تو من ءَ کُشت کن ئے بلے.آزمانکار: منیر عیسی
“آزمانک,, تو من ءَ کُشت کن ئے بلے…”
چادرھی ماہ ءِ مورک مُج اتگ- استالان ءَ گُبارے مں دپ ءَ ات- جمبرانی شینک آزمان ءِ سر ءَ انچو گرد ءُ ترّ کنگ ءَ ات- زمین ءُ آزمان بے تواری ءِ آماچ ات ناں توارے نیکہ چڑکایے- بلے کاروان دیم پہ منزل ءَ روان ات-آئی ءِ منزل،مُرادانی منزل، گام پہ گام نزّیک تِربیان ات-پدءَشپ ءِ سپر کْوھنیں ٹپّانی کُدینگ ءَ وتی مٹّ وت انت- چاردھی ماہ گرماگ ءِ شپ،بے پڑکائی ءَ ساربان مراد ءِ دپ ءَ زھیروکے درآھت- آئی ءَ الھان چست کت بلے مروچی چہ آئیءِ دپ ءَ ساربان ءِ زھیروک درآھگءَ نہ ات- موتک ءِ زھیروک ءِ الھان ات بگ ءِ ٹلینگوکانی توار ءَ اے زھیروک ءَ را زئیپ کتگ، بلے مراد گوں زھیروک ءَ دیم ءَ روان ات-آ گرماگ ءِ شپاں پہ ھمے ھاترا سپر کنگ ءَ ات کہ روچاں سکّ گرم بیت ءُ اے بوتگ کہ مُرگ چہ بال ءَ مُرتگ انت- پد ءَ مراد آدم زاتے آئی ءِ بستار چی یے؟ شپ پلگ ءَ ات-ماہ جوان ءَ ات بلے گُبار ءَ آئی ءِ تام کشّ اتگ ات- کسے زانت کہ انشپی چوشیں شپے کیت، مراد ءِ منزل…. سبزل بندی جاہ ءَ پاھو ودار جاہ ءَ بنداَت-آئیارا کوش ءِ ڈوبہ ءَ دزگیر کنگ بوتگ-بلے آ چہ اے کار ءَ پشومان نہ ات، آئی ءِ دیم مُدام رُژنا ات-دپ ھندگ ءَ پُر اَت- ھر وھد کہ سنگت، دوست ءُ ھبمل آئی ءِ گْور ءَ گندوک ءَ آھتگ اتنت- گڑا آئی ءِ ھبر ھمیش ات:
“من وتی منزل نزیک کتگ-نوں شمئے باری انت،،
کسے زانت کئی باری کیت-وھد کسی بندی نہ بیت-ھر کس وھد ءِ بندی انت بلے سبزل……..
سبزل ءَ سال ءِ پُرّاَت کہ بندی جاہ ءَ کیزاَت ءُ پاھو ودار جاہ ءَ نشتگ ءُ روچاں ھساب کنگ ءَ ات آئیارا اے گَم پِر نہ ات کہ آ پاھو ءَ درنجگ بیت-آئی ءِ گم ھمیش ات کہ آئندگ چو بیت-ھما نھال کہ کَل کنگ بوتگ جوڑ ءُ شاہ کنت-یاکہ زمانگ ءِ تاڑ ءُ تیلانکاں گیمُر اَنت سنگتاں مزنیں دلبڈّی یے داتگ بلے بے باوریں دل کدی باورکنت؟پرچاکہ آئیارا اے ھند ءَ رسینوک ھم آئی ءِ سنگت انت- راست انت کہ دردانی دیوک مدام وتی بنت- اگاں ناں مروچی سبزل اے جاہ ءَ سر نہ بوتگ ات-ھمے بیسہ ءُ ستک ات کہ سبزل دزگیر کنگ بوت ءُ بندی جاہ ءَ آھت ءُ رست-اگاں آروچی سنگتاں ھمراھی بہ کتیں گڑا سبزل ءِ جاہ اے نہ ات- ھیر! ھرچی بوت، بوت-نوں رند ءِ پشومانی ءَ ھچ نہ رس ایت-آ زند، زندے نہ انت کہ چمداری ءَ بگْوزیت زند ءِ گْوازینگ ءِ وتی دود انت- سبزل ءَ وتی زند ءِ مکسد ءُ مراد گیشّینتگ انت ءُ ھمائی ءِ پدءَ روگءَ بوتگ ءُ تاں روچ ء مروچی کہ پاھو ودار جاہ ءَ سربوتگ بلے انگت دلجم انت ءُ گْوشیت کہ منی زند ھمیش بوتگ ھمیش انت- اگاں سد رنداں زند برسیت شنک دیاں بلے چہ وتی راہءَ ھجبر نہ تتّراں کہ منی راہ منءَ دیم پہ مرادانی ھما منزل ءَ بارت کہ اود ءَ……….
