pulleN dewaan, salaam o droot !
yak barii padaa shumey hizmat a yak dige dastooNkii nadr kanaaN ! umeet ent keh shumaa raa naa-dost na bit !
:: Balochi Version ::
داں کدینا وتا بشوہازاں؟
من کہ پُلک ءَ چو سوچن ءَ گاراں!
رنجءِ پُلّان ءُ درد ءِ استالاں
کئے شماریت تئی داتگیں داداں؟
تیوگیں ہلک روچءَ گرستگ ءُ من
تئی غمءِ سارتیں ساھگ ءَ واباں!
سنج رنگیں کپوت چمّانی!
بانزلاں بند گوں مئے دلءِ حالاں!
عُمرے گوستگ یک اَرسے ءِ پد نیست
چنچو تُنّیگ اِنت دیدگ ءِ گیاباں!
جی پہ بولان ءِ ہوں چکیں ماہءَ
ہِنّی ایں ماہکان ءِ ہمراہاں!
زندگی ! باریں تو چہ رنگائے؟
کمُّکے بیا تئی صورت ءَ چاراں!
چو کہ مہلوک ءِ نیّتاں گنداں
من تئی شہر ءِ آسرءَ زاناں!
ای منا چونیں ویلے ءَ گپتگ؟
ساہتے کنداں، ساہتے نالاں!
چہ ہما روچ ءَ دل ترا داتگ
ہر گورا چاراں سبزءُ گلزاراں!
نہ چراگے، نہ شانتُلے، نہ گُلے
زند ءِ گیابان ءَ چنچو تہنایاں!
تو منارا چہ پئیم کُشت کن ئے؟
من کہ بولان ءِ سہب ءُ بیگاہاں!
بِل ضیا! تراولاں سواس کناں
عشق ءِ راہ ءَ شپاد ءَ درکایاں!۔
:: Roman Version ::
1.
daaN kadenaa vataa beshohaazaaN?
man keh pulk a cho sochin a gaaraaN!
2.
raNj-e-pulaan-o-dard-e-istaalaaN
kay shumaaret tai' daatageeN daadaaN?
3.
teevageN halk rooch a grastag o man
ta'i gam-e-saarteN saahig a vaabaaN!
4.
saNj-raNgeN-kapoot-chammaani !
baaNzulaaN baNd goN may dil-e-HaalaaN !
5.
u'mri gvastag yak arsi e pad neest
chiNcho tunneeg ent deedag-e-gyaabaaN !
6.
jee pa Bolan-e-hooN-chakeN-maah a
hinni-eN maahikaan e hamraahaaN !
7.
zindagii ! baareN to che raNgaa ae ?
kammukii byaa ta'i soorat a chaaraaN !
8.
cho keh mahlook e niyyataaN giNdaaN
man ta'ii shahr e aasar a zaanaaN !
9.
ee manaa choneN veli a giptag?
saahatii kaNdaaN, saahatii naalaaN!
10.
cha hamaa rooch a dil taraa daatag
har gvaraa chaaraN, sabz o gulzaaraaN !
11.
na chiraagii, na shaaNtulii, na gulii
zind e gyaabaan a chiNcho tahnaayaaN !
12.
tou manaa raa che paym kusht kan ay?
man keh Bolan e suhb o beegaahaaN !\
13.
bil Zia ! traavalaaN savaas kanaaN
i'shq e raah a shupaad a dar kaayaaN!
................................................................................................
Zia Baloch
[/b]
