Baask.com

کریم دشتی: یہ میرا دیوانہ پن ہے یا حقیقت کے سطور

میں نے سمندر سے کوسوں دور دشت کی خشک زمین پر بیٹھے چند خاموش نوجوانوں کو دیکھا ۔ آگے بڑھا ان کی باتیں سننے کی کوشش کی ۔۔۔۔ قریب پہنچا تو یہ دیکھ کر حیرت ہوئی کہ سب ایک دوسرے کی جانب یہ آس لگائے بیٹھے تھے کہ کوئی بولے اور وہ سنیں اس انحصار پسندی میں وہ وقت کے خاموش قدموں تلے بے دردی سے کچلے جارہے تھے ۔۔۔۔۔ اور وقت کے بے رحیم قدموں کے نشان ان کے چہروں پر دور دور سے دیکھے جاسکتے تھے۔۔۔۔
قریب کھڑی ایک نیم مرجھائے اور بوڑھے درخت کو دیکھا ۔۔۔ اُس کی طر ف بڑھنے لگا ۔۔۔۔۔۔۔ لیکن میرے قریب پہنچنے سے پہلے وہ میرے قدموں کی آہٹ سن کر میری طرف ہلنا شروع ہو گیا تھا۔ انہیں مجھے اپنی آغوش میں لینے میں بہت جلدی تھی ۔۔۔۔۔۔۔ بالکل قریب پہنچا تو انہوں نے اپنی شاخوں کو یکجاہ کرلیا اور مجھے اپنی ٹھنڈی چھاؤں میں لے لیا ۔۔۔۔
تم تو گونگے نہیں ہو ۔۔۔ خاموش کیوں ہو؟ ۔۔۔۔۔۔۔۔۔۔۔۔ میں اس شش و پنج میں گرفتار تھا کہ اگر کچھ بولوں تو کیا بولوں کہ انہیں میری خاموشی بالکل پسند نہیں آئی ۔۔۔۔ اور سرگوشی کرتے ہوئے بولے۔۔۔۔
میں ابھی سوچ رہا تھا کہ کیا بولوں۔۔۔۔۔۔۔۔۔۔ تو وہ پھر سرگوشی کرنے لگے۔۔
بولو اور بولتے رہو ۔۔۔۔۔۔۔۔۔ مجھے معلوم ہے تم جب بولتے ہو تو دیوانہ وار بولتے ہو ۔ مجھے تمہاری دیوانگی پسند ہے تم تو کچھ بولتے ہو ۔۔۔۔۔ یہاں برسوں سے کوئی کچھ نہیں بولتا ۔۔۔۔۔۔ جب سے وہ دیوانہ رحلت کر گیا ہے ۔ یہاں خاموشی اور سنناٹوں کی حکومت ہے۔ خاموشی اور سنناٹوں کی اس ظالم حکومت کا تختہ گرا دو ۔۔۔۔۔۔ بولو اور بولتے رہو۔۔۔۔۔۔۔۔۔۔
من وتی زند ءَ تئی گندک ءِ رنج ءَ مرتاں ۔۔۔۔۔۔۔۔۔۔۔۔۔۔۔۔۔۔۔۔۔ میں نے کریم دشتی کے ایک مشہور شعر کا ایک مصرہ گنگنانے کی کوشش کرتے ہوئے انہیں یہ باور کرایا ہے کہ میں سمجھ گیا ہو ں کہ وہ کن کی باتیں کر رہا ہے ۔۔۔۔۔۔
ایک بلوچی نیوز ٹی وی چینل کے ایک دو گنٹھے طویل پروگرام میں بلوچی زبان کے مشہور شاعر بشیر بیدار کو جب دوسری مرتبہ مہمان کی صورت میں دیکھا تو دل میں یہ یقین پیدا ہوگیا کہ آج وہ کریم دشتی کے بارے ضرور کچھ کہے گا۔۔۔۔۔۔ لیکن پروگرام کے اختتام تک نہ کسی کالر نے انہیں ایسا کوئی سوال کیا اور نہ ہی انہوں نے خود کریم دشتی کے بارے کچھ کہا۔۔۔ لیکن پھر بھی یہ پروگرام بہت شاندار رہا ۔۔۔ انہوں نے قندیل آزادی شہید پروفیسر صبا دشتیاری صاحب کو ایک بہت ہی خوبصورت نظم پڑھ شاندار انداز میں خراج عقیدت پیش کیا ۔۔۔۔۔ میں نے اس نظم کی ایک کاپی حاصل کرنے کے لیے بہت کوشش کی ۔۔۔۔۔ لیکن جس دوست کو یہ ٹاسک دیا تھا وہ وہاں کچھ لیٹ پہنچے ۔۔۔۔۔۔۔
بشیر بیدار صاحب کو یہ شرف حاصل ہے کہ انیس سو اسّی کے شروعات میں جب وہ اچانک بیمار پڑ گئے تھے ۔۔۔ اور کونشکلات تمپ میں اپنے گھر میں بستر پر پڑے ہوئے تھے کہ کریم دشتی نے شدید بیماری میں مبتلا ہونے کے باوجود بھی اپنے چند رفقاء کی مدد سے دشت کنچتی سے کونشکلات تمپ میں ان کے گھر پہنچ کر اپنے دوست کی عیادت کی تھی ۔۔۔۔۔۔
کریم دشتی سوچ اور نظریے کے لحاظ سے مارکسسٹ تھے لیکن ایک با عمل اور پکا مارکسسٹ ۔۔۔۔۔ وہ مضبوط قوت ارادی کے مالک تھے ۔۔۔۔۔۔۔ اپنے نظریے اور خیالات کے عملاً پابند تھے ۔۔۔۔۔۔۔ بات جب انسان دوستی پر آجا ئے تو انہیں کسی بھی طور پر نظر انداز نہیں کیا جاسکتا۔۔۔۔۔ وہ ایک دیوتا تھے اور مہربان تھے خداؤں جیسا ۔۔۔۔۔۔۔ وہ جہاں موجود ہوتے اور گنٹھوں طویل مجلس نہ ہوتے ایسا کبھی ممکن نہ تھا ۔۔۔۔۔۔۔۔۔۔۔ اپنے زندگی کے آخری ایام میں بھی وہ جب بستر مرگ پر تھے تو بھی وہ بولتے رہے اور ان کے رفقاء اور دوست انہیں سنتے رہے تھے ۔۔۔۔۔۔
آج جب میں اپنے تخلیات کی دنیا میں سمندر سے کوسوں دور دشت کی خشک مٹی پر ایک بوڑھے اور نیم مرجھائے درخت کی ٹھنڈی چھاؤں میں بیٹھا ہوا ہوں تو قریب ہی عظیم بلوچ مزاحمت کار شہید حمید کی آخری آرام گاہ ہے ۔۔۔۔ شہید حمید بلوچ اور کریم دشتی خونی بندنوں کے علاوہ سوچ اور نظریات کے اعتبار سے دو پکے مارکسسٹ تھے ۔۔۔۔۔۔ گوکہ شہید حمید بلوچ کے والدین کنچتی سے کافی دور گوڑی میں رہتے تھے ۔۔۔ حمید بلوچ وہیں بڑھے ہوئے ۔ وہیں سے ایک مزاحمت کار بنے ۔۔۔ لیکن شہادت کے بعد کریم دشتی سے ان کی سوچ اور نظریاتی وابستگی نے انہیں دشت کنچتی میں دفنایا۔۔۔۔ اور حمید بلوچ کی شہادت سے صرف تین سال بعد یہ دیوتا بھی رحلت کر گئے۔۔۔۔۔۔۔
کئے گشیت کہ کم اَت زندگی انچو
مارا وت نیست اَت نندگی انچو
