دستونک

شائر: بــرجــان بــلـوچ

بلوچ ورنایانی نام ءَ

تو اگاں بودیگی ئے نوکیں جھانے در بہ گیج
وانگ ءَ در بر زمین ءُ آزمانے در بہ گیج

شیرکن ءُ گمواری دانکے زند بکش اِیت مردم ءَ
انچیں وشیں مھروانیں جی ءُ جانے در بہ گیج

واجھی لوٹ ئے اگاں برات ءِ گلام بے پیسر ءَ
پہ شدیگاں پیش بہ کپ سیریں نکانے در بہ گیج

شیشگ ءِ ساھیگ ھیداں ھشک کنت باور مہ کن
روچ تْرند اِنت بْرانز پھریزیں نوانے در بہ گیج

کینگ ءِ سیاھیں شپاں رژنا بہ کنت اِنت پہ ترا
زانت ءِ انچیں نگرہ دْرنزیں ماھکانے در بہ گیج

پیلّوشین اِیتءُبہ سوچ اِیت اِنت بدیں بد زردیاں
مُنّھ ءُ داگ ءُ جلیں تژن ءُ شگانے در بہ گیج

واھگ ءِ واھند ءِ شوھاز ءُ سلاماں سر گر اِیت
انچیں پاک پگریں وپا ءِ کاروانے در بہ گیج

تو ابدمان ءُ نمیرانی ءِ لوٹوک ئے اگاں
چہ نپ ءُ سیتّ ءَ چہ سر ریچیں زیانے در بہ گیج

من بلوچی دوداں در گیجان ءُ تو برجان برو
پُر مڑاہ ءُ منگھانی مکرانے در بہ گیج