Author Topic: اکس چے گوشیت؟  (Read 9427 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
اکس چے گوشیت؟
« on: July 18, 2012, 10:02:54 AM »
[smg id=5331 type=preview align=center]
[dousten_baaskan]
 ambouen_salaam

باسک دیوان پہ بلوچی لبزانک ءِ رم نویسی ءِ پڑا دیم رؤٰئ ءَ اے سلسلہ ءِ بندات کنگائیں۔ ما ھمک پانزدہ روچ ءِ سرا یک نوکیں اکسے  دئیں ءُ شمارا اشی ءِ چیرا وتی مارشت، پگر، نبشتانک ءُ آزمانک مان دئیگی انت۔
اے پڑا نوک باھندانی راھشونی ھم کنگ بیتیں۔ اگاں کسے وتی نبشتانک ءُ آزمانک ءِ سرا تچکیں چمشانک نہ لؤٹیت گُڑا کس ءَ آئ ءِ نبشتانک ءِ سرا شرگداری ءِ ھک دئیگ نہ بیت۔

اے سلسلہ ءِ اولی اکس اے سرھال ءِ توکا انت۔ شمئے بھر زورگ ءِ راھچار
گوں منہ واری ءَ
وتی راج ءِ ھیر لوٹوک


باسک ءِ ایف بی گروپ ءَ بھر زوروک ادا کلک بہ کن انت۔

https://www.facebook.com/photo.php?fbid=3768240078478&set=oa.487991637882380&type=1&theater
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #1 on: July 18, 2012, 10:55:40 AM »
آزمانک
اُمیت
زاہدہ رئیس راجی
زند ءِ تہاریں شپ ءَ آزمان ءَ بہ گر تاں زمین ءِ ھمک کُنڈ گوں وتی  تارونکی ءَ مان پوشیتگ ات ۔
 گوات ءِ نپس ھم بند ات۔
  درد ءِ زندان ءَ کسانیں درے ہم پچ نہ یت کہ تہاری ءِ جمبراں بہ کنزینت ءُ رُژن ءِ برانزے دیما یارگ ءَ بہ ھلیت بلے اناگہہ وھگ ءِ مہر ءَ اوست  ءِ قندیل  روک کُت انت۔ تہاری ءِ پرائیں دیما تامورےءَ گپت۔ ۔ ۔
 بلے ھما دمان ءَ جاورانی ترندیں لوار ءَ قندیل ء روژنائ شامات جنان کُت انت۔ تہاری گل بُت۔
واھگ ءِ اُمیت درہگ ءَ لگئیت۔ ۔ ۔ نپسی دوگُٹ بیت۔ ۔ ۔
   بلے واھگ ءِ مہر  ءِ اوست ءَ امیت ءِ دست دیما یارت انت ءُ روژنائیں سہب ءِ اوست ءِ قندیل چہ اندیم بئیگ ءَ داشت انت ۔

Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #2 on: July 18, 2012, 11:38:52 AM »
Waleed Garboni e aazmank
مۆلانصیر الدین و آئیءِ سنگت نشت أنت و یک شرطے إیر إیش کۆت. آیاں گۆشت که هر کس سارتیں زمستانی شپا میتگءِ پۆشتءِ جۆمپءِ سرا تاں صحبا به نندیت آئی دادءِ حقدار إنت. ألبت، آئیا په وتی گرم دیگا وتا پر دیگی یا آس روک کنگی نه إنت. مۆلا نصیرالدینءَ شرط منّ إت و شپا جۆمپءِ سرا نشت.
سرجمیں شپ آگاهیا گوازینگی أت، پمیشا ملاءَ گوں وت کتابے بۆرت و تهاریا یک شمعے (موم بتیے) روک کۆت داں کتابا به گندیت.
صحبا سنگتانی گورا په دادءِ زیرگا آتک، گڈا سنگت مۆنکر بوت أنت. آیاں گوش تئے مۆلاءَ شمعے روک کۆتگ. قرار همے بندگ بیتگ که آس روک کنگ مه بیت. مۆلاءَ همنچوک سرکچ دیگءِ جهد کۆت، سنگتاں نه منّ إت.
مۆلاءَ همے گپ دلا داشت. یک روچے سرجمیں سنگت ئی وَرگا دعوت کۆت أنت. په إے مقصدا پسے کۆشت ئی و بلاهیں لوهیگے تها گوشت ئی مان کۆت و پادینکءِ سرا پر ئی کۆت. سنگت سرجم بوت أنت، دیوان أت، گپ و تران بوت. سبارگءِ وهد آتک، بله سبارگ أنگت ساڑی نه أت، ظهرءِ نمازءِ وهد آتک، بله سبارگ گار أت، مۆلاءَ سنگت شور دات أنت که نمازا رند سبارگ به کن أنت پرچاکه سبارگ أنگت ساڑی نه أت. نمازا رند سنگت پدا آتک أنت، بله سبارگ گار أت. سنگتاں مۆلا ڈوبار إت که سبارگ په وهد ساڑی نه أت.
ملاءَ گۆشت أگر شمارا باور نه کنت، بیا إت به چار إت، لوهیگ پر إنت و سبارگ أڈ بیگا إنت. سنگت په چارگا شۆت أنت. اودا گند أت که بلاهیں لوهیگ چه گوشتا پۆر إنت و چیرا شمعے روک إنت. سنگت زهر گپت أنت و گۆشت إش "شۆمّیں مۆلا إے بلاهیں لوهیگ گوں شمعے چونکا گِرَدیت؟"
مۆلاءَ پسه دات "همے شمع وهدے کایناتءِ چیرا منا گرم دات کنت، گڈا چونکا لوهیگے گِراسْت نه کنت؟"
گوں إے گپ کنگا سنگتاں منّ إت که ملاءَ هما شپءِ شرط بۆرتگ.
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #3 on: July 18, 2012, 02:43:05 PM »
آذمانک:
رژن ذندگ بہ بیت:

