زندمان جَـؤریں بدانی ساهگ ءَ

*********************
( گل خان نصیر ءِ پلین ارواح ءَ )
زندمان جَـؤریں بدانی ساهگ ءَ تژن ـ
ٹاکور و گلامی ءِ بیت مَیار
وشنیتک اِش بیم په چم کشی دَینت
دیمرئی ءِ راه و روچ اِش بنت گار
مَؤتے بیت لؤپ زند ءِ پهنات و تکاں
جیل و بند بیت یا بَز و شتکین تلار
واهگان اِش په مراداں شـَنک جن انت
بنت سرجهل راج ءِ پدریچیں مزار
دپتر و پَهراں و نام اِش بنت مجاں
رؤژناییں رؤچ بنت اِش شپ تهار

بیم و پاترپ و زراب بیت هر گوئر ءَ
نے گـَت اِش بیت په وتا و نئیکه سار
هر گوئر ءَ چارئے گلامی ءِ ماں بند
راج ءِ گِهگیریں سران اِنت سد شکار
راه پولیت سنگتاں و سرجن اِت
راج ءِ پهوال ، شپچراگیں زانتکار
نے بدانی کس مَهار ءَ راه بارت
نے شگاناں ششت بنت په هِیرّ و هار
آجویی انت آجویی انت آجویی
راج ءِ درداں انسر انت تاں، بیت بهار
سوب ٹـِک دنت ماں بلوچ ءِ هَند و ڈیه
همتاں بنت گر که زانت ءِ بور سوار
کریم بلوچ ـ تهل
استخانف ـ اک
04.05.14

زندمان جَـؤریں بدانی ساهگ ءَ۔ ۔ ۔ ۔ میر گل خان نصیر ءِ نام ءَ کریم تھل ءِ پربند