” میر گل خان نصیر ” “بلوچستان کا فیض احمد فیض”

میر گل خان نصیر بلوچی کے مایہ ناز انقلابی شاعر ،قوم پرست سیاستدان ،معروف مؤرّخ اور صحافی تھے ۔۔ وہ 14 مئی 1914ء کو بلوچستان کے شہر نوشکی میں پیدا ہوئے ۔۔ ابتدائی تعلیم وہیں نوشکی میں حاصل کی ۔۔ کچھ عرصہ مستونگ میں بھی پڑھتے رہے ۔۔ میٹرک کا امتحان کوئٹہ سے پاس کیا اور مزید تعلیم کے لیے لاہور آ گئے

۔۔
اور ایف ایس سی میڈیکل میں داخلہ لے لیا ۔۔ لیکن اسی دوران آپ کی ایک آنکھ متاثر ہو گئی اور آپ کو پڑھائی چھوڑ کر واپس بلوچستان آنا پڑا ۔۔

گل خان نصیر مستونگ میں پڑھائی کے دوران سیاسی حوالے سے میر عبدالعزیز کرُد ، ملک فیض محمد یوسفزئی اور میر محمد اعظم خان شاہوانی اور دوسرے رہنماؤں کے خیالات سے بہت متاثر ہوئے ۔۔ یہ رہنما اُس وقت ایک خفیہ سیاسی تنظیم ” انجمن اتحادِ بلوچستان ” چلا رہے تھے ۔۔

مستونگ ہی میں گل خان نصیر کی دوستی ملک عبدل رحیم خواجہ خیل سے ہوئی ۔۔ اور دوستی کا یہ مضبوط رشتہ ملک عبدالرحیم کی وفات تک قائم رہا ۔۔ لاہور سے واپسی پر آپ نے بھی ” انجمن اتحاد بلوچستان ” میں شمولیت اختیار کی ۔۔ 1936ء میں جب یہ تنظیم غیر فعال ہو گئی تو بلوچستان کے نوجوانوں نے ” انجمنِ اسلامیہ ریاست قلات” نامی ایک تنظیم کی بنیاد رکھی ۔۔ ملک عبدالرحیم خواجہ خیل اس کے جنرل سیکرٹری منتخب ہوئے ۔۔ جبکہ گل خان نصیر کو صدر منتخب کیا گیا ۔۔

انجمن اسلامیہ قلات بھی زیادہ عرصہ تک فعال نہ رہ سکی ۔۔ 05 فروری 1937ء کو ” قلات سٹیٹ نیشنل پارٹی ” (KSNP) کے نام سے ایک نئی سیاسی جماعت معرضِ وجود میں آئی ۔۔ میر عبدالعزیز کُرد اس کے صدر منتخب ہوئے ۔۔ جبکہ گل خان نصیر نائب صدر منتخب ہوئے ۔۔۔

قلات نیشنل پارٹی نے بلوچستان کی سیاست میں اہم کردار ادا کیا ۔۔ قبائلی سرداروں اور خان آف قلات کے ساتھ اُس کے تعلقات میں بھی بہت سے نشیب وفراز آئے ۔۔ اور قلات نیشنل پارٹی نے عوامی حقوق کا دفاع کیا ۔۔ اور اُس کی پاداش میں اُس کی قیادت زیرِ عتاب بھی رہی ۔۔۔

1948 ء میں قلات کے پاکستان میں شامل ہو جانے کے بعد ” قلات سٹیٹ نیشنل پارٹی” کا خاتمہ ہو گیا ۔۔ گل خان نصیر نے بلوچستان کے حقوق کی آواز اُٹھانے کے لیے مسلم لیگ کے پلیٹ فارم کو استعمال کرنے کا فیصلہ کیا ۔۔ اور مسلم لیگ میں شامل ہو گئے ۔۔ لیکن چند دنوں میں ہی اُنھیں اندازہ ہو گیا کہ مسلم لیگ میں رہ کر کچھ بھی نہیں کیا جا سکتا ۔۔ اس لیے انھوں نے ہمیشہ کے لیے مسلم لیگ کو خیر باد کہہ دیا ۔۔

