گیدی کسہ
،،،،،،،
چہ منی کتاب سوداگر6 ءِ گیدی کسھاں چہ یک گیدی کسھے پہ وانوکاں ندر انت ،،،
الی جما زامرانی
، ،،،،،،،،
ھست ات ملکے ملک ءَ ھست ات بادشاھے بادشاہ ءَ وتی ملک ءِ مھلوک سک دوست ات انت آئی بادگیر ءِ درستیں نوکر ءُ مولد ءُ کاردار وتی چک ءُ لوگمان مردم ساب کت ءُ زانت انت ورگ ءِ وھد ءَ آ درست شاھی دربار ءِ کنور جاہ نشت انت ورگ اش وارت بادشاہ ءَ دیر ات سانگ ءُ آروس کتگ ات بلے آئی ءِ لوگ بانک ءَ چک نیست ات بلے بازیں مدتے ءَ رند آئی لوگ بانک امیتی ءُ نھیپگانی بوت اے ھال ءِ اش کنگ ءَ بادشاہ چہ گل ءَ بال بوت ءُ نوھمی ماہ ءَ آئی لوگ بانک چلگ بوت جنکے پیداگ بوت چلگی ءِ وھد ءَ بادشاہ ءِ لوگ بانک بیران بوت بادشاہ سک گمیگ ءُ نہ تاھیر بوت ءُ رنج ءُ گم ءُ اندوھانی آماچ بوت کسانیں جنک نوکر ءُ مولداں شیر دات ءُ میچینت آ نوکرانی گورءَ ات کہ یک روچے بادشاہ گوں وزیرءُ گزیراں شکارءَ شُت آ شپ کپت انت آیانی سر میتگے ءَ کپت ءُ سھب ءَ رمبے کاڑ پہ آپ ءِ آرگ ءَ کورءَ روگءَ ات کہ چیشاں یک کاڑے بادشاہ ءَ دوست بوت بادشاہ ءَ وتی گواجار پہ جنک ءِ پت ءَ برت جنک ءِ پت ءَ گوشت بادشاہ سلامت پاکیں ھاوند شمارا سلامت کنات شما باز لائک ات بلے شما پیسرءَ سانگے کتگ ءُ شمارا جنکے ھست من وتی جنک ءَ ھما شرت ءَ ترا سانگ دیاں کہ شما وتی جنک ءَ چہ بادگیر ءَ دور بہ کن ات چےءَ کہ من وتی جنک ءَ ماتوئی نامے دات نہ کناں اگاں تو وتی جنک ءَ دگرے ءَ بہ دے ات رودینیت ءُ منی جنک بادگیر ءِ شاہ بانک بہ بیت گُڑا من وتی جنک ءُ ترا سانگ دیاں بادشاہ کاڑ ءِ اشک ءَ ھنچو کتگ کہ ماہ ءُ استاراں چہ آزمان ءَ آرگ تیار ات آئی گوشت اے چشیں گپے نہ انت من وتی کسانیں جنک ءَ دگرے دیاں آئی رودینیت تئی جنک ءَ بادگیر ءِ شاہ بانک کناں ،،
بادشاہ پگر کنگءَ لگ ات کہ آ وتی جنک ءَ پہ رودینگ ءَ کے ءَ بہ دنت آئی ءَ ھست ات نوکرے آئی گوں نوکر ءَ گوشت منی اے کسانیں چک ءَ تو بے رودین تئی چک انت شمئے ھرچ ءُ درچاں دیان ءُ شمارا جوانیں بادگیرے دگہ ھند ءُ دمگےءَ بنداں دیاں نوکر کمک پگرءَ لگ ات پدءَ نوکر ءَ گوشت ایشی ءَ من ھما شرت ءَ رودیناں وھدیکہ اے مزن بوت ءُ بالگ بوت ایشی ءَ من ءَ سانگ دے ات بادشاہ اِشک ءِ بور ءَ سوار ات دل ءِ دست ءَ لاچار ات بادشاہ ءَ زانت کہ اے نوکر وپاداریں نوکرے دومی اُمرےءِ مزن انت تاں منی جنک مزن بہ بیت اے آجز بیت باندات باریں دگنیا چے رنگےءَ بیت بادشاہ ءَ وتی نوکر ءِ شرت مَنّ اِت بادشاہ ءَ دو ءُ سے نوکر ءُ مولد ءُ زر ءُ سھر ھمے نوکرءَ دات کہ پلان ملک ءَ بہ رو ات ھمودءَ بادگیرے بہ بند ات نوکر ءَ بادشاہ ءِ کسانیں جنک زرت شُت انت بادشاہ ءَ کاڑ سانگ کت بادگیرءَ آورت ءُ زند ءِ وشیاں دلگوش بوت،
نوکر ءَ بادشاہ ءِ جنک رودینت جنک ھمے سرپد بوت اے نوکر منی پت انت جنک کہمزن ءُ بالگ بوت نوکر نادرواہ بوت ءُ مرگءَ پیش آئی ءَ گوں جنک ءَ گوشت کہ شما پلان ملک ءِ بادشاہ ءِ چک ات من تئی نوکراں ءُ تئی چک آں بلے پہ تئی رودینگءَ من گوں بادشاہ ءَ اے شرت ایر کتگ نوکر ءَ سرجمیں گپ جت ءُ دات انت کہ نوکر ءِ ارواہ ءَ بال کت مردماں کبر ءُ کپارت کت جنک شُشت آئی کبر ءِ سر ءَ گریوگ ءَ لگ ات یکے ءَ جست کت اے کئی کبر انت تو نشتگ ءُ ایشی ءِ سرءَ مودگ ءُ زار کنگ ءُ گریوگ ءَ ات گُڑا جنک ءَ گوشت اے منی پت ءِ کبر انت ءُ اے کبر ءِ تہ ءَ منی چک انت اگاں زندگ بوت ایں منی مرد ءُ لوگ واجہ ات مردم پہ جنک ءِ اے گپاں ھیران ھبکہ بوت انت کہ اے چون؟
بلے اے کبر ءِ تہءَ جنک ءِ نوکر ات نوکر چک ساب انت رودینتگ ےءِ پت ےءِ ساب انت اگاں زندگ بوت ایں بادشاہ ءَ وتی شرت ءُ کول پورو کت ءُ آئی لوگ واجہ ات,, آنگو ھدا بہ زانت چی دروگ ءُ چی راست بلے اے یک گیدی کسھے !!!!!
الی جما زامرانی

