بلئے پدا آئی ءَ اے پڑ یلہ داتگ ءُ نبیسگ ءِ نیمگا اتکگ۔ (ترکی ءِ نامداریں گدار نبیس اورحان پامک ءِ ہم ہمے واہگ بوتگ کہ من عکس کارے بہ باں، بلئے آئی ءَ ہم رند ءَ عکس کاری یلہ داتگ ءُ گدار نبیسگ بندات کتگ ءُ لبزانک ءِ نوبیل داد گپتگ)
یاسوناری ءَ 1920 ءَ ٹوکیو امپیریل یونی ورسٹی ءَ لبزانک ءِ وانگ بندات کتگ ءُ چار سال ءِ تہا آئی ءَ گریجویشن سرجم کتگ۔ لبزانک ءِ تہا کاواباتا ءِ سوبمندی 1925 ءَ بندات بیت کہ آ وتی اولی گدار ءَ شنگ کنت۔ اے گدار ءِ کسہ آئی ءِ وتی سرگوست اِنت کہ آ ورنائی ءَ یک ناچی ئیں جنکے ءِ سرا شیدا بیت۔
یاسوناری ءَ گدارانی ہمراہی ءَ جوانیں آزمانک ہم نبشتہ کتگ۔ آئی ءِ یک آزمانکے ءِ نام “درچک ءِ سرا” اِنت۔ اے آزمانک ءَ آئی ءَ دو گونڈو ءِ کسہ آورتگ۔ کیوکے ءُ مچیکو آزمانک ءِ کارست اَنت۔ کیوکے ءِ مات ءُ پت ءَ لوگ ءَ مدام جنگ کتگ۔ آ وتی پت ءُ مات ءِ دائمی جنگاں چہ بیزار بیت ءُ مدام کیت درچکانی سرا نندیت کہ جنگ ءِ وہد ءَ مات ءُ پت آئی ءَ مہ گندنت۔ چوناہ ءَ کیوکے اے بابت ءَ دگراں ہچبر نہ گشیت کہ من درچکانی سرا پرچا در کپاں، بلئے مچیکو ءَ حال دنت ءُ گشیت اے یک رازے من ترا گشان ئِے۔۔۔۔۔
منی پت ءُ مات ءَ مدام جنگ کتگ۔ منی مات ءَ من ءَ گشتگ کہ من ترا زوران ءُ رواں وتی مات ءُ پت ءِ لوگ ءَ۔۔۔ بلئے من ءَ آیانی لوگ وش نہ بوتگ۔ پمیشکا من ہر وہد ءَ تتکگ ءُ باغ ءَ درچکانی سرا چیر بوتگاں۔ آئی ءَ من ءَ شوہاز کتگ بلئے من وت ءَ انچو چیر داتگ کہ آئی ءَ من ءَ ہچبر نہ دیستگ۔
پدا کیوکے مچیکو ءَ گشیت نوں دگہ روچ ءَ تو ہم بیا ہمے درچک ءِ سرا ما نندیں، وانیں، وتی اسکول ءِ کاراں کنیں۔ پدا ما شریں نمبراں گوں پاس بیں۔ سرجمیں باغ ءَ بچار چنچو جلواہ ناک انت۔ ہر نیمگا درچک انت ءُ پدا آیانی چنچو تاک اَنت کہ شپر شپر کن انت۔ ادا مارا چہ دُور ءُ نزینک ءَ کس نہ گندیت۔۔۔۔۔ پدا کیوکے ءُ مچیکو داں دو سال ءَ درچکانی سرا بنت ءُ واننت۔ اے راز دو سال ءَ پد پاشک بیت۔۔۔۔ آ ہما درچک ءِ سرا کہ نند اَنت۔ آ وشیں جاہے بیت۔ پدا لہتیں انچیں روچ کیت کہ اودا جِنگ کاینت ءُ چِری چِری کن انت۔ درچکانی تاکاں گوات چنڈین ایت۔ آ چہ زمین ءَ اینچو دُور نہ بنت۔۔۔۔ بَلے آ دوئیناں انچو گمان بیت کہ ما ادا وتی مہرانی دنیا ءَ نشتگیں۔۔۔۔ ادا مارا کس نہ گندیت۔۔۔۔ بلکیں ما یک وشیں دنیایے ءَ چہ زمین ءَ باز دُور نشتگ ءُ وشیں زندے گوازینگ ءَ ئیں۔۔۔۔۔۔
اے کسہ اسل ءَ گونڈوانی نفسیات ءِ سرا نبیسگ بوتگ کہ لوگی جنگ ءُ جیڑھ آیاں چوں چہ لوگ ءَ دُور کنت ءُ آ آرام ءُ تاہیر ءِ شوہاز ءَ کُجا رؤنت۔۔۔۔۔۔ کاواباتا ءِ کسہ گیش ءَ چہ گیش چیدگی انت۔ من کہ اے کسہاں واناں بوتگاں۔۔۔ انچو گمان بوتگ کہ من وابے گندگ ءَ یاں۔۔۔۔ کسے اپس گاڑی ءَ سوار اِنت ءُ آئی ءِ دل لوٹیت کہ منی اپس گاڑی ءَ جنکے سوار بہ بیت ءُ من گوں آئی ءَ گپ بکناں۔۔۔ کسے چہ چاگرد ءَ تچگ لوٹیت کہ منی مہر پرچا چہ من دُور روان اِنت۔ کسے کار ءُ بار کنگ لوٹیت ءُ اے گپ ءَ منارینگ ءِ واہگ دار انت کہ منی لوگی بزانت من کار ءُ بار کت کناں۔۔۔۔ جاپان ءِ مہلوک ءِ نفسیات، جنسی واہگ، ابیتکی ءُ بے قراری۔۔۔۔۔ ادا بازیں رنگے پدر بیت۔۔۔۔۔
برے برے من یاسوناری کاواباتا ءَ کہ وانگ ءَ باں۔۔۔ من ءَگمان بیت کہ من واباں۔ جاہے نشتگاں۔۔۔۔ اسٹیجے ءُ اسٹیج ءِ سرا وڑ وڑیں مردم اَنت کہ کاینت ءُ چیزے کن اَنت۔۔۔۔ بلے کارست نہ زاننت کہ ما پرچا اے کار ءَ کنگ ءَ ئیں۔۔۔
برے برے انچو گمان بیت کہ اے کارست دگہ کس نہ اِنت۔۔۔ منی جند اِنت۔۔۔۔ ادا واب نیست۔۔۔ اے آگہی اِنت ءُ منی اسل زندگی ہمیش اِنت کہ اسٹیج ءِ سرا اِنت۔۔۔ آ زندگی کہ من ءَ دئیگ بوتگ۔۔۔ آ منی زندگی نہ اِنت۔۔۔ آ یک وابے ءُ آ واب باندا پُرشیت۔۔۔۔۔۔ کاواباتا ءِ کسہانی دنیا من ءَ پمیشکا وش بوتگ کہ مردم ءَ برے یک دنیایے ءِ سفر ءَ برنت۔۔۔ ءُ پدا سفر من ءَ وش بیت۔۔۔۔
یاسوناری کاواباتا 1972 ءَ وت کُشی کنت۔۔۔۔۔ ءُ کسہانی تہا آئی ءِ زندگی ءِ بازیں رازے مروچی ہم زندگ اِنت۔