عندلیب گچکی:

بالاچ تو کجا بوتگے ؟
بالاچ تچانی ء پیداک ات اھی نفس پر بوھگ ء نہ ات. . .
من اھی ء جست گپت. . .
بالاچ :ادا منی رند ء لہتین ھڑکہی کچک کپتگ من ھمیش انت وتی ساہ آرتگ شمے لوگ ء. . .
اے کچکان اوں وڈے کنگ لوٹیت. . .اے تر ء ھچ کت نہ کناں بس وت چانگاں. . .
من اھی ء تسلہ دات ء گشت تو بیا وپس . .
من بالاچ ء_ نپاد پچ کتاں. . .
گونڈیں چکے تورسیتے . . .من وتی دل ء جیڑگ ء اتاں. . .
پو چونیں تہاری ء پدا ھڑکھی کچکاں اوں مے میتگ ء جاگہ کتگ. . .
عندلیب او عندلیب. . .منی بیماریں مات مناں توار ء ات. .
جان اماں. . .من مات ء پسو دات. . .
بیا اے دریگ ء بند کن مناں گمان انت مزنیں ھور ء گوات ۓ ء_. . .
من لوٹت دریگ ء بہ بنداں یکے ء منی دست پشت ء چہ چکت. . .من گوں اجکھی ء پشت ء چارت کس نیست. . . .ھاھاھا
مات:چے بوت؟
من پسو دات
ھچ تہار انت بس مناں تورس ات ذاناں. . .
تہاریں کوٹی ء تہا من انت منی مات انت ء گونڈیں بالاچ انت. . ھمے روکیں قندیل انت. . .
اماں روچ و باند ء درکیت اے تہاری ء پروشیت بلے انشپی چے ؟ ؟ ؟اےقندیل اگں مرت گڈا ؟اے ھمے قندیل انت ایشی روکی ء مے تہاریں کوٹی رژنا انت . . .اے قندیل ء سوب ء منی چم اوں رژنا انت. . .اگں اے مرت گڈا مے کوٹی تہاری ء آماچ بیت مے چم اوں کور بنت ما ھچ نہ گندیں. . . .
پدا بالاچ اوں دلاپ بیت . . .
آماں انشپی توپانی شپ ے . . .
توپانیں گوات کوکار کنان ء پیداک انت . . .دوراھیں جمبر چیہال دیان انت ء پیداک انت. . . .
اماں اے قندیل ء من ذاناں کش انت. . .
منی چم گوں ھمے قندیل ء مرگ ء ھیال ء پر آرس بوتاں . . .
اناں اناں. . .من ایشی ء کشگ ء نئیلان. . .ھچ وڈا. . .
ھوارے ترندیں پٹ ذمین ء سر ء ریچگ ء لگتاں تروندیں گوات اوں ژپ ژپ کنگ ء لگت . . .
دریگ ء پٹ پچ بوتاں. . .کمے بچت کہ اے قندیل ء بکشاں من دور کت وتی دست داشت. . . .
پرچا کہ من لوٹت رژن ذندگ بہ بیت. . .
ھلاس
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #4 on: July 18, 2012, 02:48:30 PM »

