Fahad Bhai:
purKhulooS tasleemaat,
aane meN taaKheer hoovii tu kuch bahec e taaKheer bhi thee.
go keh maiN is laRii (topic) meN kuch kehne kee khwahish naheeN rakhtee thee kyouNkeh aap abhi seekhne ke marHale meN heN aur abhi is raah e shauq (shaairee ke medaan meN) meN kaheN saare moR aage aane heN jahaN se guzre baGhair aap sherii adab meN Khud ko manwaa naheeN sakte.
aur chonkeh abhi aap ne likhne ka safar shuruu kiyaa hai tu meree naZar meN aap par is marHale meN rok tok karna na-munasib hai.
lekin arakeen e bazm kee guftugu se paidaa hone waalii uljhan ko madd e naZar rakhte hoove aap ke liYe chand baateN kehnaa chahoongii is yaqeen ke saath keh aap inheN macbat lenge.
1. shaa,iree Khuda daad SalaHiyat ka naam tu hai hee jo qismat se miltee hai lekin saath hee sher goyii ek fan bhi hai jiske israar o ramooz jaane baGhair aap kee taKhleeq she'r kee Heciyat se adabii HalqooN meN qaabil e qubool naheeN ho saktee.
2. Yeh Zaroorii naheN hotaa keh jis insaan kee kitaab market meN aa chukii hai woh ek baRaa shaa,ir ho. baRaa shaa,ir woh hota hai jiska she'r paRhne waale ko ba'ad meN bhi yaad rahe.
chaYe Urdu Adab leN yaa Baluchi adab ham us shaa,ir ko apna pasandeedah shaa,ir kehte heN jiska she'r, she'ree asraar o ramooz ko pooraa karne ke saath saath paRhne waale ke dil meN ghar kar le.
3. acha likhne ke liYe acha paRhnaa bohat zaroorii hai. aur kisee bhi zabaan meN aap likheN us zabaan par aap kaa mukammal uboor honaa laazim hai.
iskee micaal is taraH se leejiye keh maiN alhumdulillah jiddi pushtii Baloch hooN lekin Balochii adab ke chonkeh mujhe israar o ramoz naheeN pata isliYe bawajood thoRaa bohat likhne ke maiN khud ko is medaan se khaarij samajhtee hooN.
lekin yeh naheeN hai keh maiN koshish tark kar dooN. koshish ke saath saath ache adab ka mutalieha aur Khud se behtar likhne waalooN kee aaraa aur rehnumayii meree un tamaam kamzoriyoN ko waqt ke saath saath door kar de gee jo is waqt meree Baluchi sha,iree meN maujood hai.
mera yahii mashavarah isee Hikmat e a'mlii ke saath apnaane ke liYe aap ko doongii.
4. aap apnii Urdu shaairee ko baareekii se samajhne ke liYe koshish keejiye keh un eHbaab kee SuHbat iKhtiyaar keejiye jo tanqeed baraYe iSlaaH ke qaa,il hooN. micaal ke taur par is laRii meN dekhiye yeh shaa,ir koyii nau-aamoz ShaKhSiyat naheeN hai balkeh kauna-mashqooN meN iskaa shumaar hota hai:
http://bazm.urduanjuman.com/index.php?topic=2029.04. ek acha shaa,ir a'am see baat ko KhaaS andaaz se baYaan karta hai. she'r ke har do miSrooN ka baham rabt^ bohat zarooii hai. aur yeh hotee kyaa cheez hai iske liYe ache shaa,iroN ke kalaam ko paRhnaa aur samajhnaa bohat zaroori hai.
Ahmad (Gwadari) ne aap se yeh kahaa keh insaan kee zindagi meN ache aur bure donoN hee Halaat hote hee heN aur ise aam alfaaz meN bayaan karne kar dene meN kaun see baRee baat hai. aur unkee yeh baat apnii jaga durust hai.
aap ne kahaa
kabhi hans ke tu kabhi ro ke guzartii jaa rahii hai
yeh zindagi ajeeb khail kheltii jaa rahii hai
is she'r meN bayaan bhi kamzor hai aur Khayaal bhi aaam saa hai aur donoN miSrooN ka baham rabt^ bhi naheeN hai.
sab se baRee kamzorii yeh hai keh aap ne mushkil radeef ka intiKhaab kiyaa hai "jaa rahii hai " jise nibhanaa asaan naheeN hai.
aap apnii "koshish" aasaan radeef peh keejiye aur phir waqt ke saath saath mushkil kee taraf aahiYe.
baRe shaurah kee asaan GhazlooN ko saamne rakhiye aur un zameenoN par Khud se likhne kee koshish keejiye.
maiN filwaqt aapko yeh mashvarah doongii keh bajaYe mujhe aur Naheed ko consider karne ke aap Urdu ke maane hoove ehl e qalam kee nighaarishaat aur taKhleeqaat ko paRhiye aur unheN samajhhiye phir dekhiye aap ke qalam meN kyaa taceer paida hotee hai.
meree dua'aeN hameshah aap ke saath hongii.
Sada Khush raho
dua'a go
Aap kee Baaji