“آزمانک لَنگ ڈاکُو،، پیرجان بزنجو”
“آزمانک لَنگ ڈاکُو
آزمانکار: پیرجان بزنجو
آزمانکار: پیرجان بزنجو
آئی عمر کساس ھژدہ سال ات کہ آ یک حادثہ یے ءَ وتی دوئیں پاداں زبہربوت،یک دارے ءِ سرا وتا گرینگ ءَ ات- آئی مات آئی کسانی ءَ ھُدا مرزی بوتگ ات- آئی پت ہیروئن ءِ ھرجان ات دگہ آسرا یے آئی نیست ات میتگ ءُ بازار ءَ گَشت پنڈ ءُ لوٹ ئےِ کت ءُ وتی لاپ ئےِ والینت-چہ مردمانی نیکیں نیت ءَ برے برے چنڈے نان ئےِ ھم نہ رست-ھدائی زوری ات اگہ کسے ءِ دل رحم شت کلدارے دست ئےِ دات اگہ نا گڑا لنگڑ ءَ وپت-
دگہ کس ءُ وارثے آئی ءَ نیست ات کہ ھیلداری ءَ ئے بہ کنت، اے میتگ ءُ بازار ءِ مردم آئی گٹ ءِ ھون ءِ تُنگی اتنت-کس ءَ وتی لوگ ءِ دپ ءَ اوشتگ ءَ نئیشت کہ گندگ گندگ ءَ چاریت دھکان ءُ ملک واھنداں وتی ملکاں گردگ ءَ نئیشت کہ کشاراں لگت دنت حالانکہ چُشیں ھیوانے نہ ات کہ ھرچیز ءَ را پاش بہ بیت-بلے اد ءِ مردم اتنت کہ آئی ءَ پہ ھروھد ءَ چو کُچلیں زھر ءَ اتنت آ پہ ھراں زُرت اگہ دومردم ئےِ کندگ ءُ مسکرائی ءَ بہ دیستیں گڑا تیوگیں روچ ءَ نشت ءُ گریت ئےِ ءُ اول ھُدا ءِ دربار ءَ دعا ئےِ کت کہ تو من ءَ انچیں کس ءُ عازیز ئےِ نہ دات-کہ گوں من ءَ گپ ءُ ترانے بہ کنت، کدی کدی آئی اے وڑیں ھیال ءِ آھگ ءَ سک گریت-
مرچی آئیارا دوروچ ات پادانی درد ءَ نارگ ءَ ات درچکے ءِ ساھگ ءَ کپتگ ات ھرنیمگا ساھگ شت بزّگ ھما نیمگ کنزان بوت-
سیمی روچ ءَ ھمے میتگ ءِ یک واجکارے پہ شکار ءَ ھمے گورا اتک آئی ءَ کہ لنگ دیست گڑا آئی ءَ پہ لنگ ءَ بزّگ بوت آئی لنگ لوگ ءَ بُرت، ڈاکٹر ءَ پیشداشت-دارو ءُ درمان کت چو وتی پیریں پت ءَ دلگوش ئےِ کت-لنگ ءَ واجہ ءَ را باز دعا ءُ نیک کت بلے لنگ ءِ دعا ءَ دگہ اثرے کت-ھدا ءَ را زانا بزّگیں لنگ ءِ دوچاریں روچانی وشی دوست نہ بوت انت-
اناگہ ءَ یکروچے ھمے واجکار ءَ را دل ءَ دورہ ات ءُ ھدا ءَ وتی مال کت-واجہ ءِ مَرگ ءَ لہتیں روچ ءَ رند واجہ ءِ بچک ءَ لنگ ءَ را گشت تو چہ مئے لوگ ءَ در ءَ برو گوں تئی آھگ ءَ مئے آبادیں لوگ سُتک ءُ برباد بات اگہ تو گیشتر روچ ءَ مئے گورا بہ دار ئے گڑا ھدا مہ کنت منی ھم سر ءَ گوارین ئے-من ءَ پہل کن تو چد ءُ گیش مئے گور ءَ مہ دار!
لنگ وار پدا بیوس بوت-دگر ءِ لوگ ءَ پہ زور نندگ لنگ وار پدا لنگ جنان بوت پہ بازار ءُ میتگاں شت لنگ بزّگ بزگ ھر لوگ ءِ دپ ءَ شت شیطانیں گوگاھاں سنگ جت ءُ تاچینت آ بزگ دیم پہ ملکاں شت، بلے دھکان ءُ ملک واھنداں وتی نزیک ءَ آھگ ءَ نئیشت کہ مئے کشار ءُ فصلاں لگت دنت ،آ بزّگ چشیں ھیوانے نہ ات کہ کشاراں ءُ فصلاں لپاشان بہ بیت، بلے غریبی ات آ بزگ چہ ھمودا واتر ات-مرچی آئی ءَ ارادہ کت کہ چہ ادا دور رواں تاں ساہ جبین ءَ انت رواں بلے آئی ہمنچو معلوم نہ ات کہ اے گنجیں درچکانی پُشتہ باریں دگہ بازارے ھست کہ نیست-
آئی اے جاہ ءَ ابید دگہ جاہ نہ دیستگ ات بلے آئی ءَ نوں ادا نندگی نہ ات-آئی ءَ اد ءِ مردم پہ وتا شر دیستگ اتنت- آئی دل ڈڈ کت دیم پہ دگہ نیمگے…..
سےروچاں رند آ یک بازارے ءَ رست ادا باز لوگ نیست بلے پہ لنگ ھدائی گنج ات-آئی چماں گشئے دو روک آؤرت بسم اللہ کت بنگیج بوت پنڈگ ءَ، بلے ھر لوگ ءِ دپ ءَ شت ھمے جواب ئےِ رست کہ واجہ معاف کن مردماں گشت زانا کلدار لوٹیت آھاں نزانت کہ سےروچ انت کہ لنگڑ انت پہ چنڈے نان ءَ طلبگار انت- آئی درستیں لوگ یک یک کتنے-بلے چنڈے نان ئےِ ھم نہ رست-آ پریشان بوت، دیم پہ ملکاں شت کہ بلکیں مردینے ایمان کنت لوگ ءَ ئےِ بارت، بلے ملکاں آئیارا یک مردمے گندگ ءَ نیاھت-آیک درچکے ءِ پُشتہ نشت- اناگہ ءَ آئی چم یک مردکے ءَ کپت انت-آئی گل کت کہ ھدا ءَ پمن بزگ بوتگ کہ دگہ انچو دور ءَ چے مُرگ ادا چون کئیت-آئی ءَ وتی دست ءِ لٹ ھرمال کت-لٹ شت تچگ ءَ مُرگ ءَ لگّت-مُرگ پرپروکی ءَ لگت- لنگ بزّگ گل بوت پادآھت سِٹوک جنان بوت، شُت مُرگ ءِ چست کنگ ءَ-دست ئےِ جہل کت کہ مرگ ءَ چست بہ کنت کہ لٹّے ءَ توار کت بزگ ءِ پُشت بزاں اے مُرگ دھکان مراد ئیگ ات،دھکان مراد ءَ لنگ شرّی ءَ چُپت ءُ دست ءُ پاد ئےِ بست انت ءُ دؤر دات شت- گورنمنٹ ءِ لہیتں سپاہی آؤرت لنگ ءَ را بُرت ءُ جیل ءَ بندکت-
ایدگہ روچ سُھب ءَ سپاہی اتکنت کہ نامی ئیں ڈاکو ءِ بیان ءَ گراں-بلے دیست اش کہ بزگیں لنگ اولی لٹّ ءَ ھُدا ءَ وتی مال کتگ-