” آزمانک”گُٹءَگَٹِتگیں دَپارے۔ ناصررحیم”
آزمانک: گُٹءَگَٹِتگیں دَپارے
آزمانکار: ناصررحیم
آزمانکار: ناصررحیم
بس ءَ ہوٹل ءِ دیما داشتگ ات بلے دنزئےِ راہ ءَ اتنت… مسافر منزل ءَ سر بوئگ ءَ پیش سفر ءِ پُلک ءُ ھاکاں چنڈگ ءُ صاف کنگ ءَ اتنت- پْرشتگیں راہ ءِ جَمپ ءُ جوانی سکی آھانی دیم ءِ ءُ گُدانی کرچکاں چہ ھساب کنگ بوتگ اتنت… من کہ بس ءِ پُشتہ گون اتاں کاپر ءِ چیر ءَ نشتگ ءُ یک گْونڈیں زھگے ءِ پیالہ ءِ تھا چاہ ورگ ءَ اتاں… روچ نئے قبلہ ءَ ایر اتکگ ات ءُ نیکہ رودر آتکگ ءَ، بلکیں چو زھریں مردمے ءَ آزمان ءِ توک ءَ توک اوشتاتگ ات ءُ چم در آرگ ءَ ات-
دنیگہ گرمیں پیالہ ءِ سرا گْونڈو ءِ چیرکّی ایں لنکوکانی عکس ھُشک نہ بوتگ اتنت کہ ہوٹل ءِ دیما یک سُہریں ایمبولینسے ءَ داشت… ایمبولینس ءِ سر ءِ ھاک ءُ آؤکیں دنز دُوریں منزلے ءِ عکس ءَ پدّر کنگ ءَ اتنت-چہ ایمبولینس ءَ دومردم ایر اتک ءُ وتی سفر ءِ ژندیاں پَچ دیان ءَ وتی دنزاں چنڈان پہ دیم شودگ ءَ آپ ءِ نیمگا شُتنت-ہوٹل ءِ نان دیوک ءِ چم آھاں سک اتنت…. پدا ایمبولینس ءِ پُشت ءِ دروازگ پچ بوت ءُ آھانی ھمراہ ایرکپت… آئی ءَ زند ءِ بازیں سالانی بار کوپگ ءَ ات- پمیشکہ پاداں پہ واری گرینان ءَ کاپر ءِ چیرا آتک- آئی ءَ سلام دات ءُ گوں کاپر ءِ یک بُنڈی ءَ تِکہ دات-آپ آئی ءِ دیما ایرکنگ بوتنت-بلے زاناں تُنیگ نہ ات کہ جگ ئےِ نہ چارِت- آئی ءِ چم ایمبولینس ءَ سک اتنت کہ دنیگہ چہ آئی ءَ دنز پاد آیگ ءَ ات-گُشئے زاناں آ انگت ءَ راہ ءَ ات- دمانے ءَ پد آئی ءِ ھر دوئیں ھمراہ اتکنت- آھانی ششتگیں دیم صاف اتنت، بلے چہ گوش ءُ چم ءُ پونزانی کلاھاں ھاک سُرک کنگ ءَ اتنت- آھاں پہ وتا نان لوٹائینت ءُ سیمی ھمراہ ءَ بس یکبرے گشت ئےِ کہ “بیا نان بور،،…. بلے آئی ءِ چم چہ ایمبولینس ءَ دُور نہ بوتنت- آھاں آئی ءَ را دومی بر ءَ سلاہ نہ جت…. ؛گْونڈویں زھگ کہ دور انت ھمے مرد ءَ چارگ ءَ ات، وتی پیالہ یے منی دیما ایرکت ءُ پاداتک، ھما مرد ءِ گْور ءَ شُت-زھگ ءَ آئی ءِ کوپگ سُرینت ءُ گشت ئےِ” تو ورگ چیا نہ ورئے؟،،… آ مرد گُشئے چہ واب ءَ سِرّ ات-آئی ءِ چم ایمبولینس ءَ دُور بوتنت ءُ گْونڈ ءَ سک بوتنت-آ گْونڈو ءَ ھنچو چارگ ءَ ات،کہ کسے چماّنی آپریشن ءَ رند دنیا ءَ دوارگ بہ گندیت…” من ایوکا ھچبر نان نہ وارتگ-منا ایوکا ورگ دل نئیت.. تو ورئے، منی ھوری ءَ ورگ؟،،
گْونڈو ءَ سرچنڈینت ءُ ھؤ کت… آئی ءَ اولی دپار گْونڈو ءِ دپ ءَ دات ءُ گشت ئےِ” من مُدام اولی دپار آئی ءِ دپ ءَ داتگ ءُ آئی ءَ اوں داں منی دست ءَ اولی دپار نہ وارتگ ورگ ئےِ نہ وارتگ،،…” آ زاناں کئے انت؟،، گْونڈو ءَ جُست کت-