قیامِ پاکستان کے بعد بلوچستان کی عوام اور سرزمین مختلف حالات و واقعات سے گزرتی رہی ۔۔ میر گل خان نصیر اپنے سرفروش ساتھیوں کے ہمراہ ہر محاذ پر جدوجہد میں مصروف رہے ۔۔ 1973ء میں نیشنل عوامی پارٹی کو غدار قرار دے کر کالعدم کر دیا گیا ۔۔ مختلف چارج لگا کر آپ کو گرفتار کر لیا گیا ۔۔ اور آپ کے بھائی میر لونگ خان کو ایک فوجی آپریشن میں مار دیا گیا ۔۔ واضح رہے کہ اُس وقت مرکز میں ذوالفقار بھٹو کی حکومت تھی اور بلوچستان میں نواب اکبر بگٹی گورنر تھے ۔۔

گل خان نصیر نے اپنی سیاسی زندگی کے مختلف ادوار میں 15 سال جیل میں گزارے ۔۔۔ اور بہت سی صعوبتیں اور تشدد برداشت کیا ۔۔ لیکن مرتے دم تک اپنے نظریات سے جڑے رہے ۔۔ علمی ، ادبی اور سیاسی طور پر جدوجہد میں مصروف رہے ۔۔

آپ نے اردو ، انگریزی ، بلوچی ، براہوی اور فارسی میں اشعار کہے ۔۔ آپ کو ملک الشعرا ء بلوچستان بھی کہا جاتا ہے ۔۔ آپ کی شاعری انقلاب و حریت کی علامت ہے ۔۔ آپ نے سامراج سے بغاوت کو اپنی زندگی کا مقصد بنایا اور شاعری میں بھی بغاوت اور انقلاب کا درس دیا ۔۔ آپ ایک غیر طبقاتی سماج کی تعمیر کے خواہاں تھے ۔۔ آپ کی شاعری ترقی پسندانہ خیالات اور سوشلسٹ نظریات کی عکاس ہے ۔۔

حبیب جالب نے آپ کے بارے میں کہا تھا :
” اگر ‘میر گل خان نصیر’ پنجاب میں پیدا ہوتا تو ‘فیض احمد فیض’ ہوتا اور اگر فیض بلوچستان میں پلا بڑھا ہوتا تو یقیناََ ‘گل خان نصیر’ ہوتا “

گل خان نصیر کو 6 دسمبر 1983 ء کو کینسر نے مار دیا تھا ۔۔ اگر زندہ رہتے تو یقیناََ کسی فوجی آپریشن میں مارے جاتے ۔۔

1962ء میں سویت یونین نے فیض احمد فیض کو لینن ایوارڈ دیا ۔۔ سویت یونین میر گل خان نصیر کو بھی یہ ایوارڈ دینا چاہتا تھا لیکن ایوب خان نے اُن کو ماسکو نہیں جانے دیا ۔۔
2001ء میں حکومت پاکستان کی جانب سے ستارہ امتیاز دیا گیا ۔۔
2001ء میں ایک سروے کیا گیا ۔۔ جس میں علمی ، ادبی اور سیاسی خدمات کے حوالے سے اُن کو ” بلوچ آف دی سنچری” کا خطاب دیا گیا ۔۔

شاعری اور تاریخ پر آپ کی بہت سی کتابیں شائع ہو چکی ہیں ۔۔ جن میں گلبانگ (بلوچی شاعری) ، تاریخِ بلوچستان ( اردو : دو جلدوں میں ) ، سینہء کیچاگہ (فیض احمد فیض کی سرِ وادیءسینہ کا بلوچی ترجمہ ) وغیرہ شامل ہیں ۔۔