دانیال شیردل ءِ آزمانک
Daniel Shirdel
 شپ ءِ 10 بج اَت .من وتی کمپیوٹر ءِ دیما نشتگ اِتوں و نٹ کارمرز کنگ ء اِتوں.ناگتا برق (لئین) شوت اَنت.پدا آ شپ انچیں تهار ماهیں شپے اَت که هچ مَیَم نبوت.قول ءِ منی مات ءَ : "هنچو تهار اِنت که کورے کئیت و بینایے زوریت و رَوت".مات ءَ من ءَ توار کُت : "دانیال..موبایل ءِ لیٹ ءَ روشن کن سکّ تهار اِنت"...."شرّ اِنت منی مات'....من پسّو دات.من موبایل ءِ بٹن جت بلے موبایل ءَ هم چارج مان نیست اَت.۔۔۔۔۔۔۔۔۔۔"منی مات ..موبایل ءَ هم چارج نیست"..۔.......".شرّیں کارے ...نوں چے بکنیں؟"مات ءَ پسّو دات.........من گُشت:" منی هیال ءَ من کابینٹ ءِ توکا یک شمعے( قندیلے) ایر کته........مات پِشکِرَگ ءَ لگّ ات و قندیل ئی در گپت۔ پدا باکس ئی در گپت و ڈیلے جت ئی و قندیل ئی روشن کت......مئے تهاریں شپ پدا رژنا بوت........من و منی مات گوں اے دگه برات و گوهاران همے قندیل ءِ چپّ چاگرد ءَ نشتین و مات ءَ وتی وهدی بی لینی ءِ سرگذشت بنگیج کت :چُکّان...آ وهداں لئین نبوته و ما سکّ دلسیاه بوتگین........
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #5 on: July 18, 2012, 04:54:02 PM »
Adabi Hakeem e Aazmaank
------------------------------
یَـکّ شَـپـے مَـن وَتـی لَهـتـے واجـهـیـں بـراتءُ هـاتـوُنـیـں گـُهـار کَـول داتَـگ اِت اَنـت کـہ مَـن ءُ آ هـوریءَ نِـنـدایـںءُ بـلـوچـی زُبـانءِ بـارَوا پـٹءُ پـول کـن ایـں ، مَـنـی هَـیـال هَـمـش اَت کـہ دَسـت مَـئـی جُـهـد اِنـت ءُ (قـنـدیـل) مـئـی زانـتءِ روک اِنـت ، وَهـدے کِـہ اے دُئـیـں تَـیـاراَنـت مَـن جَـزم اوں کـہ مـارا پَـہ وَتـی مِـنـزِل ءِ آسَـرءَ رَسـیـن اَنـت ، مَـن چـہ وَتـی لـوگءَ دَرکـپـت اوں ، زُمـسـتـانءِ سـارت ءُ تـهـارمـاهـیـں شَـپـے ات ، مـیـتَـگءِ مـهـلـوُک درُهـا واب اِت اَنـت ، آزمـانءَ جَـمّـر سـرءَاَت اَنـت ، گـوات سَـکّ کـشّـگءَ اَت ءُ جَـمّـرانءَ دَمـیـنَـگءَاَت ، درَچـکـانـی شـاه ءُ لَـمـب سُـرَگ اِت اَنـت ، مَـن پَـہ یَـکّ بَـزّگی یے اودا شُـت ءُ سَـر بـوُت اوں ، مـا بـرات ءُ گـُهـار درُهـا یَـکّ مـیـزے ءِ سَـرا نِـشـت ایـں ، هَـرچ کـسءَ زُبـانءِ بـارَوا وَتـی هَـیـال دَرشـاں کُـرت اَنـت ، لَـهـتـےءَ گـوَشـت سَـیَـدءِ رَهـبَـنـد رَد اِنـت ، لَـهـتـےءَ گـوَشـت (عـربـی) آب پَـرچـا اَوار نَـہ اَنـت لَـهتـےءَ گـوَشـت آب کَـمّ اَنـت ، لَـهـتـےءَ گـوَشـت آب بـازاَنـت ، لَـهـتـے ءَ گـوَشـت ... لَـهـتـےءَ گـوَشـت ... رَنـدا مَـن وَتـی دَسـتءِ نَــد ءَ چـاراِت ءُ مـیـزءِ سَـرءِ (قَـنـدیـل) اوں گـوَشـت ( قَـنـدیـل ) کَـمـبَـهـت تَـرا هِـچّ روک مـان نـیـسـت .
ادَبـی هـکـیـم
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #6 on: July 18, 2012, 09:49:12 PM »
.
راستی پہم لوٹ ایت
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تیاب دپءِ کارجاہ ءِ رہبنداَت ،کہ ہر جنک وتی چراغءِ دیما بہ نندایتءُ چرائیءِ رُژنءَ کار بہ کنت۔ یک غریبیں جنکےءَ پہ وتی چراغءَ تیل زورگءِ تاگت نیست اَت۔پمیشکا دراہیں جنکاں شؤرکتءُ گُشت کہ’’ تو چہ کارجاہءَ دراءُ برو‘‘
وہدے غریبیں جنک رہ گپتگ اَت، گڑاچراہاں جُست اِش کت
’’ منّاں، کہ من پہ وتی چراغءَ تیل زُرت نہ کناں ، بلئے مدام چہ شما پیسر کایان ءُ کارجاہءَ روپاںءُ تگرداں ہم پچ کناں، شمئے چراغانی رُژن چاریں دیواراں سک اَنت، گوں من بدنیّتی چیءَ کن ئے،من کہ چہ شمئے چراغاں شہمے رُژن زُوراں، شمارا کجام تاوان رسیت؟ دیمتر امن پہ کارجاہ ءُ پہ شما گیشتر کار کت کناں، منا پرچا، درکن ئے، منی بستارچہ بے ساہیں دیواراں نہ بیت؟ کہ شما رُژناہ کتگ اَنت،بلئے شمئے ہچ دردءِ دوا نہ اَنت‘‘
آہاں پہم اِت، کہ غریب راست گُشگ ءَ اِنت، پمیشکا چرائیءِ کارجاہءَ دراہگءَ پیسر ،دراہیں جنک دروازگءِ دپءَ اوشتات اَنت ءُ کارجاہءِ رہبند اِش پروشت۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چائینز کلاسکل لبزانک
نبشتہ: ھان فئی زی
اردو: رشید بٹ
بلوچی: شعیب شاداب
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #7 on: July 18, 2012, 09:50:45 PM »


