mere mola yeh haseeN haath salamat rakhna
aisa lagta hai jo yeh haath dua ko uthein
khud farishtay chale aate hon zameen ki janib
saunp kar mar-marein hathon ki hathaili ko hina
jo bhi maanga ho woh chup chap diye jate hon
mere mola yeh haseeN haath salamat rakhna
inn ki khushboo se mua'tar hai mera sara wajood
inhein haathon mein mere khwaab chupe hein mola
ungliyaan mujh ko mohabbat mein bhigo daiti hein
inhein pooron ne mere dard chune hein mola
inn ki rag rag mein mohabbat hi mohabbat rakhna
mere mola yeh haseeN haath salamat rakhna
inhein haathoN ki lakeeron mein muqadar hai mera
yeh jo kone mein sitara hai sikandar hai mera
khwaab se narm khayaloN ki tarah nazuk hein
in k her lams mein mere liye chahat rakhna
mere mola yeh haseeN haath salamat rakhna
~ WASI SHAH