ بشیر احمد بلوچ کراچیءَ گلشن اقبالءَ واجہ معظم علیءِ لوگءَ داشتگ ات، گڑا مگربانی وھدءَ باقی بلوچءَ ٹیکسی یے گپتگ ات، اتکگ ات داں شپ ءَ دیراں دیوانءُ مجلس ئِےکتگ ات۔
آئیءَ سیاست. وتی ھندءِ ھالءُ اھوالءُ شکار ءِ بابتءَ سک جستءُ پُرس کتگ ات۔  منی ناکوزتک عنایت آ وھدءَ ایس ایم لا کالجءَ وانگءَ ات ءُ باقی بلوچ ءِ جن شاھدہ جمیل کالجءَ پروفیسر ات گڑا باقی بلوچءَ شاھد جمیلءِ بابتءَ بازیں جستءُ پرسے کت ءُ وتی زرد ترھینت.
باقی بلوچ ءُ عطاشاد ءِ دروشم ءِ تہا باز ھمگونگی ھست ات۔ باقی ملنگ تبیں عاشقے ات کہ وتی عشق ءِ سرءَتاں گڈسرءَ ھم کمیٹڈ ات۔ آئیءَ وتی عشق ءِ دیوانگی ءَ چَہ سیاست ءُ لبزانک ءَ چِہ دستءَ شت انت.
دنیگتءَ کس سرپد نہ انت کہ بوت کنت کہ باقی ءَ چہ سیاست ءِ راہءَ گسر کنگ ءِ واستا اے سازش کنگ بوت.
یکءُ دو روچ بوتگ ات کہ باقی بلوچ نیاتک ما واجہ بشیراحمدءَ جست کت کہ باقی آھگءَ نہ انت گڈا بشیراحمد بلوچءَ فون کت باقی بلوچءَ گشت کہ بلنگور ءَ چُک اتکگ انت گولیمارءَ روگءُ آیگءَ آں. ھمے وھداں باقی بلوچ ءَ دلءُ لاپ ءِرچگ ءِ زَنگ جت ءُ گشت اگاں ڈاکٹر مجید ءِ ھسپتالءَ برواں من گپڑے ٹیسٹ پرماھیتءُ جنجال کنت۔
اشکنگءَ شاھدہ جمیل ھمے وھدءَ بھادر آبادءَ باقی بلوچ ءِ چارگءَ پہ دمانے شتگ. یکءُ دو ماہءَ پد باقیءَاے کوڈھیں دنیا یلہ کت بگندے باقی بلوچ ءِ ارواہ ھمنچو مھتل بوتگ ات کہ شاھدہ جمیل آئیءَ بہ گندایت.