دود ءُ ربیدگ
_____________
بلوچ راجءِ دود ءُ ربیدگ یک سرجمیں کانودے اگاں بلوچ راج وتی دودءُ ربیدگانی سرءَ کاربند ءُ پاسپاں بہ بیت ءُ وتی دودءُ ربیدگانی ھیالداری ءَ بہ کنت بلوچ ھرچ چیزءِ دیمءَ داشت کنت ءُ وتی گلامیءِ سانکلاں ھم سست کنت ءُ وتی وت واجھیءَ گپت کنت
بلوچ ءِ بھادری ءُ میارجلی. مھمانداری دود اَنت ءُ بھادریءِ واستءَ سِلاہ ءُ سنج ءُ تیر ءُ تُپنگ ءُ زھمءُ اسپر ءُ کاٹار بلوچ ءِ ربیدگ اَنت, مھمانداری بلوچءِ دود اِنت ءُ مھمانءَ ازت دئیگ ءُ نان ءُ آپ بلوچ ءِ ربیدگ اِنت

مستریں چیز زبان اِنت کہ انسانءِ پجار اِنت ءُ چہ زبانءَ دودءُ ربیدگانی گیش ءُ گیوار بیت ءُ اِدا مارا ءُ شمارا پگر کنگ لوٹ اِیت کہ ما پہ بلوچی زبانءَ چنچک ھزمت کُتگ ءُ پَہ ماتی زبان ءِ دیمروی ءَ چے کُتگ ءُ چے کنگی اِنت ، اگاں اِے بارہ ءَ سَسّا ءِ کُمیت تاتکگ وَ باز شَرّ اِنت اَگاں نَہ گُڑا بور ءَ بے لَگام ءَ تَرڈّگ ءَ مَیل این ءُ پہ ھوش ءُ گوش وتی کِرداں دیم ءَ بیاریںءُ وتءَپجاہ بیار اِیں ءُ وتی دود ءُ ربیدگاں گاری ءَ میل اِیں وتی بلوچیءِ سرءَ ءُ وتی گُدءُ پوشاکانی سرءَ وتی میارجلی ءُ دوری چاری ءُ اوپار ءُ مھمان نوازی ءُ مڈاداری ءُ اِدگہ دودءُ ربیدگانی سرءَ پھر ءُ شان بہ کنیں کہ ما ءُ شما بلوچیں ءُ مئے بلوچی مئے ڈیھ بلوچستان مئے گنجیں زر ءُ نیلیں آزمان ءُ مئے بلوچی زبان مئے ءُ شمئے پجار اِیں. او,منی راچ پھر ءُ شانءِ مَل کہ تو میریں بلوچی ئےءِ ءُ وتی دودءُ ربیدگاں زندگ دار کہ بلوچی مئے وتی ننگ ءُ نام اِنت .”

دود ءُ ربیدگانی پادمالیءَ کئی دست مان اِنت ؟
———————————————-
بلوچ دود ءُ ربیدگ چو آدینکءَ ساپ ءُ پلگار گندگ ءُ جاہ کاینت ءُ مئے دود ءُ ربیدگ مئے آدینک ءُ پجار اَنت اے دود ءُ ربیدگانی پھریزگ مئے ءُ شمئے جندءِ سرءَ اَنت کہ ما وتی ساپ ءُ پلگاریں آدینکءَ پولنگ مہ کنیں ءُ مدام آئی سینگارگ ءُ سلہ کنگءِ جھدءَ بہ کنیں ما بلوچ راج ھنچیں راجانی ھمساھگ ءُ ایردستیں کہ آ مئے دودءُ ربیدگانی گاری رندءَ اَنت آ مٰئے پجار ءِ گاریءِ رندءَ اَنت آ مئے زبانءِ گاری ءِ رندءَ اَنت آ مئے گُدءُ پچ ءُ پوشکانی گاریءِ رندءَ اَنت. اگاں آیانی دست برس اِیت آ مئے ڈیھءِ نام ءَ ھم بدل کنگءِ رندءَ اَنت ادا جست ئے پاد کئیت کہ پرچا اے مئے دودءُ ربیدگانی پادمالی ءُ گاریءِ رندءَ اَنت کہ مئے ڈیھ چہ گنجءَ پُر اِنت آ لوٹ اَنت کہ بلوچ راج نیست نابود بہ بنت وتی ڈیھ ءِ گنج ءُ مالانی واجہ وت مہ بنت وتی ھکاںَ مہ زان اَنت ءُ جاھل بہ بنت ءُ پدا چمئے جاھلانی دستءَ آیانی وتی دودانی پادمالی بہ بیت ءُ ھنوں ما ھمے گندگائیں دژمنءِ کاراں ما وت ھمے جاھل آسان کنگائیں ءُ وتی دودانی پادمالیءَ کنگائیں. مئے دودءُ ربیدگ چی اَنت مارا چون پھریزگ لوٹ اَنت اگاں ما لوٹ اِیں وتی دودءُ ربیدگانی پاسداریءَ بہ کنیں گُڑا مارا بلوچ بوگ لوٹ اِیت ءُ بلوچ ءِ بزانت زانگ لوٹ اِیت بلوچ بوگءِ واستءَ مارا اے سپت ءُ وزبت بوگ لوٹ اَنت. میار جلی.ءُ میارانی سرءَ وتی مالءُ ھیشی سراں کربان کنگ زبان ءُ کول ءُ کرارانی سرءَ اُوشتگ. وتی گیرتءِ سرءَ وتی سرءَ کربان کنگ وتی گدءُ پچ ءُ پوشاکانی پھریزگ. وتی کماش ءُ اسپیت ریشانی ازت کنگ ءُ وتی کسترینانی گوما دوستی ءُ مھر کنگ دور چاری ءُ برات دوستی ءُ ھمساھگانی ازت ءُ ھمک بلوچءِ گیرت ءَوتی گیرت زانگ ھمک بلوچءَ وتی برات زانگ ءُ ھمک سیاہ سراں ُوتی سیاہ سر زانگ ءُ ازت کنگ ءُ مھمان نوازی ءَ وتی مھماناں َ ازت ءُ اھترام دئیگ ءِ نام بلوچ ءُ بلوچیت اِنت وھدیکہ ما اے سپتانی ھُدابند بئیں مئے دودءُ ربیدگاں کس پادمال کُت نہ کنت بس مارا اول بلوچ ءُ دومی ھور تپاک بوگ لوٹ اِیت …!!
اَلی جُمّا زامرانی