Baask- Home of Balochi Language, Literature & Culture

Balochi Literature بلوچی ادب => بلوچی شئیر ءُ پـِربَـنـد Balouchi Poetry => باسکانی دیوان ءِبلوچی شائر Baask's Poets => Topic started by: Zahida Raees Raji on January 22, 2015, 10:08:58 AM

Title: ہر چنت بہ کنت زندگی پادار کجا انت، زاھدہ راجی ءِ دستونک شمئے چمشانک ءِ وداریگ
Post by: Zahida Raees Raji on January 22, 2015, 10:08:58 AM
سلام ءُ دروت باسکاں
امیت انت کہ شما وش ءُ دراہ ات۔  وتی نوکیں پربندے پہ شمئے تچکیں چمشانک ءَ ادا ایر کنگ ءَ آں۔
امیت انت کہ شما چہ وتی دزگٹیاں کمے وھد ادا ھم دئیت۔
شمئے چمشانکانی رھچار ءُ منتوار
 

زاھدہ رئیس راجی
 
دستونک
 
بے ترک ءُ تواریں دلے، کُکار کجا انت
آ سبر کنان اِنت،  تئ  اوپار کجا انت
 
گوں پرشتگیں کانچانی تہ ءَ پرشتگیں اکساں
بیا اُرتی ءَ چاریں،  کئ پجّار کجا انت
 
ھررند چہ من مہر ءِ زمین ءَ ھمے پُرس اِت
بامردیں رواجانی ، روادار کجا انت
 
اے دنز ءُ گبارانی تہ ءَ زند نہ گواھیت
بے مہریں جہان ءَ تئ بستار کجا انت
 
آ نیر بہ دنت، زہر بہ دنت ، مہر  بہ دنت شرّ
ہر چنت بہ کنت، زندگی  پادار کجا انت
 
دمبرتگیں ارواھے ءَ ھر کنڈ ءَ شھازات
پُر مہر یں دلانی  تب ءِ بازار کجا انت
 
چم چُپت کتیں ، بُرت کتیں ، ھرچے روا ات
ہر روچ اِدا محشر ءِ دربار کجا انت؟
 
تاں کد مں چوشیں ھشکیں بٹآکانی سرا باں
نوں گم وَ سرا انت  بلے گموار کجا انت
 
آ کردے کہ امروز ءِ دل ءَ چیئر مہ ترایت
راجی نوں چُشیں صاحب ِ کردارکجا اِنت
 
 زاھدہ رئیس راجی