دود ءُ ربیدگ
اسحاق رحیم
(اولی بہر)
دود ءُ ربیدگ یک راجے ءِ پجّار ءِ مستریں وسیلگ زانگ بیت۔ ماں جُلگہ ئیں جہان ءِ زمین ءِ دلبند ءَ آبادیں ھمک راج ءِ وتی جتائیں دود ءُ ربیدگ یا رسم ءُ رواج بنت کہ اے یک راجے ءَ چہ دومی راج ءَ جتا کن اَنت۔بزاں کہ راجانی جوڈ بوگ ءِ یا کہ تشکیل ءِ مستریں سبب زبان ءُ دود اَنت۔
چہ یک راجے ءِ دود ءُ ربیدگاں ھما راج ءِ تب پہ جوانی زانگ بیت کہ اے راج کجام تب ءُ مزاج ءِ واھند اِنت.دود ءُ ربیدگ ءَ اگاں ما راجانی راھبند ءِ نام بہ دئیں تہ رد نہ بئیں۔
دود ءُ ربیدگ مھلوک ءَ گیشین اَنت ءُ آھاں یک راجے ءِ رنگ ءَ دیما کار اَنت.
دود یا ربیدگ ھما راج راھبند اِنت کہ زانت کار ءُ کوّاساں پہ راج ءِ تپاکی،یکجاھی ءُ جیڑھانی دیمگیری ءِ ھاترا جوڈ کرتگ انت پدا اے انچوش گوں راج ءَ بندوک بوتگ انت کہ نوں ھمک راج ءِ مستریں پجار دود ءُ ربیدگ اَنت کسے اگاں ھمے رھبند ءَ وتیگ بہ کنت تہ راج ءِ تھا جاہ گپت کنت ءُ اگاں اے رھبنداں چہ در بئیت آ ھما راج ءَ چہ ڈنّ در کیت۔
پہ درور اگاں بلوچے وتی راج رھبند بزاں دود ءُ ربیدگاں یلہ بہ دنت ءُ دگہ راجے ءِ رھبنداں وتیگ بہ کنت گڈا آ بلوچے پشت نہ کپ ایت ھمے پیم اگاں دری راج ءِ مردمے بئیت ءُ بلوچ ءِ راج رھبند بزاں دود ءُ ربیدگاں گوں زبان ءَ بہ زیر ایت ءُ وتی بہ کنت بلوچے جوڈ بیت پدا بلوچ ھم آئی ءَ درآمد سرپد نہ بیت۔
دود ءُ ربیدگ تھنا بلوچ اِنّاں بلکیں جہان ءِ ھمک راجانی بہر انت بلے گوں وھد ءُ زمانگ ءِ بدل بیگ ءُ آتکگیں دیمروئی ءِ پَجّیگ ءَ نوں پیشی داب پشت نہ کپتگ انت بلے بلوچ ءِ دابیں کوھنَگیں راج انگت ھم وتی ھستی ءِ بنیات وتی دود ءُ ربیدگاں سرپد بنت ءُ آھانی سرا پہر بند انت۔
ھستیں وھد ءِ لوٹ ءُ گزرانی بدل بیگ ءِ پجّی ءَ بازیں دودانی لوٹ مرچیگیں زمانگ ءِ لوٹاں گوں دپ نہ وارت بلے اگاں آھانی پائدگ ءُ سیت چارگ بہ بنت تہ مرچی ھم زانت کار ءُ پولکار آھاں رد کرت نہ کن انت۔
دود ءُ ربیدگ زانتکاراں دوبہرانی تہا بہر کرتگ انت کہ یکے مادی انت ءُ دومی غیرمادی بزاں روحانی انت کہ اشانی سرا یک پہ یک گوں جتائیں بنگپّ ءَ مئے گپ دیما روان کن انت.
اے سرھال ءَ من جھد کناں کہ بلوچ ءِ زندمان ءِ دود ءُ ربیدگانی ھمک پہنات ءِ سرا من جتا جتائیں سرھالاں جتا جتا بہ گیشیناں ءُ آھانی سرا گپ ءَ دیما بران بہ کن آں۔
(روان اِنت)