 رژن ءَ کئے کشت کنت‘‘

زندگی یک وڑ ءَ نہ اوشتیت زندے سفر جاری اِنت تاں زندے جند آسر بہ بیت بلئے زندگاں ھما مردم کہ آھانی جند مرتگاں بلئے نام اِش تاں جھان است اِنت مان اَنت۔ مرچی بلوچستان ئے جاور حالاں اگان یکے بچاریت گڑا زانگ بیت کہ بلوچ راجے آجوئی جنزے قندیل ھر وڑا زوراوراں کشگ ئے جھد کتگ بلئے سوبین نہ بیتگاں ءُ منا امیت ایں کہ تاں گڑّ ءَ ھم بے سوب بنت۔ 1948 ءَ بگر تاں مرچی ءَ بلوچ راجی جیڑہ ئے گیش ءُ گیوار نبوتگ ءُ ناں کہ من چو میرو ئے لڑ ءَ گنداں امیت است کہ بلوچ راجی جیڑہ ئے گیش ءُ گیوار بہ بیت پرچی مارا وتی براتاں انچیں جاھی ءَ سر کتگ یا کہ آھاں بکوش یا کہ راجی جنز ءَ دیم ءَ بر بلئے اگاں آھاں کشے گڑا ھزاراں مزمت برداشت کنگی اِنت اگاں نہ کش ئے گڑا ترا ھزاراں سر ببا دیگی اِنت۔ من زاناں منی اے گپاں لھتے مردم فضول سمج اَنت بلئے راستی ھما آدینکیں کہ ھر کسی عیباں چو روچ ءَ زاھر کنت۔
اھد ئے زوراور ءَ ھر چند جھد کتگ کہ آ بلوچ راجی جنز ءَ ایر جیگ بہ کنت بلئے بے سوب بیتگ بلئے مرچی آئی ءَ یک انچیں پندلے جوڈ کتگ ما آ پندلے تھا کپانیں بلئے ما نزانیں کہ ما وتا چوں بہ گیشین ایں گپ بکنے گڑا گش اَنت کہ پلانی پروپیکنڈہ کنگ اِنت۔ پلانی ءَ زھر کئیت۔
بلوچ راجی جنزے دیم ءَ ھر وڑیں کنڈگ اتکگ بلئے بلوچ ءَ پہ تمردی اے کنڈگ گوازینتگاں ھزاراں سرانی قربانی داتگ ءُ ھزاراں گم ءُ رنج گوازینتگ مرچی ھم اے راجے تمردیاَنت مات وتی چکاں ھمے سکین ءَ دینت کہ منی بچی اگاں تو مرگ لوٹے گڑا پہ بلوچستان ئے ھاترا بہ مر کہ منی سر برزاد بیت۔ چک کہ گپ زانت مات آئی ءَ بلوچ راجی سوت ءَ گشیت گوں۔ وھدے بادشاہ ءَ وھدے بالاچ شھید کُت گڑا ھمے پھم اِت کہ بلوچ راجی جنز آئی ءَ ایر جیگ کُت بلئے آئی ءَ اے گپ نزانت کہ بالاچ یک فرد ئے نہ اِنت بلکیں بالاچ یک جنزے نام اِنت ءُ جنز پہ کشگ ایر جیگ نہ بیت۔ وھدے کشت ءُ کوش ءَ چہ بے سوب بیت گڑا آئی ءَ پہ بلوچ راجی جنزے ایر جیگ کنگ ءَ وڑ وڑیں پندل کارمرز کُت بلئے آئی ئے دستاں تنیگ ءَ بلوچ راجی جنز دارگ ءُ ایر جیگ کنگ نہ بیتگ۔
اے رژن آجوئی ئے رژنائی اِنت اے رژن ءَ ھچ گوات کشت نہ کنت ءُ ناں کہ رژن ایر جیگ کنگ بیت بلکیں اے رژن ئے رژنائی دور روان کنت تاں وتی مسافر ءَ منزل ءَ سر کنت۔ راست گشتگ شاعر ءَ
‘‘ رژن ءَ کئے کشت کنت‘‘

مجیب ولی۔۔۔ مند
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #8 on: July 18, 2012, 09:56:48 PM »
لیاقت امین
آزمانک
ھیال رژن ءِ منّت ءَ

ۂۂۂۂۂۂۂۂۂۂۂۂ
اُمر ءِ کسّہ کنوک تھنائ ءِ موجیں زھیراں گوں چیر ءُُ سر بنت۔چولانی زیمریں نل کہ ابیتکی ءِ دامن ءَ ارسانی پُلاں زیبدار کنت۔تہ وھد ءِ نہ کٹوکیں سپر اُوشتیت۔زیبائ جمّرانی برپیں ساھگ ءَ وت واجھی ءِ جار ءَ پرینیت داں امروز ءِ باتن ءَورنائ ءِنوبت گپتار ءِ نہ وشیں ساھتانی میار جلّی ءَ نہ منّیت تہ چراگ مریت۔
چراگ ءِ کشوک شپ ءِ نسیب ءَ را تھاری ءِ ساھیں چادرے سرا دنت۔
بلے استالانی برھنگی ءِ چاردھی ماہ دیدگانی رژنءِ شررنگی ءَ چہ باج نہ بارت تہ
واتر کنگ پہ موسمی بالوھاں بے تالھی ءِ زنگ جوڑ بیت۔
ۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂۂ
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #9 on: July 19, 2012, 09:52:38 AM »
آزمانک
چراگ اندیم نہ بیت۔
زاہدہ رئیس راجی


شاھداد ءَ گوں وتی  لرزتگیں دست پاداں چہ وتی جاہ ءَ چست بئیگ ءِ سہمی رند ءَ جہد کُت بلے  اے رندی ھم پیشگی وڑا سوب مند نہ بؤت ءُ پدا وتی نشتگیں جاہ ءَ ایر نیشت بلے اے رندی  مُگن ءَ انچیں دردے چست بیت کہ دلی آپ بؤت ءُ دل ءَ نوں یک رندے پدا چست بئیگ ءِ ھمت ءَ ھم وتا یکپاریگ ءَ جہل دؤر دات۔

چہ وتی اے بے وسی ءَ  چمّی  ارساں گُل گُل بیتاں۔ نوں پیشی رنگ ءَ ارسانی ھیر برگ ءِ جہد  ھم سوب مند نہ بئیگ ءَ ات  پمشکا دردءِ جمبراں یکپاریگ ءَ گوارگے زُرت ءُ ارسانی ترونگل ترند ترند ءَ چہ چماں ایر ریچان  ، اسپیتیں ریشاں تر کنان ءُ اسپیتیں پشک ءِ دامن ءَ مچلینگ ءَ تنت۔

 
گوںبے تاھیریں ارواہ ءَ اشی ءَ ارسیگیں چم وتی پیریں ءُ نزوریں وجودءِ سرا سک دات انت۔ ۔ ۔ ۔انچوش چمے کرچکیں دستانی لرزگ ءِ سر ءَ کپتاں وتی سرا وت بزگ ئ وارت ءُ گوں دردیں دلءَ وتی پیری ءَ ڈوبارگ ءَ لگئیت۔
”او۔ھو۔۔۔
 وائے پیری ۔۔ ۔  وائے پیری۔ ۔ ۔  مہ  بُوتین ئے تؤ۔ ۔ ۔ ۔