اور جب سے وہ اس دشت خموشاں کو چھوڑ کر گئے ہیں ۔۔۔۔ یہاں کوئی نہیں بولتا ۔۔۔۔۔۔۔۔۔۔ خاموشی اور سنناٹوں کی خوفناک حکومت ہے ۔۔۔۔۔ درختوں اور ان پر بنے گھونسلوں میں موجود پرندوں کے سوا ۔۔۔۔۔ کوئی نہیں بولتا ۔۔۔۔۔۔ اور وقت کی دہشت گردی دیکھو کہ گوادر کیچ سڑک کے کنارے کئی کلومیٹر لمبی زمین پر پاکستان نیوی نے خاردار تاریں بچھائی ہوئی ہیں ۔۔ جہاں سے گزرنے والوں کو یہ باور کرانے کی کوشش کی جارہی ہے کہ اس دشت کے انسان کا زمین سے رشتہ ٹوٹ چکا ہے ۔۔۔۔۔۔۔
میں جو سوچ رہا تھا ۔۔۔ وہ سن رہے تھے ۔۔۔۔ میں جو کہہ رہا تھا ۔۔۔۔۔۔ وہ پرکھ رہے تھے ۔۔۔۔۔ اور میں جو دیکھ رہا تھا وہ سہہ رہے تھے۔۔۔
کبھی کبھی جب اس کے شاخوں پر بیٹھے شانتل کچھ بولنے کی کوشش کرتی تو وہ اپنی کوئی ٹہنی ہلا کر انہیں خاموش رہنے کی تلقین کرتا ۔۔۔۔۔۔۔۔۔۔۔۔۔۔۔۔۔۔۔۔
شالا آ روچ ببات اَنت کہ من ءَ جاہ بہ بیت
چوکہ آژناگ ءَ تئی لوگ ءَ من ءَ راہ بہ بیت
اِے جہان پمن چہ قبر ءَ بہ بیت تنکتر بلے
تئی پیشانی ءِ ندراں کہ پمن پراہ بہ بیت
ہمک وازی من ءَ سرہمین ایت حدا ءِ کھر ءَ
ایمنی شالا بیار ایت چُشیں اللہ بہ بیت
۔۔۔۔۔۔۔۔۔۔۔۔۔۔۔۔۔۔۔۔۔۔۔ ایک کپوت جو میری وہاں موجودگی سے بے خبر تھی نے اُس کی شاخوں پر بیٹھے ہی گنگنانا شروع کردی تھی ۔۔۔۔۔ لیکن اسی دوران جب اس کی نظر مجھ پر پڑی تو کچھ ڈر گئی اُس نے شانتلوں کی طرف دیکھا اور اڑھنے ہی والی تھی کہ انہوں نے تسلی دے کر اڑھنے سے منع کر دیا ۔۔۔۔
اسی دوران اس کی ایک ٹہنی پر بیٹی ایک شانتل نے اُس سے کچھ سرگوشی کی جیسے وہ کہیں جانے کے لیے اُس سے اجازت مانگ رہی تھی ۔۔۔۔۔۔ لیکن انہوں نے منع کیا ۔۔۔۔۔۔۔۔۔۔۔۔۔ اور وہ خود گنگنانے لگے ۔۔۔۔۔۔۔۔۔۔
پن ءُ مزواک ءِ کولیگاں تو بازار ءَ مرو
بے انانی ءَ کدی ءُ کدی بے وار ءَ مرو
پن ءُ مزواک ءِ من کولیگاں تو بازار ءَ ۔۔۔۔۔۔۔
من وتی گلہ ءُ زنگاں وتی رب ءَ نہ براں
کہ حبر گوش مہ دار ایت پر آ سردار ءَ مرو
پن ءُ مزواک ءِ من کولیگاں تو بازار ءَ ۔۔۔۔۔
من وتی زند ءَ تئی گندک ءِ رنج ءَ مرتاں
۔۔۔۔۔۔۔۔۔۔۔۔۔ ان کی آواز میں موجود وجدانیت میں مسلسل اضافہ ہو رہا تھا ۔۔۔۔۔۔۔۔۔ کہ اچانک تلواریں ٹکرانے کی آواز آنا شروع ہوئیں ۔۔۔۔۔۔۔۔۔۔ اوپر دیکھا تو فضا میں دو فرشتے سخت لڑائی میں مصروف تھے ان میں سے ایک کہیں جانا چاہ رہا تھا اور دوسرا اُسے روکنے کی کوشش کر رہا تھا ۔۔۔۔۔۔۔۔۔۔۔۔۔۔۔۔ دونوں کے جسم ایک دوسرے کے تلواروں کی وار سے لہو لہان تھے ۔۔۔۔۔۔۔۔ ۔۔۔۔ شانتل اور کپوت سہم کر اپنے اپنے گھونسلوں میں چھپ گئے تھے ۔۔۔۔۔۔۔۔۔۔۔ وہ بھی مکمل خاموش تھا ۔۔۔۔۔
