“آزمانک ” دل، ایمن،، محسن بالاچ”
“آزمانک ” دل، ایمن،، محسن بالاچ”
بیا یک ندارگے کنیں-
یک بازارے، ڈولداریں ماڑی انت، مردم انت،دلوت انت،پُل انت، درچک انت،زمین سبز انت، لوگانی ھدّ ءُ ھبیلاں،نیامجین ءَ چوکہ شاہ دگّے تَل بہ کنت، کؤر ءِ آپ ھمے پیم ءَ انت-پُشدر ءَ بُرزیں موہانی لڑ ءُ کوہانی سرا بُرزیں درچکانی رِد، آھانی سرا ایمنیں جمبرانی ساچ ندارگ ءِ تھا ھرکس ءُ ھرچی وش ءُ آسودگ پیشدارگی انت-ھر”زند،، ءِ بچکند پدّر کنگی انت-منی نیمگ ءَ رنگ ءُ آپ، پنسل ءُ کاگد جاڑیگ انت-تو چے گُشئے؟گوں” زرد،، ءَ منی اولی جُست ،بے پسّو بوت تہ من ھم وتی تُپنگ ءُ کاٹار-وتی نزوریں جان ءِ گوالگ ءَ سُھّر اتاں- منی “زرد،، منا ھچ کار ءَ نئیلیت- چونیں وشیں ھیال کاینت،رؤنت، چونیں جوانیں پگر،سر ءَ چست کن انت ءُ ایرموش بنت-ھچ نہ بیت…. ڈنّ ءَ منی ودار ،منی ودار ءَ انت-ھؤ منا کسے لوٹیت، کسے منا توار پِر کنگا انت- دروازگ ،چہ تہی نیمگ ءَ سُریت-منی پیمیں لاگریں مردے در کپیت-منی پیم ءَ آ ھم ،انچو گُمان بوت چہ “زرد،، ءِ دست ءَ دلگران بوتہ ءُ نوں وتی ودار ءِ جُست ءَ ڈن ءَ دراتکگَ-اد ءَ ھرکس ءُ نا کس چہ وتا گارانت ءُ مروچی ھرچی ءُ ھر نپس ،چو گُشئے وانگ ءُ ھیران انت- مروچی مہلوک ءَ چے بوتگ کہ پہک ءَ چو گُندگدام انت ءُ پہ دیم، لپرزان ءَ-” چیزے،، ءِ ودار ءَ انت…ھؤ زمین ترکّیت ءُ آپ ھیات درکیت، دُرست اش ورنت ءُ آسودگ بنت،جاہ ءُ لوگ، نوک ءُ ڈولداربنت، دگّ ءُ کِشک پراہ ءُ شاھگان بنت،دمک ءُ درساپ ءُ سلّا بنت ءُ بس-” ءُ منی ندارگ ھم توام بیت… چے؟یا موسی وتی عصا ءَ زمین ءَ جنت-یک بلاھیں اژدھایے درکیت ءُ دومی ندیدگیں ، زواکیں اژدھاں چہ ھونڈاں درکنت ءُ وارت ءُ ھلاس کنت ءُ پدا چاگرد چہ زوراکان رکھینیت،جہاں پلگاربیت ءُ مردم وش ھال بنت… نوں زرد، کہ دست ءِ چست کنگ ءُ گامے جنگ ءِ “رضا،، ءَ نہ دنت تہ من ءُ (منی پیمیں) آ لاگریں مرد دگہ چے بہ کنیں-بیدء چہ ودار ءَ-گڑا انگت ودار کنیں؟ھؤ، منزل دُور نہ انت ءُ مئے بھت ءَ اے ھم شریں گپے کہ ما چہ وتی وتی لوگانی در ءَ گِستا نہ ایں، وھدے” ھترے،،بہ بیت تہ زوت وتی وتی لوگاں واترکت کنیں،ءُ وتی ساھاں ڈکگ ءَ نیلیں…. (مئے تیوگیں راج وتا رددات کنت،آئی ءِ ھیال انت کہ اے آئی ءِ Extra Effeciency انت کہ کجام یک کلو نگریں بانے ءِ تھا وتی دُرستیں کلو نگریں زند ءَ گوں ترْندیں تپ ءَ گوازینت کنت… ودار وت یک تپے-اُمیت دارگ وت یک بیمناکیں نادراھی یے)-دیم ءِ ندارگ اے پیما انت کہ چہ ھمے بُرزیں کوہانی سرا مزنیں سیہ گواتے ءَ سرداتگ ءُ مئے دِرتگیں کاپر ءَ ھوالہ انت-اے وَ سیہ گواتے نہ ات- کاپرئےِ تیوگ ءَ پیش پیش کت-نوں کئے کیت ءُ اے پیشاں سر پہ سر کنت ءُ کئے کپتگیں کاپر ءِ دارانی چست کنگ ءَ گوں من کمک کنت- ھؤ، ودار کنگ لوٹیت-کسے ضرور کیت، بایدانت بئیت… لاگریں منی گونگیں مرد یکوھی اوشتگ منا چاریت-زوراک ءِ چماں گُشئے زند ءِ تُشے ھم مان نیست-پدا اینگو آنگو چماں شانک دنت ءُ پدا ودار ءَ جاڑیگ کنت ءُ اُرسُند بیت… طبلے ءِ توارانت- دُور ءِ ڈُھل انت کہ پُر زیمل انت، نزیک ءَ کیت تہ چہ آئی ءِ دیما کسے، تچان ءَ گْوزیت ءُ جارے پرینیت-“مھشر ءِ صُور ھُپّ کنگ بوتگ-نوں بیا ات وتی وتی ھساب ءُ کتاباں بروبر بکن ات کہ شمارا ھرکس ءَ وتی وتی” اصلیں جاہ “بہ رسنت…. ،، مُور مُرت- مُورانی بادشاہ مُرت، موکُو ءَ وتی پُٹ پاتکنت، کِتگ ءَ ھاک ءُ ھاکشانی کت-بلے منی پیمیں لاگریں مرد ءَ، آئی ءِ زرد ءَ نہ مرّینت کہ آئی ءَ وتی دوھیں چم درکت ءُ راہ ءِ سرا ایر کتنت ءُ وت نزیک ءَ شِناّل بوت….
ءُ منی رنگ، آپ ءُ پنسل وتی جاگہ ءَ منی دیما ھما پیم ءَ ،ایر انت- کاگد، ھالیگ انت ءُ من ،دل اُرسُند-