 تئ آھگ ءَ من ءَ اے جاہ ءَ سر کُتگ کہ وتی جند ءِ بار ءَ ھم  نوں زُرت  نہ کناں ۔ ۔ ۔ھو۔۔۔
 وائے بگبھتی( گن سارتے کشگ ءَ رند)۔ ۔ ۔ نوں اے دستاں انچو ھم زیکت مان نیست اِنت کہ پہ وتا گلاسے آپ چہ جگ ءَ ایر ریتک ءُ وارت بہ کناں ۔ ۔ ۔ چوشیں زند ۔ ۔ ۔  مہ دیستیناتوں ۔ ۔ ۔ مہ دیستیناتوں “


پدا چمّ ئ وتی  کشا ایریں میز(ٹیبل ) ءِ سرا کپت کہ آئ ءِ سرا بازیں بلوچی کہانیں لبزانکی دپتر ایراتنت۔ اے ھما کتاب اتنت کہ اشی ءَ وتی سرجمیں زند پہ ایشانی یکجا کنگ ءَ گوازینتگ ات۔  اے کتابانی توکا اشی ءِ زند ءِ ھمک ساھت ءُ دمان، واھگ، مارشت، جہد ءُ پہ اے جہداں مزنیں زھمت کشی ءِ کلیں داستان نبشتہ ءَ اتنت بلے ایشانی بلوچی ھمنچو گران ات کہ  بید چہ اشی ءِ جند ءُ اشی ءَ ھمبلانی دگہ کس چہ ایشاں سرپد نہ یت۔

 ھما روچاں کہ اشی ءِ جان ءِ تہا زیکت مان ات اشی ءَ دل ءَ مھکمیں ارادہ کُتگ ات کہ اے دپتراں وتی سرگوستے رنگ ءَ سُبکیں راھبندے توکا دیما بیارایت تاں نوک باھند بلوچی ءِ میراث ءَ سرپد بہ بنت ءُ ھما جہدے کہ اشی ءَ بندات کُتگ پہ زبان ءِ دیمروئ ءَ آ ئ ءَ نوکیں نسل ءَ سرجمی ءَ دات بہ کنت ۔

  بلے نوں کہ چمانی روژنائ ھم اندیم ترگ ءَ ات ءُ نزوریں جان ءَ زیکت ھم روچ پہ روچ  کم تران ات اشی ءَ اے کارتہنا کنگ  سک گران کپگ ءَ ات۔
 
وتی چپ ءُ چاگردءَ چمی شانک دات انت بلے چوشیں دوزواھے پہ وتا دیستی نہ کُت کہ گوں اشی ءَ بہ نندایت کتاباں بوان ایت ءُ اے  گوش داران بہ کنت ءُ  پدا اے وتی سرگوست ءَ وانوکے دیم ءَ گوشان بہ کنت ءُ آ مردم ھمیں رنگ ءَ ایشاں نبشتہ بہ کنت۔


 چیزے ماہ پیسر کہ لکوہ (پلج ) ءَ بردست ءِ سرا اسر نہ کتگ ات بے کسی مھتاجی ءَ اے درستیں کارئ وت کُتگ اتنت بلے نوں اے دست انچو زُؤر ءَ نہ سگگ ءَ ات ۔


 مروچی باز روچ ءَ رند دل ءَ پدا  وتی سرگوست نبشتہ کنگ ءِ ھُب ءُ واھگ چِست بیتگ ات بلے کش گورا پہ کمک ءَ کسے نیست ات۔ 


گونڈیں نماسگاں پگائ وتی مات ءِ گُشگ ءِ سرا اشی ءِ  شام پگائ یارتگ داتگ ات ۔

ایشانی مات بزاں مستریں نشارمروچی وتی کستریں گہار ءِ سُور ءَ شوتگ ات پمشکا اے چُکاں شام یک کرے ءَ دْور دات انتءُ پہ ٹی وی چارگ ءَ دوئمی کوٹی ءَ شوتگ اتنت۔

  وتی جند ءِ چاریں بچّانی گورا وَ پہ دمانے ھم گوں پت ءَ گپ جنگ ءِ وھد نیست ات کہ درستیں وتی کارمداراں دزگٹ اتنت پمشکا چہ آھاں  اشی ءِ دل ءَ ھچ اُمیت نیست ات۔ 

گوں ملوریں ھیالاں شھداد ءَ وتی س  پُشت ءَ کنزاینت ءُ تھت ءَ گوں ڈک داتگیں سرجا ءَ ڈک دات ءُ چمی چُپت کُت انت۔ ھمیں دمان ءَ لئین شوت انت ءُ چمے کوسانی پُشت ءَ آیوکیں رُژنائ ءَ تہاری ءِ سیائیں چادر مان پوش ات۔
اے تہاری ءُ تہنائ ءَ گوستگیں روچانی زہیراں جاہ جت۔ چونائ ءَ ایوکائ ءَ ھمیں گوستگیں شریں روچانی یات اتنت کہ اشی ءِ ساھگ ءُ  دوزواہ اتنت کہ پہ دمانے ھم اشی  تہنا یل نہ داتگ۔


