“آزمانک” شیتان ءِ بزّگی” ارشاد عالم”
“آزمانک” شیتان ءِ بزّگی” ارشاد عالم”
آ شوانگے اَت- سُہب ءَ مہلہ میتگ ءِ رمگ ئےِ چارینگ ءَ بُرت،
یک روچے آ رمگ ءِ چارینگ ءَ اَت کہ یک پیک اپ گاڈی یے اتک ءُ اوشتات، سلام ءُ دعا ءَ پد شوانگ ءَ شِیر چائے اڑ کت- مردمان ءَ وارینت چاہ ءُ آپ ورگ ءَ پد آ واتر بوت انت-
دومی روچ ءَ شوانگ ھمے جاہ ءَ رمگ ءِ چارینگ ءَ اَت کہ ھمے مردم پدا اتک انت- بلے اے بری گاڑی ءَ بازیں گرنچے مان اَت- شوانگ ءِ کِرّا آپ ءُ چاہ کنگ ءَ پد پدا واتر بوت انت- اِشانی روگ ءَ پد شوانگ پگر ءُ ھیالاں کپت کہ اے چونیں مردم انت ءُ چے کار ءُ دھندہ کن انت- اد ءَ ناں دگہ ناں رھسرے الّم اے ھونی داریں مردم بنت یا کہ دُزّ ءُ شپُک بنت- آئی ءِ ھیالانی تانجو نہ سِست وھدیکہ شپ ءَ لوگ ءَ اتک تاں دیراں آئی ءَ واب نیاتک گیشتر ھمے پگر ءَ پریشان کتگ اَت کہ من پرچا اِشاں جُست نہ کت-
ھمے وڑ ءَ سیمی روچ ءَ اے مردم پدا اتک انت- شوانگ ءَ اوپار نہ شت، گُشت ئےِ ے واجہاں! من شُمارا جُستے کنگ لوٹاں اگن شُما بد نہ بر اِت? ترا ھرچ جُستے کنگی انت کت کن ئے, چریشاں چہ مزن بروتیں ءُ پزّوریں مردے ءَ پسّو دات، واجہ! منی جست ایش انت کہ شما چونیں کار ءُ دھندہ کن اِت اے کوہ کہ اِد ءَ گرماگی روچاں مُرگ پہ بال مِرنَت اِد ءَ ناں دگہ ناں رھسرے شمارا گاڑی گون انت اے گریشگاں ویل ات, راست راست دروگ دروگ مئے کار شیتان ءِ کار اِنت ھرچی مارا شیتان پرمائیت ما ھما ڈول کنیں ھمے شیتان مارا پرمائیت پِلانی ءَ بجن اِت، پِلانی بہ پُل اِت اے کوہ ءُ گریشگ مئے بازار اَنت- چہ ھماہاں کوتاہ قدیں مردمے ءَ پسّو دات،، بلے شیتان ءِ کاراں واجہ ھُدا وشّ نہ بیت شمارا زاناں چہ واجہ ھُدا ءَ نہ تُرسیت, شوانگ ءَ پہ بزّگی گُشت،، واجہ ھُدا ءِ تُرس مارا است اِنت بلے لاپ ءُ پُچ ءِ تُرس ھم، دگہ گپےّ ءَ سرپد ئے اے امروز ءَ ساپیں کار ءُ دھند ءَ ھچ شرپ ءُ عزت ءُ زرّ نیست اگاں اے ملک ءَ کسے راستیں کار بکنت زرّ آئی ءِ کِرّا نئیت مہلوک آئی ءِ سلام ءَ ھم علیک نہ کنت مئے شرپ ءُ عزت اَد ءِ زانتکاریں مردم ءُ اَپسراں چہ گیشتر انت- اے گپاّنی اُشکنگ ءَ پد شوانگ پہک ابکّہ ءُ ہیران بوت اے مردماں ھم مار اِت کہ شوانگ ھم وتی بیوسی ءُ بزّگی ءِ دیما لاچار اِنت،، گڑا تو مئے ھمرائی ءَ ھمے ڈولیں کار ءُ دھندہ کن ئے گوں،، یک مردے ءَ جست کت۔ تاں زنڈیں ساھتے پگر ءُ ھیالاں پد شوانگ ءَ ھو! کت،، تئی کار ھمیش انت کہ تو اے بُکچہ ءَ پِلانی ءَ سر بکن مزن بروتیں مرد ءَ گُشت،، دگہ مردے ءَ بُکچہ چہ گاڑی ءَ ایر گیتک کہ چہ ہیروین ءَ پُر اَت۔
