ماهكان ءِ سوك۔ کریم بلوچ ۔ تھل ءِ پربند
ماهكان ءِ سوك
ماه ءِ ارس ،
ترا گِنداں
و مَهكان ءِ من لرزوكيں لـُـنٹ و ساهگ ءَ ،
بهار ءِ من نشار ءِ رنگ گاريناں
زمين ءِ كـَپتـَگيں بَـچّ و جَنِكانی
پُرُشتگيں اميت هزاريناں !
منی سوگی ايں همبل بيا !
منی تو سهتگيں زِردانی آس ئے آس
ترا من زيملے باں
جان ءِ اوتاكاں ،
دل ءِ بنداں گوں بنداں
كـَـلات ءِ پَئيم تئی ِزيْمَـل
من و تو زيملاں ننداں
ترا من زيملے بنداں ،
چه مهر و دوستی ءِ گالاں
چه بـِچكـَـند و اُميتاں ، زند روديناں
من و تو هور و يكجاه ، بانزليں بالاں
چه سُهتگيں پُهـلاں سَر گـُـوَز باں
ترا !
من پَـٹ و كوهاں ماں ،
هزار چم گوں ، ندارگ باں
تئی نَنگار ءِ پَد رَند ءِ بَدَل
بُمب ءِ نشان پرچا ؟!
منی سوگی ايں همبل بيا !
ترا من زيملے بنداں
هزاراں گال گچينی گوں
بهار ءِ رنگ گوں رنگيناں
تئی باندات ءِ باندات ءَ
چه مهر و گلزمين و زند
_ سَبزيناں ؛
ترا چه كوه بن ءِ ، من چمگاں
سَرد آپ تِنگيناں
و مهر ءِ چه كِشار ءِ نيبگاں ،
بُـود و ، اميت پَكـّـيں واريناں !
ماه ءِ ارس !
ترا گنداں
منی بيلی ، دل ءِ من لـَرزگاں زاناں ،
كه
بے گاليں مودگاں سك انت…
هزارگنجيں چو منی مات و منی پت هم
دران ڈيهی چه من سست انت …!
منی همبل !
تئی ارساں ، بهار انت ليمر انت پرچا
بيا سهر پلے ءَ
پَٹے ماں بے آپيں
لـَواراں گيمراں بيت چه …
بيا ماتانی نازينكاں
پَدا ما چادراں بنداں
بيا كه گلزمين ءَ ما وتی مهر ءِ سَپَر _ سفر _ زوراں
بيا كه ماهكان ءَ ما وتی هر پَٹ ءِ مهمانی
_ پدا لوٹــاں
بيا كه ما و مَهكان ،
شاده ءِ ديوان ءَ يكجاه باں …
كريم بلوچ _ تهل
30/05/09