آج بلوچستان خاک وخون میں غلطاں ہے ۔۔ اور باقی صوبوں کے عوام تو عوام خواص کی اکثریت بھی اس بات سے لاعلم ہے کہ اس کا پس منظر کیا ہے ۔۔ اور حالات کہاں سے گزر کر اس نہج تک پہنچے ہیں ۔۔ ہمیں اس پر سوچنے ، سمجھنے اور جاننے کی ضرورت ہے ۔۔

میر گل خان نصیر کے اشعار پڑھ کر لگتا ہے ۔۔ کہ یہ آج کے بلوچستان کے بارے میں لکھے گئے ہیں ۔۔ آگ ، خون ۔ افلاس ، تباہی بربادی میں تو ان اشعار میں آج کے بلوچستان کا کرب محسوس کر رہا ہوں ۔۔۔
آپ کیا کہتے ہیں ؟؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گم کردہ راہ میں نہ کوئی ساتھ ہے رہبر
میں مشعل راہ بن کے انہیں راہ دکھادوں
سرداروں کی ہستی نے بلوچوں کو مٹایا
سرداروں کے سر کو میں سر دار چڑھا دوں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کیسے مانوں کہ میرا دیس بھی آزاد ہوا
جب کہ ہے نشہ حکومت وہی ساز وہی
کیسے مانوں کہ یہ اجڑا چمن آباد ہوا
جب کہ ہے زاغ و زغن کا انداز وہی

کیسے مانوں کے فرنگی حکومت نہ رہی
جبکہ ہے جرگہ و جرمانہ و تعزیر وہی
کیسے مانوں کہ غلامی کی مصیبت نہ رہی
بیڑیاں پاؤںمیں اور ہاتھوں میں زنجیر وہی

کیسے مانوں کہ یہاں وقت ہے دلشادی کا
جبکہ کشکول لیے پھرتا ہے مجبور وہی
کیسے مانوں کہ لوگوں کی حکومت ہوگی
جبکہ مسند پہ جمے بیٹھے ہیں سردار وہی

کیسے مانوں کہ یہاں ختم رعونت ہوگی
جبکہ فرعون بنے بیٹھے ہیں زردار وہی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مرے دیس کے نوجواں سو رہے ہیں

گھٹا سر پہ ادبار کی چھا رہی ہے
فضا پے بہ پے آگ برسا رہی ہے
جہنّم کی صورت نظر آرہی ہے
غلامی ستم پر ستم ڈھا رہی ہے
گلستان نظرِ خزاں ہو رہے ہیں

مرے دیس کے نوجواں سو رہے ہیں

نہ اہلِ وطن کی تباہی کا دکھ ہے
نہ کھوئی ہوئی بادشاہی کا دکھ ہے
نہ دردر کی ٹھوکر گدائی کا دکھ ہے
نہ افلاس کا بے نوائی کا دکھ ہے
پڑے خواب میں نقدِجاں کھو رہے ہیں

مرے دیس کے نوجواں سو رہے ہیں

کسی کو نہ احساسِ سود وزیاں ہے
نہ ہاتھوں میں طاقت نہ منہ میں زباں ہے
جوانی میں پیری کی صورت عیاں ہے
کہ باغِ وطن میں خزاں ہی خزاں ہے
مکینوں سے خالی مکاں ہو رہے ہیں

مرے دیس کے نوجواں سو رہے ہیں

شب و روز فاقے ہیں عریاں بدن ہے
نہ روٹی نہ کپڑا نہ گوروکفن ہے
مشقّت مصیبت ہے رنج و محن ہے
کسی کو نہ احساسِ ننگِ وطن ہے
تباہ حال پیر و جواں ہو رہے ہیں

مرے دیس کے نوجواں سو رہے ہیں

لگی آگ چاروں طرف کو بہ کو ہے
فقط زندہ رہنے کی اک آرزو ہے
جو چاکِ گریباں کو کرتی رفو ہے
اک ہم ہیں کہ ہم کو نہ یہ آرزو ہے
یونہی زندگی رائیگاں کھو رہے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

خیر اندیش : محمد رام سنگھ