یک شریں ساھتے ءَ تہاریں کوٹی ءَ گوں وتا وت جیڑگ ءَ دلگوش بیت کہ اناگہہ چہ یک کرّے ءَ رُژن ءِ برانزے چست بُوت۔ اشی ءَ وتی چم پچ کُت انت ءُ ھما نیمگ ءَ سک دات انت۔
کم کم ءَ اے روژنائ نزیک آھان بوت ۔ شھداد ءَ وتی چم نوں پراہ تر کُت انت تاں بچارایت اے روژنائ چہ کجا پیداک انت۔
 اے روژنائ ءِ گوناں مردمی  پادانی برمش ءُ توار ھم آھگ ءَ ات۔ کم کم ءَ اے پادانی برمش گیش بوان بوت ءُ  مردمے ساھگ کوٹی ءِ توکا پُترت ءُ اشی ءِ دیما اُشتات۔ 
ساھگ ءِ دیما چراگ ءِ روژنائ ءَ اشی ءِ چم کمے تہار کُت انت  ءُ اشی ءَ وتی دست چمانی سرا ایر کُت انت
 ”واجو ابّا۔۔۔ “ اے توار ءِ گوناں شھداد ء چم روژناہ بیت انت۔ دل ءَ گل یے چِت۔
  ”اے وَ منی جیہند ءِ توار انت؟ “ گوں وتا بُرزیں توارءَ تران کنگ ءَ لگئیت۔

” ھؤ واجو ابّا! مناں تئ جیہند۔۔ ۔ ۔
 ایوک ءَ پہ تئیگی واتر کُتگوں۔ ۔ ۔
  چونئے تؤ “ جیہند شھداد ءِ کش ءَ نشت ءُ شھدادئ بگل کُت ءُ وتی دستی گوانکوی  میز ءِ سرا ایر کُت ایت ءُ شھداد ءِ گوناں گپ گپ ءَ چہ آئ ءِ  چمانی دیما ایریں نزری عینکی کش ات  ءُ گوں وتی دزمال ءَ  پاک ئ کُت ءُ پدا آئ ءِ پونز ءِ سرا چمانی نزیک ءَ ایر کُت ایت۔
نوں شھداد پہ شرّی جیہند ءَ گندگءَ ات۔


من وشاں منی چُک ۔۔۔ سک زہیریگ بیتگاں پہ تئیگی ۔ ۔ ۔ کجا شُتگئے تو؟ پرچیا وتی پیریں واجو ابّا تہنائ ءِ کبر ءَ دْور داتگئے “ 
 شھداد ءَانچوش وتی لرزیتگیں دست جیہند ءِ دیم ءِ سرا برگ ءِ جہد کُت جیہند ءَ آئ ءِ دست گپت انت ءُ چُک اتنت۔
 شھداد ءَ وتی ھشکیں لنٹ  گوں لبزاں تر کنان کُت ۔ جیہند ءَ چہ میز ءِ سرا ایریں جگ ءَ گلاس ءِ توکا آپ ایر ریتک ءُ شھداد ءِ  لُنٹانی کرا پہ دپا دئیگ ءَ ایر کُت
شھداد سک تُنیگ ات پمشکا یک شیک ءَ پُریں گلاسے ایر بُرت۔
۔شھداد ءِ ارس پدا شلان ات انت۔  اے لوگ ءَ یکیں دردوار جیہند ات کہ چہ پت ءَ جنگ کنگ ءَ رند زاہر گپتگ شُوتگ ات۔ جیہند شھداد ءِ دوستگیں نماسگ ات۔
واجواباّ! مں نوں ھمیدایاں۔ ۔ ۔  تئ کرّا۔۔۔  تو پرچیا گریوگائے؟ ؟ ؟ “ جیہند ءَ گوں دل پہ درد شھداد بگل کُت ءُ ارسی پاک کُت انت۔
منی چُک ۔ ۔ ۔ تئ واجو ءَ نوں پیری ءِ وھیل ءَ گپتگ۔ ۔ ۔  مرگ الم  انت۔ ۔ چہ مرگ ءَ نہ ترسیت ۔باریں چُنت روچ دگہ  پش کپتگاں۔ ۔ ۔
  زند ءِ چراگ روچے نہ روچے مرایت بلے تئ  واجو وتی جہد ءِ مرگ ءَ ھجبر نہ لوٹیت “ شھداد ءَ چم وتی کتاب ءُ ڈائری ءِ نیمگ ءَ سک دات انت ءُ گوں دل ءِ درد ءَ پسو دات
جیہند ءَ شھداد ءِ ڈائری چست کُت ءُ وتی دست ءَ زُرت۔

”تاں جہان است تؤ است باتئے، منی اباجان ۔ ۔ ۔ تئ اے بچ تئ اے جہد ءِ قندیل ءَ پہ مرگ ءَ نئیلیت۔ تؤ دلجم بیبو ۔ ۔ ۔ “
 جیہند ءَ وتی پیروک ءِ پیشانُگ چُک ات ءُ شھداد ءَ بچکندے جت۔
ھلاس
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline sheh.mureed

  • Balochi Zaantkaar
  • ***
  • Posts: 31
  • Karma: 6
Re: اکس چے گوشیت؟
« Reply #10 on: July 19, 2012, 10:23:28 AM »
Tapok bichar cha deer ruznee zaherent ? topokee mata BB azginda draent, ho aman ruznee gindan balee nazanan kaent? Tapok jan man ham nazanan balee umeetent ke juhdkaree bet , ee wahde e eda kaee bet kant , tapok e  matee apuseen gokee garat o pa gokee shohaz jangla shutagat.

Aman agan juhd karee gora e whadee eda chee kant , BB azginda balahin kandag jat , tapok man goshtag  tow hoshmandee chokee  ee?  chiya aman man zana che kut ? tapok bahao  bakad et,

mano  tow pa gokee shohaza ee shape e tahara sargardanen , ??????

