ہستی ءِ روح ءِ قلم، جیڑگءِ آسانیں زبان
ہستی ءِ روح ءِ قلم، جیڑگءِ آسانیں زبان
۔۔۔
ہستیءِ روحءِ قلم، جیڑگءِ آسانیں زبان
گوات کَشّیت، رِچنت تاک زمینءِ جانءَ
دَر کَپاں من چہ وتی پِیرکءِ سُہریں بانءَ
پِیرُکءِ چاہءِ پیالہ ءُ کمان
ہستی ءِ روح قلم، جیڑگ ءِ آسانیں زبان
پیالہءِ گردنءِ اِسپیتیں رَگاں
گِند منی پیرک ءِ دَستءِ ٹپءِ
وشبوءِ روکیں چراگءِ نکشءَ
۔۔۔
باندا دُژمن کہ اِشاں دست بجنت
بئیت لوگءَ منی آباد بکنت
پیالہءِ گردنءِ اسپیتیں رگاں
گار بِیت پِیرکءِ دستءِ وشبو
۔۔۔
شِیری ئیں سُہباں کمانءَ زُوریت
کوچگ ءُ کوہاں شکارءَ روت انت
۔۔۔
ہَستیءِ روحءِ قلم، جیڑگءِ آسانیں زبان
آ کہ ہر سہب پہ شکار ءَ در بئیت
من پرآئی ءَ بَیئاں ھُون چَکاریں شہ دَگّ
۔۔۔۔
ہستی روحءِ قلم، جیڑگءِ آسانیں زبان
دُور درچکانی کتارے کہ درا اِنت
ءُ کتار ءَ آ دیم
برہنگیں روچءِ نزوریں گوناپ
یکّ تکّیں شارءِ وڑا اَنی تنَّک اِنت،
ءُ مُجاں کُور کتہ
چو منی دیمءِ وڑا زرد اِنت، تہار اِنت،
وار اِنت
سَردیں جوہانی تہا مونج شِکاریں ماھیگ
یک ءُ تہنا اِنت،
ابیتک انت،
چو منی ڈول ءَ اِنت
۔۔۔۔۔
ہستیءِ روحءِ قلم، جیڑگءِ آسانیں زبان
شَپ منی ساہءِ تہا سِنگ جنانءَ کئیت اِنت
سُہریں رُشناہیءِ شِنگیت منی چمانی تہا
پاھوءِ رَنج ءُ وتی مَرگءِ ابیتکیں لذّت
اے منءَ دست کَپنت زندءِ ہمک راہءِسرءَ
۔۔۔۔
ہستی روحءِ قلم، جیڑگءِ آسانیں زبان
سارُتکیں ساہءِ گوں جانءَ ہمے دُوری اَست اِنت
شاعر ءُ شعرءِ میانءَ ہمے دُوری است اِنت
۔۔۔۔
ہستی ءِ روحءِ قلم، جیڑگءِ آسانیں زبان
دَست چو گیمرتگیں شاہےءِ وڑا واب کَپنت
مرچاں پاداں منی ہمراہی ءِ توکل نیست اِنت
نہ منءَ سئیلءِ طلب زور کن، سئیلءَ در بیا
نہ منءَ ساز ،شَراب ، واب ،گلاب، درکار اِنت
بس منی پاداں وتی جند ءِ زمینءِ کار انت
۔۔۔
ہستی روحءِ قلم، جیڑگءِ آسانیں زبان
اَنچو کہ ناز ءُ ادا، ناچ جنکءَ براہیت
جَنگ کنئگ انچو پہ مرزبومءَ غلامءَ براہیت
ہستی روحءِ قلم، جیڑگءِ آسانیں زبان
روچءِ چُلّءِ تئی بالادءِ وَسءَ گیش کناں
شِیرکنیں آس پتو روچ ءِ تہا مان کناں
۔۔۔۔
پزیر جی ایم