شوانگ ءَ بُکچہ زُرت پَس سردیان کت انت- دیم پہ میتگ ءَ رھادگ بوت آئی ءَ بُکچہ نام گپتیں مرد ءَ دات انت-
ایندگہ روچ ءَ مردم پدا اتک انت اے رندی شوانگا ءَ دگہ بُکچہ دات اِش کہ پلانی ءَ سر اِش بکن بلے اے بری شوانگ ءَ پنجاہ ھزار کلدار اِش ھم دات۔
لہتیں وھد ءَ پد شوانگ ءَ وتی شوانگی یلہ کت- نوں آئی ءِ تب، ھیل، عادت ءُ نفسیات بدل بوھان بوت انت- چد ءُ پیسر کہ آئی ءِ گُد دِرتگ اِت اَنت نوں نوکیں کاٹن نہ پُرشت انت- نوں سواسانی بدل ءَ نوکیں چوٹ ئےِ پادا اَت، راڈو گڑی یے دست ءَ اِت ئےِ بازار ءِ مردم ھبکّہ ءُ ہیران اِت اَنت کہ اے شوانگ چون زوت سیر بوت ایشی ءِ کرّا زرّ کُجا چہ اتک مردماں گیش آئی ءِ سیاد ءُ وارث ہیران اِت انت- کہ اے مرد چون سیر بوت سالے ساری پہ ھُشکیں نگنے ءَ واستیگ مند اَت آ سرپد نہ اِت اَنت کہ چے کار ءُ دھندہ کنگ ءَ اِنت۔
دگہ لہتیں مُدّت ءَ چہ پد آئی ءَ وتی کرگین ءِ جاگہ ءَ بلڈنگے بَست کہ بازار ءِ شرّتریں بلڈنگاں ھساب بوت-
دگہ لہتیں وھد ءَ پد شرّیں مہمان جاھے بست کہ آئی ءِ مہمان جاہ مُدام چہ مردم ءَ دپ ماں دپ اَت ھر شپ شراب ءُ کباب ءِ دیوان اَت نوں آئی ءِ سنگتی گوں مزن مزنیں مردمان اَت نوں وزیر، گزیر ، ڈی سی، مزن مزنیں اَپیسر آئی ءِ سنگت جوڑ بوتگ اِت انت۔ اگاں کسے ءَ سرکاری کارے بوت بازار ءِ مردم سفارش ءِ واستا ھمائی ءِ کرّا شُت انت پرچا کہ سرکار ئے مردم آئی ءِ ھبراں چہ نا ھبر نہ بوت انت- پیسرا آئی ءِ نام صوالی اَت نوں صالح محمد بوت۔
یک روچے صالح محمد ایوک ءَ لوگ ءَ نشتگ اَت شراب ورگ ءَ اَت آئی ءَ وتی گْوستگیں روچ سکاّ گیر اتک انت اے پگر ءُ ھیالاں چہ آئی ءَ دومی دنیا گیر اتک آئی ءَ اے گپ ءِ سرا بژن بوت کہ من اے دنیا ءِ ھاترا باز کار کنگ ءَ آں بلے دومی دنیا ءِ واستا ھچ کنگ ءَ نہ آں دنیا ءَ نیکیں کار کنگی اِنت تانکہ واجہ ھُدا منی گُناھاں بہ بخشیت ھمے پگر ءُ ھیالاں آئی ءِ دل سکّ نرم کت آئی ءَ نماز وانگ بندات کُت-
لہتیں وھد ءَ پد حج ئےِ ھم کت نوں صالح محمد حاجی صالح محمد بوت بازار ءِ سجّہیں مردماں آئی ءِ توسیپ ءُ ستا کت کہ حاجی شرّیں مردمے، داد بخشے، راج دوستے۔
یک شپے حاجی صالح محمد واب اَت کہ آئی ءَ وابے دیست کہ شیتان اِنت اتکگ آئی ءِ سرون ءَ اوشتاتگ زار زار ءَ گریوگ ءَ اِنت آئی ءِ جیگ چہ ارساں میچل اَت دپ ءِ پُر ءَ گُشگ ءَ اَت اڑے صوالی ترا یات نہ بیت کہ تو سکّ وار ءُ عزاب ات ئے تئی پاداں چپل نیست ات پہ چُنڈے نگن ءَ واستیگ ات ئے مرچی اگاں تو سیر ءُ آباد ئے منی برکت ءَ، من ترا سیر کت بلے تو چہ من پہک شمشکار بوت ئے منی شگر ءُ منّت ءِ بدل ءَ تئی لوگ ءِ دپ ءَ نبشتہ اِنت ھذا من فضل ربی۔
*****
*****
گوں طارق پشکانی ءِ منتواری