Juhd kar wati zoor burtageen gul zameen o reji pajaar o nango  namoosaee  rakenagee shohazaent,

o to goshe kee juhd kar eda che kant pada BB azginda  KKKKKKKKKKKKKKKKKKKKKKKKKK
dege kandage jat,

Tapok e dap hamat >>>>>

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #11 on: July 19, 2012, 10:35:05 AM »
Zahid Zohair Alrais

 ‎%.. مـِر مـِراكيں قنديل ..%
{..زاهدكريم..}

" يك نيمروچ ے! من كورءَ كهيرءِ ساهگءَ نشتگ اِتاں، اناگتءَ مئے پيريں مات منى ديمءَ اتك، دست ءُ پاد گوںزمزيلاںبستگ اِتنت گريوگءَ أت.
من گوں هيرانىءَ جُست کُت،، منى مات!تو چو؟،،،،،، گُشتے ،،من وتى چکـّانى هاترىپرے هالءَ أنت، چنت سال إنت كه من اے زمزيلانى تئيلءَ بستگ أنت، اگاں مرچى منى چک يكجا ءُ تپاك بوتين أنت گڑا من ديرى چه اے زمزيلانى تئيلاں آزات إتنت، چکـّانى ناتپاكىءَ مناںپرشت ءُ پروش كتگ، كاينت چه دورءَ ندارگ كن أنت ءُ روأنت، من په ﭑميت ے چکـّانى نيمگءَ چاراں كه بلكيں بيا انت ءُ مناںچه اے زمزيلانى تئيلءَ آزات بكن أنت، چم أرسيگ أنت، بازيں توارءَ نـُك هـُشك إنت،،،،،،،، گـُشے منى توار آهانى گوشاں سر بيهگءَ نه إنت، گـُشے آ مناں گندگءَ نه أنت،،،،،، بلے من نه ﭑميت نه أنت، سَدّك أنت! كه دور اے مـِر مـِراكيں قنديلانى رُژنءِ بركتءَ دلءِ كاشيں کُڈكءِ تهارياں رُژن ے ألّم ودى بيت، سد سلام بات منى هما دوئيں زهگاں كه وشـّيانى كانيگءَ آپ ورگ إش يل داتگ! ءُ گوں شيرى گُرّگاں په منى آزاتىءِ جهدءَ أنت.
من نه ﭑميت نه أنت،
من نه ﭑميت نه أنت،،،،،،،،،،،. آ گيشتر همے گپـّءَ كنگءَ أت كه ،، من نه ﭑميت نه أنت،،،،،،، من نه ﭑميت نه أنت،،،،،، شرمندگىءَ منى سر جهل أت،،،،،،دمان ئےرند پدا ماتءِ توار منىگوشاں كپت،،،،،، مناں گـُشتے،،،،،، منىچك! تو هرديں وتى براتانى هَدّءَ روے، آهاں بگش كه
( بيا إت! مئے مات مارا توارءَإنت )
گوں اےگپـَـّاں دمان ئےءِ هاموشىءَ رند! اے برى من وتى سر چـِست کُت! كه ماتءَ تسلّائے ديان، بلے! من اے ديم ءُ آ ديمءَ چارإت! تاگـِنداں هيال گارإنت.
ماتءِ اے گپـّاں دل چو تيرءَ سـُمبـِت، دل آس ءُ أنگرانى توكءَ سـُتك،،! ءُ من ديم په كوهءَ جهلاد بيتـّاں."
••••••••••••••••••••••••••••••••••
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #12 on: July 19, 2012, 11:49:45 AM »

