(11)
زمانگ ، زانت و هست ءِ وت هدا انت
هدایی مهرے انت،مهر گوں شما انت
دُن و وشبویی ءِ شوهاز ، تو شــوهاز
که پـــُلان ءَ پـه زیب ، وا اے بـــها انت
(12)
کجام مهر انت که مئی درد ءِ دوا انت
کجام رژن انت که مئی زند ءِ سما انت
کجام انت راه ، کجام منزل مئی دیما
کجام روچ و کـُـــجام آپــــسر ادا انت
(13)
دل ءِ واهگ ، سمین ءِ بیل و یار انت
چـَـکرّ انت هر کجا ملک و دیار انت
کدیں پل و کدیں گواڑگ په شوهاز
کدیں راه و کدیں شهراں وا گار انت
(14)
گوزانت سال و مه و روچ هں په بال ءَ
لـُڑانت وهد و زمان ، پگر و هـَیال ءَ
نه سسا گام ءَ داریت و نه سَه سند
ســــلام په زندمان ، جهد و کمال ءَ
(15)
منی امیت ، منی بارگ سمین ئے
زمین و آزمان ، پـُــل گـــهترین ئے
مدامی بات ترا ، تئی شادهیں زند
دُن و بوئــــــے ، و آتـاراں زرین ئے
(16)
زر ءِ امیت ، تئی جـُـهلی کجا انت
گوشنت واهگ منی،جهلیءِ بنءَ انت
منان چمدار پتو ، استار مهر ءِ
که دید ءِ روک منی گون کیگد ءَ انت
(17)
ترا مات و ترا ملک مات دَنت پنت
چه لوگ آباتی ءَ ملک ات ٹهت کنت
مبو چمدار ، مهرانی چه واجـه
که زانتکاراں ، په زانت و جهد یک بنت
(18)
من و تو هر دواں ، یکیں وا ماییں
اگا اوپار کنیں ، دوستیں جتاییں
مبات دوستانی نیام ءَ هم شَر و رَد
که راج ءَ په دواں ، مُهریں کـَـلاییں
(19)
دَؤر ءِ بندیگاں که بندیگ بنت ، وتی آزاتی ءِ نام ءَ
کئی رهچاری په نندانت ، طلاهیں تا که گوربام ءَ
شپ ءِ مهکانی و نیاداں ، گوں پلیں هانل و دوستاں
زهین انت زند ءِ اوتاکاں ،که دار انت شیرکنیں تام ءَ
(20)
پل گلاب ئے تو و نازلیں بچکند
ناز تئی وشبو کنت دلان ءَ ژند
مئی دل ءِ مهراں گوں ماپراں بندئے
دیدگاں دوستئے،ساه چه گیش دلبند
(21)
نود گوار ءِ موسم انت و دل زهیراں ساز کنت
دل زهیراں ساز کنت و گوستگاں همراز کنت
مهر کسانی ءِ کجا انت،گوستگیں روچاں کجنت
مکهیں مات و پت ءِ ترانگ ، گماں امباز کنت