سؔپورہ ءِ ھَلک۔ آزمانکار: شاہ منیر بلوچ
آزمانک: سؔپورہ ءِ ھَلک
نِبشتہ کار : شاہ منیر بلوچ
اے ھلک سؔپورہ ئِے نام ءَ نامدار اَت سپورہ سؔلیمان بکشی یے لوگ بانُک اَت آ سَکیں مھروان ءُ زندگ دلیں مردمے اَت سپورہ ءَ ھلک ئِے دْرستیں مردماناں یکیں چم ءَ چار اِت اَنت مردمانی سَکی ءُ وشی ءَ ھمراہ اَت۔ اے ھلک ءَ یک چاتے، یک مسیتے، ءُ یک کسانُکیں وانگجاہ ئِے ھم ھَست اَت کہ ھلک ءِ گونڈو وانگ ءَ شُت اَنت۔۔۔
سپورہ ئِے کمپان ءِ دیم ءَ یک کاپرے ھست اَت کہ اود ءَ جنین آدمانی جاگہ اَت آیان مدام ھمود ءَ نِشت ءُ گُد دوچی کُت۔۔۔سپورہ ءَ ھلک ءُ ھلک ئِے مردم سک دوست اِت اَنت وھدے کہ آ سُھب ءَ چہ واب ءَ پاد اتک گڑا آ اَلم ھلک ئِے دْرستیں مردمانی چارگ ءُ ھال پُرسی ءَ شُت، دْرستیں مردم ءِ دیست اَنت ءُ پدا واتر وتی کپان ءَ اتک۔۔۔سپورہ میار جلّی ءُ مھمان نوازی ءَ ھم چہ کَس ءَ کمتر نہ اَت آئی ھلک ءَ کہ مردمے اتک ءُ مھمان بوت گڑا آئی ءَ دگہ کسی لوگ ئِے روگ ءِ موکل ءِ نہ دات ءُ آئی وتی لوگ ءَ آرت مھمانانی ھیالداری کُت۔۔۔ مبارکی ءَ پنچ سال اَت کہ ھمد ءَ سپورہ ئِے ھَلک ءَ میارے زُرتگ اَت ءُ جْلیتگ اَت۔۔۔
بَلے بد بھتی ءَ اے ھَلک کورے دپ ءَ اَت مدام کہ ھور ءَ گْوارت، گڑا ھور ئِے گْوارگ ءَ چے رَند ھلک ءَ را آپ ءَ وتی امبازاں زُرت مردم سک بے وار کُتاں۔۔۔۔۔۔
بَلے اے سالی ھور ءَ سک باز گْوارتگ اَت ھلک ءِ چاریں نیمگ ءَ آپ اَت مردمانی لاچاری ءُ بزگی ءَ سپورہ دیست نہ کنگ ءَ اَت کہ ھلک ءِ مردمانی مال ءُ مڈّی آپ ءِ میار ئِے اِتاں، لوگ چہ آپ پُر ئِے اِتاں، چُکانی گریوگ ءُ دلوتانی اَبیکیں موتکاں سؔپورہ گیشتر تکانسر ءُ رنجینتگ اَت گْوش ئے آزمان سپورہ ئِے نِزوریں کوپگاں ایر اَت، بَلے ھدا یے کدرتاں کَسی دست رَست نہ کنت ھلک آپ ئِے باھوٹ اَت بس سپورہ تماشائی اَت۔۔۔سیمی روچ ءَ اَنگتہ آپ ءَ کم نہ کُتگ اَت ھمے وڑا آپ دپ مہ دپ اَت ھلک ءِ مردم دْرست کوہ ئِے سرا نِشتگ ئِے اِتاں زند ءِ گِران ءُ بے چاڑ تریں روچاں گندگ ئِے اِتاں۔ سپورہ جیڑگ ءُ الوت ءَ اَت “اگاں اے رَندی یے آپ کم بہ بیت ءُ ھلک ءَ یلہ بہ دَنت مہ چے ھلک ءَ لڈیں دِگہ ھلک ئِے پہ وت شوھاز کنیں”۔۔۔پدا سپورہ جیڑ اِت “اگاں ما اے ھلک یل بہ کن اِیں گڑا اے ھلک ئِے مردم دْرست ٹولی ٹولی بنت ھر کس پہ وت روت ھر کَس دِگہ ھلک ئِے شوھاز اِیت مارا پدا مردمانی تھتال کُش اَنت”۔۔۔