آ مرد بیوار ات، آئی ءِ دنتان پہ دپار ءِ نرم کنگ ءِ ھاترا جہد ءَ اتنت بلے چم ئےِ زھگ ءَ سک انت-من دیست کہ آئی ءِ چماّنی دنز جمبر جوڑبوان اتنت-جمبرانی سیاھی ءَ آئی ءِ شگل ءِ سرا مانشانت درد چو رگام ءَ گورگا اتنت-آئی ءِ بدن ءِ بند ءُ کانیگ دپ مہ دپ بوئگ ءَ اتنت- آ گین کشّگ ءَ واھی نہ بیت کہ آئی ءِ اوپار ءِ بند ءَ بُرت… “آ منی چُکّ بوتگ بلے منی پت جوڑ بوتگ ات- کسانی ءَ من آئیارا دپار دپ ءَ داتگ ات بلے نوں منی دپ آئی ءِ داتگیں دپارانی ھیلدار انت… آئی ءِ مات ءَ منا ءُ آئی ءَ باز دیر انت کہ یلہ کتگ ات ءُ ورنا ءُ زھگ کماشانی ھمراہی ءَ پہ آپ ءُ لئیٹ ءِ لوٹگ ءَ شُتگ ات- من آئیارا گشت کہ مرد بلے آئی منی ھبر نہ زُرت ءُ زھر ئےِ کت ءُ چہ ما دُورشُت-اول سرا مردماں آئی ءِ نام ءَ شئیر ءُ سؤت پِر بست بلے مرچاں ملک ءِ مردمانی چماّں آپ باز انت- لئیٹ اِش ھم رُژنا انت-پمیشکا ھر کس لوگ ءِ آدینک ءِ تھا وتی عکس ءِ چارگا دلگوش انت-آئی ءِ مات چہ ما دُور انت زھر کتگ ات ءُ زمانگ ءِ دلاں نشتگ ات بلے نوں زمانگ ھم چرآئی ءَ بے ھیال انت…. ،،
دمانے بیتواری ءَ پد آئی ءِ چم ایمبولینس ءَ سک بوتنت-بلے ھور ءَ تم نہ کتگ ات… “اے کہ پیش ءَ منی چُکّ ات، بلے رند ءَ منی پت جوڑ بیت،اے ھم چو وتی مات ءَ اشتاپ زد ات-ھرچ کار اشتاپ کتگ ات ئےِ- وانگ ءِ روگا ھم اشتاپ کت ءُ پدا چہ اسکول ءِ درآیگ ءَ ھم دیر ئےِ نہ کت-” منی چماّنی دیما زوت زوت رُست ءُ مزن بوت-
یکروچے منا گشت ئےِ “نوں تو دم کن، منی وار انت نوں من ترا دپار دپ ءَ دیاں-،، من اڑی کت ءُ گشت کہ انگت منی وار سرجم نہ انت-بلے آئی ءَ اشتاپ ات پمیشکا چہ من ءَ گیش بوت-
آ ناھُدا قاسم ءِ یدار ءَ جانشو بوت بلے اشتاپ ءَ اود ءَ اوں نندگ ءَ نہ اشت-سالے ءَ رند ابراہیم ءِ لانچ ءَ جانشو بیت-آ چہ منا ھچبر چیر نہ بوتگ بلے ابراہیم ءِ لانچ ءَ جانشو بئیگا رند من اوں نہ زانتگ ات کہ آ کدی چہ دریا ءَ کئیت ءُ کجام روچ ءَ لانچ ءَ گون رؤت-من کہ جست کتگ ات تہ ھمے گُشتگ ات ئےِ کہ”ھرچ وھد ءَ سیٹھ ءِ آرڈر بیت ما ساجو ایں-،،من سرپدکت کہ ابّا تو چو اشتاپ ئے پرچا دنیگہ تئی دراھیں عمر است انت-وت ءَ مہ کُٹین ،کم کم ءَ ھرچ بکن، بلے آ مدام ھر کار ءَ، ھر ھال ءَ ساجو ات-
اے رندی ھم انچو اشتاپ اشتاپ ءَ لوگ ءَ اتک،منا گشت ئےِ کہ” ما روگائیں، چیزے روچ ءَ پد آیگ بیت-،، من لوٹت کہ دست ءَ بڈّ ئےِ بہ جناں بلے منی پادآیگ ءَ پیسر آ چہ لوگ ءَ درکپتگ ات…پدا ھال آتک کہ آھانی لانچ ءَ بُن کتگ-آ دریا ءَ نہ بڈت بلے سک سُتکگ ات-بزّگیں سیٹھ ءَ شاباش انت کہ مارا پہ علاج ءَ گوں جہاز ءَ کراچی ءَ دیم دات…. بلے اےبری زاناں مستریں سیٹھ ءِ آرڈر ات یا پہ مات ءِ گور ءَ رؤگ ءَ اشتاپی ات کہ کراچی ءَ روچے اوں نہ جلّت ئےِ…. ،،
بس ءِ ھارن مسافراں توارکنگءَ ات- مسافر اشتاپ اشتاپ ءَ بس ءِ نیمگا روگا اتنت…زھگ چہ آ مرد ءِ دیما پادآتک ءُ چپلاں پاد ءَ کنگ ءَ لگّت- آئی ءَ گشت “من دنیگہ نان نہ وارتگ، تو کُجا رؤگائے؟ -،،
” بگند بس رؤگا انت من اشتاپی آں-،، زھگ ءَ پسّو دات….
نی روچ قبلہی کوھانی پُشتہ اندیم بوتگ ات-
کاپر ءِ چیر ھالیگ انت-سُہریں ایمبولینس اود ءَ نہ انت-بلے ھما مرد ھما بُنڈ ءَ تِکہ انت ءُ نشتگ-آئی ءِ چم بس ءِ راہ ءَ سک انت ءُ چر آھاں دنز پاد آیگ ءَ انت-