گرماگ ءِ شپ ءَ مھلوک ءَ وتی لوگ ءُ جاگہ یلہ کتگ انت ءُ در ءَ وپتگ انت کہ گْوات بہ لگّیت-لوگ ءِ تھا گرمی ءَ نپس درکیت کَے ءَ چوشیں سگّے ھست کہ گرم ءُ لھڑ ءِ تھا وپت بہ کنت یک نیمگ ءَ گرم ءُ دومی نیمگ ءَ پشگ واب ءَ نیل انت- گڑا شرّ تِر ھمیش انت کہ مردم ڈنّ ءَ بہ وپسیت-گْواتے لگّیت-ھمے گرم ءِ سٹ انت کہ کچکّانی ھما گبءُ گاپ نیست آ ھم بے توار انت ناں کلونزگے، نیکہ وکگّ- بلکیں وشّیں وابے کنگ ءَ انت- آ چہ اے ھبر ءَ دلجم انت کہ اے جاہ دُزّ نئیت گڑا وتی چماّنی واب ءَ پرچا بہ بر اَنت- اگاں پادانی بْرمشے بوت گڑا دزّ ءَ را ماس انت کہ بہ روت-ما میتگءَ سر ءَ زوریں مئے کار میتگ ءِ رکّینگ انت- بلے پادانی بْرمش وتی جاہ انت ما دگہ مردمانی بُو ءَ ھم پجّہ کاریں-گڑا ما پرچا اے دوئیں پاساں چمّ نز مہ کنیں ءُ وتی کونایگ ءِ سرا مہ پْروشیں-پرچا کے زانت کہ رند ءَ چہ بیت کدی اے زند گمانی وڈالی بیت-
شپ مدان مدان ءَ گوزگ ءَ ات ماہ ءُ ستال تاموری ءِ آماچ اتنت- بلے انگت منزل ءَ بُرّگ ءَ اتنت-گوں شپ ءِ تھاری ءَ جنگ ءُ میڑ کنان ءَ سھب ءِ رُژنائی ءِ راہ ءَ آسرات کنگ ءَ ات انت- آھانی زند ءِ مکسد ءُ مراد رُژنائی ءِ تالان کنگ ات-رُژنائی، رژنائی، ھمے رژنائی ءِ تُرس ءَ اجمل چہ واب ءَ پادآھت ءُ وتی لوگ ءِ چراگ ءِ وٹّ ئےِ بُرز ءَ کت-شپ ءِ سیمی پاس گْوستگ ھمے ھاتر ءَ اجمل وتی گُد ءُ پچ بدل کت انت ءُ رھادگ بوت دومی نیمگ ءَ ڈاکٹر شبیر ھم چہ وتی اوتاک ءَ درآھت-
راہ ءَ اجمل ءَ شبیر ءَ دیست- سئینانی منزل یک ات-سئیں ھور بوت انت ءُ دیم پہ منزل ءَ رھادگ بوت انت-منزل…. سئیں یک مزنیں ڈکے ءِ دیم ءَ رست انت- اے ڈک ءِ دو دود انت کہ گونڈیں دروازگ پچ کنگ بیت-بلے انشپی شپ ءِ نیم ءَ مزنیں دروازگ پچ کنگ بوت ءُ اے سئیں تھا پُترات انت- اود ءَ ساڑی ئیں مردماں آھاں سلام کت ءُ اے سئیں یکجاہ بوت انت ءُ نشت انت- ایشانی دگہ سنگت ھم آھت ءُ سر بوت انت- ھال ءُ اھوال ءِ جست کنگ ءَ پد چہ جاہ ءَ پاد آھت ءُ رھادگ بوت انت- ایشانی توار انچو جھل ات زاناں کہ دزّی ءَ روگ ءَ انت- یک دگر ءِ دیم چارت کت نہ کنگ ءَ اتنت-انچو گندگ ءَ کیت کہ چہ یک دگرے ءَ گیرانت-بلے پدّرائی ءَ منزل اش یک ات-تہ ءِ گپّ ءَ کس زانت نہ کنت کہ دل ءِ ھبر چی انت- بلے اے وھد ءَ ھم تپاک انت-
