درباری پکیر۔ آزمانکار: غنی پرواز
(آزمانک,,درباری پکیر،، غنی پرواز)
بہار گاہ ءِ وشّیں سَباھے اَت- روچ شرّی ءِ سر ءَ چست ات- مزن شانیں شہنشاہ امریپاکی ءِ دربار بار لگّ اتگ ات- شہنشاہ ھبر ءَ ات ءُ درباری پہ بے ترک ءُ تواری گوش دارگ ءَ اتنت- وھدے شہنشاہ ءَ پہ دم کنگ ءِ واستا کمُکے ھبر بسّ کت گڑا اناگہا یک پکیرے عصا ءَ جِکّ دیان ءَ دربار ءِ توکا پُترت ءُ دیم پہ شہنشاہ ءِ نیمگا شُت- آ یک بُرز ءُ گُشادیں کماشیں مردے ات- آئی ءِ ریشّ ءُ بروت دراج اتنت- ریشّ شنگ ءُ شانگ ءُ بروت بُرز ءَ مِکّ اتنت- دراجیں ھاکی ئیں پشکے گْور ءَ ءُ اسپیتیں پاگے سر ءَ ات ئےِ- گوں شہنشاہ ءِ دیم ءِ رسگا ھاسیں وڑے ءَ ھیر ئےِ کشّ ات-
“ھیر، ھیر، پکیر ءِ ھیر، پکیر ءِ ھیر!،،
شہنشاہ امریپاکی ءَ گوں پکیراں باز دوستی ھست ات- بلے آئی ءَ اے پکیر گوش ئے زانا چہ پیشی پکیراں ھم دوست تِر بوت- پرچا کہ ایشی ءِ ھیر گشگ ءِ وڑ چہ ایدگہ درائیں پکیرانی ھیر گشگ ءِ وڑاں جتا ءُ نوک تر ات- پمیشا آئی ءَ ھما دمان ءَ وتی وزیر امریپسنچی ھُکم دات کہ آ پکیر ءِ ھاجت ءَ پورہ بہ کنت-
“امریپسنچی! پکیر ءِ کچکول ءَ چہ زرّ ءُ سُھر ءَ پُر بکن کہ اے پکیر مناں سکّ دوست بیت-،،
وزیر ءَ شہنشاہ ءِ ھُکم ءِ پدا پکیر ءکچکول چہ زرّ ءُ سُھر ءَ، پُر کت- پکیر ءَ چہ وتی پیسری وڑا ھم جتا ءُ نوکتریں وڑے ءَ وزیر ءُ شہنشاہ ءِ منّت گپت-بلے پکیر چہ پنڈگ ءِ رسگا رند نَے چہ دربار ءَ دراتک ءُ نَے چہ وتی جاگہ ءَ ٹگل اِت-بلکیں انگت ھما جاگہ ءَ اوشتاتگ ات ءُ دلمانگی شہنشاہ ءِ نیمگا چارگا ات- شہنشاہ پکیرانی ھیل ءُ عادتاں سرپد ات-آئی ءَ زانت کہ پکیر ءَ الّما دگہ ھاسیں ھاجتے ھست کہ تنی وھدی پورہ نہ بوتگ-
“دوستیں پکیر! بگْوش ترا دگہ چہ ھاجت ھست؟،، شہنشاہ ءَ گوں پُر مھریں گالوارے ءَ چہ پکیر ءَ جست کت-
ھمیش انت کہ مناں گوں منی مُریداں وتی دربار ءَ جاگہ بدئے- ءُ وتی دربادری پکیر بکن-،، پکیر ءَ وتی اے ھاجت ھنچیں وشّیں وڑے ءَ زاھر کت کہ شہنشاہ ءَ انکار کت نہ کت-
“دوستیں پکیر! تو مناں سکّ دوست ئے پمیشکا من چہ تئی اے ھاجت ءِ پورہ کنگ ءَ ھم انکار کت نہ کناں- بلے منی دربار ءِ لھتیں شرت انت-،، شہنشاہ ءَ پہ شان درّائینت-
“عزت مندیں شہنشاہ! من ءَ تئی دربار ءِ ھر شرت منزور انت-،، پکیر ءَ وتی سر شہنشاہ ءِ دیما جھل کت ءُ عاجزی گْوشت-
“دوستیں پکیر! منی دربار ءِ سئے شرت انت کہ درائیں درباریاں کبول کنگ کپ انت-
اولی شرت ھمیش انت کہ ھچ درباری وتی بروتاں سراں بُرز کت نہ کنت- دومی شرت ھمیش انت کہ ھر درباری وتی بُروان سائینگ کپ انت- ءُ سیمی ءُ مستریں شرت ایش انت کہ ھر درباری ءِ لِلکّ چہ بُن ءَ بُرّگ بیت-،،
چہ شہنشاہ ءِ ھبر ءِ سرجم بوگ ءَ رند وھدے پکیر ءَ ھچ نہ گْوشت ءُ وتی سر چہ پیسری وڑا انگت جھل تر کت-گڑا شہنشاہ ءِ ھُکم ءِ سر ءَ درباری ھجّاماں پکیر ءُ آئی ءِ مُرید شہنشاہ ءِ دیما کتار کت انت- ءُ آھانی بروتانی بُرزیں سر چت انت- بُروان سات انت ءُ لِلکّ چہ بُن ءَ بُرّ ات انت-
پکیر سوناتی ءُ آئی ءِ مُریداں قربانی وَ باز دیگ کپت-بلے اے قربانیانی بدل ءَ آ مزن شانیں شہنشاہ امریپاکی ءِ درباری پکیر جوڑ بوت انت- ءُ آھانی واستا اے یک ھنچیں مزنیں شرپے ات کہ ایشی ءِ رسگا رند آھاں دگہ ھچ ھاسیں چیز ءِ ھاجت نہ مار ات…
٭٭٭٭٭٭٭٭٭٭
گوں طارق پشوکانی ءِ منتواری ءَ
٭٭٭٭٭٭٭٭٭٭
گوں طارق پشوکانی ءِ منتواری ءَ