Baask- Home of Balochi Language, Literature & Culture

Balochi Literature بلوچی ادب => بلوچی شئیر ءُ پـِربَـنـد Balouchi Poetry => باسکانی دیوان ءِبلوچی شائر Baask's Poets => Topic started by: Zahida Raees Raji on May 10, 2015, 03:09:24 PM

Title: وتی مکّھیں مات ءِ نام ءَ۔ مجیب ولی ءِ لچّہ ندر انت پہ باسک ءِ وانوکاں
Post by: Zahida Raees Raji on May 10, 2015, 03:09:24 PM
(وتی مکّھیں مات ءِ نام ءَ)
مجیب ولی

مادر منی
او مکّھیں مادر منی
او دیدگیں مادر منی
تئی رُژن ءِ منّت اِنت کہ زندگ آں
تئی سواب ءِ کلّیگ ءَ داں روچ ء مرچی وتی تُنّ ءَ پْروش آں
تئی گْرانبھائیں مِھر منی منزل ءِ منی گامگیج
منی رھبر
نزان آں چے بگْوش آں
نزان آں مھر ءِ تئی کُجام کسّہ ءَ بیار آں
ھمے تئی مھر اَنت من ءَ زند ءِ متلب ءَ ڈسّ اَنت
من زان آں پر من تو چنچو روچ گْوازینتگ
پہ واری
پہ گاری
چمچاری
ءُ
سرگاری
ھمے کہ سُھب ءَ روچ ءَ ٹِک داتگ
ھمے کہ من وتی چم پچ کُت اَنت واب ءَ
من چار آں چاہ ءُ نگن، ھر دو دست بند اَنت تئی
اے زندگی ءِ منی گُڈّی تُنّ ءِ ارمان اَت
کہ زند ءِ من تئی ھمُک واھگ ءَ بہ بہ آں سرجم
منی اے زند تئی مُھبتانی وامدار اِنت
مُردار اِنت
منی اے زند تئی لیلوانی آوازے
منی اے زند تئی پاسے ءِ نہ بیت تنگہ
کُج ءَ من ءُ کُج ءَ تئی مھرانی گنجیں امروز
کہ سارتیں انچو گْوش ئے جنّت ءِ یک سرگْواتے
منی او مات
منی رھبر ءُ منی رھشون
من زان آں جیڑ ئے دنیگا تو پہ من ءَ پاساں
گْوز اِیت تئی سھت ءُ دماں گوں ھمے وسواساں
کہ باریں بچ منی زند ءَ چون گْوازین اِیت
کہ باریں بیت کدی مرادانی منزل ءَ سر بیت
دنیگا جیڑ ئے پہ من
ءُ مناں
کہ ھچ سما نیست
کہ تو چون ئے
کُجام درد تئی پاد ءِ کُنٹگاں شِلّیں
کن اَنت آزگ ءُ ٹپّیگ گْوستگیں درداں
نزان آں من کہ منی زندگی کُج ءَ گار اِنت
اگاں بہ گیشّ آں وتی زند ءِ جاوراں تھلیں
گُڑا پد ءَ من تئی چارگ ءَ دُبر کا آں
گُڑا پد ءَ من تئی چارگ ءَ دُبر کا آں
10/5/2015 جتّی