دلگوش
اے کسہ من دو رنگ ءَ اش کتگ ھدا بہ زانت کجام رنگ ءَ درست ءُ سھی انت
کسہ ءِ دومی دروشم ءُ رنگ ءِ شوھازکار ،،واجہ آزم سالھ انت،،
نوں من زانت نہ کناں کجام کسہ سھی ءُ درست انت اے گیش ءُ گیوارءَ من وانوکانی سرءَ دیاں،،
الی جما زامرانی،،

گیدی کسہءِ دومی رنگ ءُ دروشم،،

یک جنوزامے بیت آ کبرستانءَ روت یک کبر ےءِ سروناں نندایت ھمے کبرستان ءِ راهءَ راھگوزے گوزگ ءَ ات آئی ءَ دیست جنوزام کبرءِ سروناں نشتگ گریوگءَ انت آ آئی کِر ءَ شُت جست ےءِ کت کہ تو چی ءَ اے کبر ءِ سرءَ گریوگءَ ئے اے کبر کئی اِنت ،؟

گڑا همے جنینءَ پسو دات کہ “اے کبر انت منی پتءِ ءُ کَل انت منی چُک اگاں زندگ بوت ایں گڑا منی مرد اَت” ،
گڑا هما رهگوز ءَ ھبکہ ءُ ھیرانی جست کت اے چتور اے وڑ چوں بوت کنت ،،
جنوزامءَ پسو دات اے وڑ بیت کسو چش انت کہ منی پت اے بازارءِ بادشاه انت اے کبر منی پت ءَ پہ وتی واست ءَ جتگ ءُ تیار کتگ ءُ همے گوشتگ ئے کہ وھدیکہ من بیران بوتاں گُڑا منءَ همدءَ ھمے کبرءَ کَل کن اِت-
پمے ھاتر ءَ اے کبر منی پتءِ بوت ءُ اے مرد کہ اد ءَ کَل انت اے منی شیر ءِ چک اِنت کہ من اے

میچینتگ بلے ایشیءَ اے نہ زانتگ کہ من اے میچینتگ، ایشیءَ وتی سانگ گپ بزاں گواجار پہ منی واست ءَ منی پتءِ گورءَ آورتگ ءُ منی پتءَ هم نہ زانتگ کہ اے منی شیرءِ چک اِنت ءُ منی پتءَ اے پہ من ءَ زرتگ ءُ زامات کتگ بلے من زانتگ کہ اے منی چک ایں من اے شیر مینچینتگ من گوں ایشی آروس کت نہ کتگ
بلے چو کہ پتءَ زبان کتگ آ وتی زبانءَ هچ وڑءَ نہ بج اتگ ءُ آئیءَ وتی زِد داشتگ من لاچار بوتگ آں اے دست وت کشتگ-
گڑا منی پتءَ گوں وتی کار داراں گوشتگ کہ ایشیءَ هما منی جتگیں کبر ءَ بر ات کَل بہ کن اِت،،،
همے ھاتر ءَ اے کبر انت منی پتءِ ءُ کلیں منی چک اگاں زندگ بوتیں گڑا منی مرد اَت،
،،،،،،،،،،،…