پنچ روچ اَت آپ اَنگت وتی مالار ءَ اَت کہ ھلک ئِے سرا زُرتگ اَت نا لوگ پشت کپتگ ئِے اِتاں نا مال ءُ دلوتانی دوارجاہ بلے چَہ پیشی ڈول ءَ مرچی کورے آپ کم منتگ اَت میتگ ءَ را آپ ءَ یل کُتگ اَت۔ مردم چہ کوہ ئِے سرا ایرکپتگ ءِ اِتاں وتی بانڈُمیں لوگانی ندارہ کنگ ءَ اِتاں۔۔۔سپورہ سک تکانسر اَت ءُ باز جیڑگ اَت باریں منی ھلک ئِے آکبت چے بیت؟ مردم نو دْرست ٹولی ٹولی بنت کس کسیگی نہ بیت منی کمپان ئِے دیمے کاپر ھورک بیت، چات وَ پسرا کور ءَ وتی ھرجان جتگ اَت۔۔۔سپورہ دْرستیں مردم یکجاہ کُتگ ءِ اِتاں گپ ءَ اَت ” مئے ھلک سرجم ءَ کور ءَ ویران کُت مئے چات کور ءَ بار دات مئے مسیت کپتگ وانگجاہ گوات ءَ روسینتگ نو دِگہ ھچ پَشت نہ کپتگ اگاں چِداں بہ لڈیں ءُ دگہ ھلک ئِے پہ وت ءَ شوھاز بہ کنیں منی ھیال ءَ شرتِر اِنت، ما نہ لوٹ اِیں مئے ھَلک دْرست ٹولی ٹولی بہ بیت ما پدا یکجاھی لوٹ اِیں مئے چات، مئے مسیت، مئے وانگجاہ، مئے کبرستان دْرست یکیں بہ بنت مئے آکوٹ ھم جدا مہ بیت “۔۔۔ھلک ئِے مردمانی تہ سُکسُکی بِندات بوت، واجہ ناگمان اَچ وتی جاگہ پاد اتک ءُ تران ءَ گْوشت ” ما زانا پیسر ءَ بی بی سپورہ تئ گپ کُجا پُشت ءَ کُتگ؟ ما مرچی اوں گوں تو تپاک اِیں تو ھر کجا روئے ما تئی ھمراھیں ترا یل نہ کنیں”۔۔۔
سپورہ ءَ ھلک ئِے دْرستیں مردماناں جار جَت ءُ ھال دات کہ سُھب ءَ مھلہ مہ چِداں لَڈیں ساربان ئِے کوہ ئِے پُشت ءَ یک سیرکگیں ڈن ءِ ھستیں مہ ھمود ءَ جاھمند باں شُمئے ھر چیز کہ پشت کپتگ ایشاں یکجاہ کن اِت ءُ سُھب ءَ مھلہ کاروان درکیت اِنت۔۔۔سپورہ ءَ ھلک ئِے یل کنگ سَک باز تُورگ ءَ اَت بَلے اد ءَ چے کنت! نا لوگ، نا چات، نا مسیت، نا وانگجاہ نئیکہ کمپان ئِے دیمے کاپر پشت کپتگ اَت سرجمیں ھلک برھنگ اَت، ھار ءَ ھلک تباہ کُتگ اَت۔۔۔۔سُھب ءَ مھلہ کاروان رھادگ بوت، بَلے سپورہ ئِے گوش ئے ھرواہ ھمد ءَ کَل اَت آ را پاد دیم بارگ ءَ نہ اِت اَنت آ سک ملور ءُ بے چاڑ اَت، سپورہ کاروان ئِے ساربان اَت سپورہ زھیروک جنان اَت ترونگلیں ارساں شلینگ ءَ اَت گوں ھمےجیڑگاں ساربان ئِے کوہ رست۔۔۔ سپورہ کاروان ئِے اُشتر واپینت اَنت سرجمیں سامان بوتک اَنت۔ سپورہ ھلک ئِے مردم گوشت اَنت پہ وت ءَ کُڈ ءُ تاگردو ئِے جوڑ کنگ بندات کن اِت کہ مئے سر ساھگ ءَ بہ بیت گوں کاراں سپورہ ءُ دزگٹّ اَت۔۔۔لھتیں کُڈّ ءُ تگردو ھڈّ دات وتی سر اِش ساھگ ءَ کُت۔
ماہ ئِے سرجم بوتگ اَت ھَلک ئِے لڈّ ءُ بار ءَ انگت سپورہ ءِ دل گوں وتی ویرانگیں ھلک ءَ اَت آ را مدام کمپان ءِ دیمے کاپر یات اتک ماسی دْرین ئِے کِسّہ وَ شموشگی چیز نہ اِت اَنت، چات ءُ مسیت آئی ارواہے اِت اَنت۔۔۔