ان کو خاموش دیکھ کر مجھے تشویش ہوئی کہ آخر کیا ماجرہ ہے ۔۔۔۔۔۔ پوچھنے کی کوشش کر رہا تھا کہ وہ پہلے بولنا شروع لگے۔۔۔۔
ڈرنے کی کوئی بات نہیں ۔۔۔۔۔۔۔۔ میں سوچ رہا تھا کہ آج ان کے درمیان کسی طرح سے صلح کیا جائے ۔۔۔۔۔۔۔
ابھی میں ان دونوں فرشتوں کے بارے میں جانا چاہ رہا تھا کہ وہ پھر بولنے لگے ۔۔۔۔۔۔۔
یہ زندگی اور موت کے فرشتے ہیں ۔۔۔۔۔۔۔۔۔۔۔ برسوں پہلے ۔۔۔۔۔۔ جب موت کا فرشتہ اس دشت کے دیوانے کو ختم کرنے کے لیے یہاں پہنچا تو زندگی کا فرشتہ بھی دیوانے کو بچانے کے لیے پہنچے تھے ۔۔۔۔۔۔۔۔۔۔ تب یہ لڑائی شروع ہوگئی ۔۔۔۔۔۔۔۔ برسوں پہلے کئی مہینوں کی لڑائی کےدوران ایک روز زندگی کے فرشتے کو سر پر ایک شدید چوٹ آئی ۔۔۔۔۔۔ اور وہ گر کر بے ہوش ہوگئے ۔۔۔۔۔۔۔۔ جب تک وہ ہوش میں آتے موت کا فرشتہ اپنا کام کر چکا تھا ۔۔۔۔۔۔۔۔۔ لیکن ہوش میں آنے کے بعد جب اس نے ہماری طرف دیکھا تو ہم نے اوپر کی طرف اشارہ کرکے بتایا کہ وہ ناکام ہوکر واپس چلا گیا ہے ۔۔۔۔۔۔۔۔۔۔۔۔۔۔۔۔۔ تب سے موت کا فرشتہ جب بھی یہاں قریب سے گزرنے کی کوشش کرتا ہے تو زندگی کا فرشتہ شدید مزاحمت کرتا ہے ۔۔۔۔ لیکن ہر بار ان کے سر پر ایک شدید چوٹ آتی ہے اور موت کا فرشتہ آگے نکلتا ہے ۔۔۔۔۔۔ اور ہر بار جب یہ ہوش میں آتا ہے تو ہماری طرف دیکھتا ہے اور ہم اوپر کی طرف اشارہ کرتے ہیں اوروہ یہی سمجھتا ہے کہ وہ ناکام ہوکر واپس چلا گیا ہے ۔۔۔۔۔۔۔۔
ابھی میں یہ پوچھنے والا تھا کہ آپ نے جھوٹ کیوں بولا تھا کہ وہ پہلے بولنے لگے۔۔۔۔۔۔۔
نہیں۔۔۔۔۔ ہم نے کوئی جھوٹ نہیں بولا تھا ۔۔۔۔۔۔۔۔۔۔ حقیقت یہی تھی ۔۔۔۔۔۔ موت کا فرشتہ اُس دیوانے کی سانسیں نکال کر لے گیا ۔۔۔۔۔۔ ان کی سوچ اور نظریے آج بھی زندہ ہیں۔۔۔۔۔۔ وہ دیوانہ مرا نہیں ۔۔۔۔۔۔۔۔ اورنہ ان سے پہلے اس مٹی سے محبت کرنے والے کبھی مرے ہیں اور نہ آئندہ کبھی کوئی مرے گا ۔۔۔۔۔۔۔۔۔۔ وہ زندہ ہیں ۔۔۔۔۔ وہ زندہ رہیں گے ۔۔۔۔۔ وہ زندہ ہیں کہ آج تم میرے پاس ہو ۔۔۔۔۔۔۔۔۔۔۔۔۔۔