بلوچ ءُ شائر عمرمُراد
بلوچ ءُ شائر عمرمُراد
،،چار دانک پہ ھنیپ بلوچ ءَ،،
من وتی چماں کہ وتارا کمو باز گندگ بندات کُت بزانکہ منا اے دؤر ءَ بلوچی نبشتہ ءُ وانگ ءِ ھُب ودی بوت 2000 ءِ سال اَت۔بلوچ چاگرد بازیں ووٹاں ریپنگ ءُ چکپروش کُنگ بوتگ ات،ھچ وڈیں دیمروئی ءُ آسراتی نہ بوھگ ءِ سوْب ءَ بلوچ زندمان یک دائمی نااُمیتی ءَ مان شانتگ ات۔مُشرّپ ءَ نواز شریف تاچینتگ ءُ وت ھاکم جوڈ بوتگ ات۔بلوچ شائر شائری کنان اَت اَنت ءُ اُستاد نورخان بزنجو گوں گیچینی شئیراں وتی آواز ءِ سِہر ءَ تسلا دیان ات،ٹپیگیں دلاں واد جنان ات،ھمے وڈ بلوچی تاک ءُ ماھتاک ھم شنگ بوھگ ءَ اِت اَنت کلمکار گوں جوانیں رنگے ءَ وتی چاگرد ءِ تب ءُ مارشتانی زبان جوڈ بوتگ اِت اَنت۔ھمے دؤراں روچ پہ ھپتگاں، ھپتگ پہ ماھاں، ماہ پہ سالاں گوزان اِت اَنت۔وھد ءِ نہ اوشتوکیں سَپَر برجاہ ات اناگہ بلوچ سیاست ءَ وتی رنگ مَٹ کُت۔کاگد ریچگ بِنا بوت بلوچ رھبراں گُشتانک ءُ روانک بنا کُت اَنت۔بالاچے ودی بوت نواب اکبرے چِست بوت گُلام مھمدے ھرشہر ءُ میتگ ءَ گُشتانک دیان ات، کہ ما گوں پاکستان ءَ ھچبر ھوار نہ بوتگیں نہ ئیں ءُ ھجبر نہ بیں بلوچ وت وجہیں راجے بوتگ وتی واجہ وت انت ءُ وت بیت ءُ ھک ءُ دل جنگے ھم بِنا بوت۔بلوچ ءِ نااُمیتی پہ اُمیتے ءَ سر کشّان بوت نوں راہ گیشتگ ات یا پاکستان ءَ مَنّوکیں گَلانی ھمراہ بو یا واجہ گُلام مہمد ءُ بالاچ ءُ اکبر ءِ ۔بلئے بنداتی وھداں نشنل پارٹی، بی این پی مینگل ءُ دگے باز آزاتی منوکانی ھک ءَ گپ جنان اِت اَنت،پمیشکہ بلوچ مھلوک گوں بلوچ زُرمبِش ءَ ھوار بوت۔بلوچ ءِ ھمُک شائر گُشندہ ھر پِڑ ءِ مردُم جُنز ءِ منوگر جوڈ بوت انت۔ھنچوکہ منی بُنگپ بلوچ ءُ شائر اِنت ھمے وڈا اے جُنز ءِ بندات ءَ ھمک بلوچ شائر آشوبی شئیر پر بندان اِت اَنت ءُ گُشندہ ھم پہ پہر ءُ شان آجوئی جنز ءِ واستہ الھانگ ءَ انت۔پہ بلوچ ءِ پاد کنگ ءُ آزادی جُنز ءَ ھوار بوھگ ءِ درس ءَ دیان اِت اَنت ھمُک شائر وتی جُھد ءَ ات کہ من وتی توک ءِ بلوچ ءَ ءُ شائر ءَ ھردُکاں زندگ بِداراں۔ھنیپ بلوچ ھمے اھد ءِ ورناانت ھمے اھد ءِ شائراِت ھمے رنگ ءَ جُنز جُنزان ات۔ پاکستانی لشکر ءِ زوراکی گیش بوھان بوت پاکستان ءَ نواب اکبر چہ بازیں مُدتے ءِ جنگ ءَ پد شہید کُت، پدا بالاچ ھم شہید بوت بلوچستان بُن ات،ھرگور ءَ آس ءُ ھون ات اَنت، گُلام مہمد ءُ لالامنیر ءُ شیر مہمد کہ بلوچ ءِ رھشون اِش آوار جت ءُ بُرت اَنت۔