آ کُل ھمگام بوت انت ءُ رگادگ بوت انت مدان مدان ءَ دیم ءَ روگءَ اتنت کہ آھانی گوشاں چیھال ءِ توارے آھت-
“من زندگ باں، من ءَ کس کُشت نہ کنت-من ءَ پاھو ءَ درنج ئے تیرانی آماچ کن ئے-بلے من تاں ھما وھد ءَ زندگ باں کہ تو زندگ ئے اے جھاں ھست انت- اے جھان ءِ آدم زات ھست انت-منی زند گوں آدم زات ءَ بندوک انت-،،
گوں ھمے چیھال ءِ توار ءَ میتگ ءِ کچکّاں زُرمبشتے زُرت-۔ھلوک چہ واب ءَ پادآھت ءُ گوش ٹاپرینت اِش تانکہ اے ھبر ءَ بزان انت کہ آ کجام سرمچار انت کہ اے وھد ءَ چیھال جنگ ءَ انت-اے توار چہ کجا پیداک انت ءُ سرپد بوت انت کہ توار چہ کجا پیداک انت- انشپی چہ بوگ ءَ انت بلے گُنگ انت زبان-
سبزل ءَ چہ پاھو دوارجاہ ءَ در کنگ بوت ءُ آئی ءِ چیھال ءِ توار ءَ جھانے سرزُرت، آئی ءِ توار ءَ کوہ جسکگ ءَ اتنت-چہ آئی ءِ کوکّار ءَ بان ءُ ماڑی لرزگ ءَ اتنت-بندی جاہ ءِ کارندہ ھیران اتنت-آھاں وتی تیوگیں زند ءَ چوشیں ھبر نہ اشکتگ ءُ نیکہ دیستگ بلے انشپی سبزل آھاں یاتے دیگ ءَ انت- ابدمانیں یاتے- آسر آئیارا پاھو جاہ ءَ سر کنگ بوت- کوشکار آئی ءِ دستاں پشت ءَ بندگ ءُ کلاہ سر ءَ دیگ ءَ دیم ءَ شت گڑا سبزل ءَ گْوشت:
“کمّیں سبر ءَ دار،،
ءُ آئی ءَ پاھو ءِ ساد وتی دست ءَ زُرت-تیوگیں مردم ھیران بوت انت کہ اے نوں چرّ اتگ، گنوک بوتگ- مرگ ءَ دیم ءَ گندگ ءَ انت چوش مہ بیت کہ ھمے ساد ءَ بہ سندیت-ھمے ھاترا آھاں کوشکار توار پر جت-
“زوت کن-ایشی ءِ دستاں بند،،
بلے….کوشکار دوگام دیم ءَ کنز اِت ءُ آئی ءَ دیست کہ سبزل ءَ ساد وتی نزّیک ءَ آورت ءُ آئی ءَ چُکّے گپت ئےِ ءُ گْوشت ئےِ :
“تو من ءَ کُشت کن ئے بلے……..
منیر عیسیٰ / ماھتاک بلوچی
**************
پَہ باسک دیوان ءَ دیم ءَ آروک : طارق پشُّکانی
**************
پَہ باسک دیوان ءَ دیم ءَ آروک : طارق پشُّکانی