گاڈیانی پُشت ءَ گِرّان کُت انت شھید کُت ءُ ماں مُرگاپ ءَ ٹپ ءُ ٹوریں جون چگل دات اَنت۔تاں اے وھداں انگت بلوچ شائر ءَ وتی بلوچ زندگ داشتگ اَت پہ شہیدان ءُ آواریناں شئیر نبشتہ کناں بوت اَنت۔ جنگ ءَ دراج کَشّ ات پاکستان ءَ راھبراں ھوار شائرانی آوار جنگ بندات کُت۔انور ساھب ھان آوار جنگ بوت نوں گُڈا بازیں شائر ءَ ھمے اُزر ءُ نیمون دیم ءَ آورت کہ ما بس شائریں کلمکاریں مار ءَ گوں جُنز ءُ سیاست ءَ کار نیست۔ آشوبی شئیر کم تَرّان بوت اَنت شائراں وتی بلوچ کُشت ءُ شائر زندگ دارگ ءِ جُھدے بنا کُت۔بلوچ بوگ ءُ شائر بوگ گران بوت کہ یا آوار بو یا شہید بو یا درمُلک بو یا کوہ ءَ برو پہ ایوک ءَ شائر بوگ ءَ وتی لوگ ءَ بہ نند کتاب بوان ماھانہ لبزانکی دیواناں بہر بزُور ءُ نوکری ئے ھم شوھاز پہ نوکری شوھازگ ءَ گُڈا پارلیمنٹ راھبر ءِ کؤش الم سرا کنگ لوٹ اَنت۔
بلئے بلوچ ءِ شائر ءَ اے چیز نہ زانت کہ بلوچستان روس ءُ امریکہ ءُ لندن نہ اِنت کہ تو وتی بلوچ ءَ کُش ءِ ءُ ایوک ءَ شائر ءَ زندگ دارئے تئ چاگرد ءَ یک گِسے ءَ مرچی دو سالونک شھید بوتگ دو چہ بالی گُراب ءَ دور دیگ بوتگ،دو انگت بیگواہ اِنت۔ تو وتی شئیر ءَ چے پئیم نبشتہ کن ئے؟ تئ چاگرد ءِ درد ءُ وشی چی اَنت؟ مرچی بلوچ چاگرد تئ ھمے شئیر ءَ وانیت ءُ گوشداریت کہ
بلئے بلوچ ءِ شائر ءَ اے چیز نہ زانت کہ بلوچستان روس ءُ امریکہ ءُ لندن نہ اِنت کہ تو وتی بلوچ ءَ کُش ءِ ءُ ایوک ءَ شائر ءَ زندگ دارئے تئ چاگرد ءَ یک گِسے ءَ مرچی دو سالونک شھید بوتگ دو چہ بالی گُراب ءَ دور دیگ بوتگ،دو انگت بیگواہ اِنت۔ تو وتی شئیر ءَ چے پئیم نبشتہ کن ئے؟ تئ چاگرد ءِ درد ءُ وشی چی اَنت؟ مرچی بلوچ چاگرد تئ ھمے شئیر ءَ وانیت ءُ گوشداریت کہ
۔۔۔۔منا دشتی نہ زُوراَنت
من کیچی ءَ گِراں،،،،،
موسم وش اِنت بِراں سئیل ءَ بِراں،،،،
جی نہ دل یکیم بو اے شئیر ءِ بندگ ءَ تو وتی شائر زندگ نہ داشتگ تو ھما روچی کہ وتی بلوچ کُشتگ ھما روچ ءَ تئ شائر ھم مُرتگ وتی دل ءَ جم کن۔
ھنیپ بلوچ اے دوئیں دَھکاں وتی شائر ءُ بلوچ ءَ زندگ دارگ ءِ جُھد ءَ اِنت۔ھنیپ بلوچ ءِ ھوار ایں درد ءُ وشی ءِ زبان انت ءُ ھنیپ بلوچ یک مُھکمیں سُہر چمّیں بلوچے ءُ جوانیں چہر ءُ شُبین، جمالات ءُ نوکیت ءِ زندگیں چیدگے ھنیپ بلوچ ءِ ھر عمل پہ بلوچ ءِ باندات ءَ پہ روشنائیں روچے ءِ شوھازاِنت ءُ ھنیپ بلوچ ءِ شائری کہ من گوشداشتگ ءُ ونتگ وتی اھد ءِ تب ءُ مارشتانی زُبان اِنت۔ نہ زاناں نگد کار پرچا ھنیپ بلوچ ءُ فضل شیر ءُ دگہ بازیں شائراں گندگ ءَ نہ اَنت۔
اے تُرس آماچی اِنت یا تعصب اِنت بلئے ھنیپ بلوچ منی ھیال ءَ یک ابدمانیں شائرے ءُ زندگ ءُ زاھریں بلوچے ھنیپ بلوچ ءِ شئیرانی دپتر ،، کرومَگ،،، یک سرجیں شئیری دپترے من کرومگ ءِ وانگ ءَ چہ پَد پہ پَہر گُشاں کہ ھنیپ وتی شائر ءُ بلوچ ھردُکانی زندگ دارگ ءَ سوبین بوتگ۔کمی ءُ پیشی ھمک انسان ءِ تہا مان بلئے کرومگ ءِ گیشتر شئیر شئیری لوٹاں پیلو کنگ ءَ اِنت۔من بس پہ درور ھنیپ بلوچ ءِ چندے شئیر نبشتہ کناں وانوک وت بے ریا انت ھنیپ ءِ ازمی بستار ءَ گیشین اَنت۔
چونیں ارزشتے زمانگ ھُشکیچیں نان ءَ جتگ
ما وتی گُرس ءَ وتا پرزونگ ءِ جان ءَ جتگ
روچگیں روچے تاں بیگاھ لبز پیشکانڈاں ھنیپ
آزگیں ٹپاں وتارا گُنگیں الہان ءَ جتگ
یا
سنگ رودینتگ جبین کلپیں ھیالانی زِہ ءَ
درد کرپاسیں نَدگ پُلیں گُماناں رَمبینت
چاگلے ترمپ تَرھینت گریشگیں ھوشامے لداں
دیدگاں رھن دل ءَ آپَتیں آپدان کُمبینت
یا
اوستانی گریشگاں دل ءِ پیڑاپ بُتکگاں
ھورکیں زہیر ءِ کاسگ ءَ واری گوْر ءَ کُتگ
شِیواریں دیدگانی دڈانبیں دل ءَ پتو
گردو گُباریں ملپداں گاری گوْر ءَ کُتگ
یا
شَکل ءُ شہدیں زِرئے جنگ پاھو ءَ چَکّاں دل ءِ
چَپّڑاں تیر وارتگیناں ایمنی تُرکاں دل ءِ
اُشتِری کوھیں ھسدے ھرکس ءَ رودینتگ اَت
کئے گوں اوپاراں تمردی پَچ بکنت گُکّاں دل ءِ
مزھب ءَ تُرند آپ وارینت مکتباں بے مہری ءِ
رھم کنت سنگیں ھُدائے سُجدگاں جُکّاں دل ءِ
چونہا لہڑ ماں کپاتاں کِرم بنت ھروچ ھنیپ
سر وتیں گوریچ ءِ اَمسِرکاں دَرا ٹُکّاں دل ءِ
چریشاں ابید ھنیپ بلوچ ءِ شئیرانی دپتر ءَ باز بے دروریں لچّہ ءُ دستونک مان کہ ھنیپ ءَ نمیران کن اَنت ءُ من ھنیپ ءَ یک جوانیں شائرے سر پد باں اے ھنیپ ءِ کمال انت کہ وتی شائر ءُ بلوچے تاں روچ ءِ مرچی زندگ داشتگ انت۔ منی اے چاریں دانک ھنیپ ءَ مستر ءُ کستِر کُت نہ کن اَنت ھنیپ ءِ کِرد وت پدّراِنت ءُ ازم ءَ آوکیں وھد پدّر کنت۔من ھمینچو گُشاں کہ چہ گرومگ ءِ وانگ ءَ پد من لاچار بوتاں کہ اے چاریں دانکاں بہ نویساں۔
3 فروری 2021