عندلیب گچکی/تمپ:
روتاک آساپ،،2006نومبر
22
روچ ء کۓ کشت کنت:
ارزبند ء وھد ات، من وھدے وھد بند چارات تہ شش ء نیم ات .من ذوت ذوت ریڈیو زرت بی بی سی ء گوشدارگ ء لگتوں تہ منی گوشاں باور نہ کنوکیں ھالے کپت کہ اکبر خان بگٹی گوں وتی ھمراہاں یک غارے ء_ تہا شہید کنگ بوتگ.
اکبر بگٹی جنگ بوت ؟ منا گشے باور نہ بوت. بلے دیر گوست کہ منا باور بوت نوں منی چماں چہ آرس شیپ گراں بوتاں ء دل گشے اے گم ء ترک ات.
سہ سردار . . .یکے و جنگ بوت نوں آ دوئنانی ھال چے بیت؟
آ کہ بلوچانی توک ء یک کوھے ء بستار ء ات کہ چہ آھی ء بیم ء مشرف اسلام آباد ء لرزات.بلے اے کہ وھدے زالماں پروش دات گڑا آ دوئنانی ھال چے بیت؟
روچ ھمیش ات کہ ذالمیں حکمراناں دیست کہ بلوچ پسگ شہید ء ھوناں چتور آگہہ کتاں. .
دراھیں بلوچستان ء یک آسے روک بوت جنگ ء پروشگ بندات بوت . کس کسی بہ ات ھر یکے گشے وتی جند ء بے سما ات. ھر کسی دپ ء ھمے گپ ات کہ مے پیرک دژمناں شہید کت.
اگاں یک مستریں کماشے ء ایشاں سرپدی دات کہ چش مہ کن ات گڈا ایشاں ھمے پسو دات کہ مے پیرک جنگ بوتگ ما چتور پہ آرامی وتی لوگاں بہ نندیں؟.
دومی روچ ء تمپ ء بی ایس او گرلز ونگ ء ہڑتال بوت . من اوں سر بوتوں اودا منی چماں بیدے آس ء دگہ ھچی نہ دیست .
ھر نیمگا یک اسے روک ات. .بلے آ آس کہ مردمانی دل ء روک ات آ آس ء برانز چہ اے آس ء گیشتر ات.
من چہ اے کسانیں ذھگاں حیران اتاں گشے ایشانی گم چہ مسترینانی ء گیشتر ات.
من ھیال ء لگتوں کہ اے ھمے گونڈو انت کہ باندا روچ مزن بنت ء وتی برات دودا ء بیر ء گرانت.
من ذاناں کہ نوں مے بلوچ چہ واب ء آگہہ انت .
نوں مے دژمن سوب مند نہ بنت.
حکمراناں ھر وھد ء گشتگ سہ سر دار. . .بزاں سہ کنٹگ ایانی راہ ء سر ء ایر بوتگ. .بلے ھدا ء گرگ ھمے کنٹگ ایانی وتی دست ء لگتگ نوں ایانی دست ھون ریچ انت. . .
آکبر بگٹی و شہہد بوت بلے یک آجوھی ء جنزے کہ آہی ء چست
کتگ اے جنز ء کس داشت نہ کنت. .بقول ء کسے:مردم مر انت بلے جنزاں مرگ پر نیست. آ چہ وتی منزل ء سر بوھگ ء ساری نہ مرایت. . .
دژمن ء ھر وھد ء کوشست ھمیش انت کہ راج ء سروکاں گار بہ کنت. .پرچا کہ یک راجے ء- سروک ء راھشون مہ بیت گڑا آ راج وتی منزل ء سر بوت نہ کنت .
اے مردماں کہ شہید ء ملت ء گماں ء چہ وتی دل ء سوک ء ہڑتال کتگ ات کہ لہتیں دفتر ایش سوتگ ات کہ منی ھیال ء چر ایشاں حکومت ء ھچ تاوان اوں نہ رست بلے زالماں ھمے دراھ بند کتاں. . ء وتی جیل چہ گونڈو ء پیرمرداں چہ پر کت ء باذینے ایشانی ٹارچر سیلانی چیر ء انت.
نومبر16
ء مشرف بلوچستان ء دور ء اتک . . .کجام مشرف؟
ھمے کہ بلوچانی پیروکی شہید کت. . .
بلے صدر ء گپاں گوش دار ات کہ چے گوشیت . .
من شمے بلوچانی ھیر لوٹوک انت . .من لوٹاں شما دیمروہی بکنت. . .شما من ء و وٹ بدئیت من کہ سوبین باں گڑا بیست ء پنچ سال ء رند شما پنجاب ء دیم پہ دیمی ء کت کنے. .
شما پر چا غلام ات؟
واجہ اے گشگ لوٹیت کہ شما سر دارانی غلام ات. . .
او ما غلام انت بلے سر دارانی اناں . .
واجہ ھدا گشیت کہ چہ من بترس ات منی بندگی ء بہ کن ات گڑا من شمارا سوبین کنان جنت پہ شما تیار انت آگں ناں جہنم پہ شمے واستہ تیار انت. .
مشرف اوں گشیت کہ چہ من بترس ات. .مشرف ھمے سرمچاراں کہ کو ھان انت گشیت. . .
مناں چہ من و اسلام آباد ء عیش کنگاوں. .
مشرف اے گپ ء نہ جنت کہ اے پرچا کو ھاں شتگ انت بلکن انگت ایشاں چیلنج کنت. . .
آ گشیت کہ پاکستان استیں گڈا بلوچستان استیں. . .اے گپ ء بیحال انت کہ آ وھدی کہ پاکستان ء واب کس ء نہ دیستگ بلے بلوچستان بوتگ. . . .
ء مشرف ء ھم دیوان دراہ کپتگیناں. .چیا کہ اے پہ نان ء واستہ مرگ ء انت ء راستے نامرد پہ نان ء مرایت ء مرد پہ نام ء. .
مرچی مشرف ء کاسگ چٹ اے گپ ء وش مہ بنت کہ نواب آکبر شہد بوت گڑا ایشان جواب دئیوک نہ بیت. . .
بلکن نواب ء جوڈ کتگین جنز رژنا ء ذندگ انت دراھیں دنیا ء وتی رژنا تالان کنگ ء انت. . .اے جنز روچ ء روژن ء وڈا انت ایشی ء کس کشت نہ کنت. . انچو کہ روچ ء کس کشت نہ کنت
ھلاس. .‬
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #13 on: July 19, 2012, 07:30:06 PM »

،،،،،،،،درد بہشت،،،،

سفر احسان

شپ سک تہار ات ۔گوات ات تُوپان ات۔ من تہناہ اِتاں جیڑگ ءَ اِتاں۔ ائے تہاری چون ھلاس بیت؟
من چون چہ ائے زندان ءَ در کایاں؟منی جیڑگ روان ات کہ اناگہ من دیست روژناہی ئے زاہریں۔ روژناہی گیش بُوہان بُوت ۔منی نیمگہ آیان بُوت ۔ واہ ءُ زار ات گریوگ ءَ زاری اَت۔ رُژناہی باز نزیک اتک ۔ تاں من چاراں آہی ءَ چراگ دستا اِنت ۔ من جُست کُت ائے تُوپان تو گس ءَ در اتکگے گوں چراگ ءَ کُجا روئے تئ لوگ تئ زھگ تئ مردُم چوناں کیا شوہاز ءَ اے ۔منا جوابے دات منی لوگ منی زھگ منی دُرست منی ھنکین انت من چراگ دستہ کُتگ دانکہ چراگے دربگیجاں ۔ چراگ دیم ءَ روان بیت رُژناہی تالان بیان بیت ۔
منی جیڑگاں دگہ رنگے زُرت۔
چراگ تہناہ انت
کستاں شلی شگینتگ
ساہ کندن
ھانُل
چراگ ءَ پہریز
چم پچ بیتاں چاراں روچ در آیگہ انت او رُژن تالان انت۔


Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
Re: اکس چے گوشیت؟
« Reply #14 on: July 19, 2012, 07:33:21 PM »
آزمانک
;؛؛؛ رژن ریچ ؛؛؛
لیاقت امین

شپچریں زند ءِ ہمک پاس ءَ اِشکریں درد آلیٹ ور اَنت، گمان ءِ برمش وازمندگی ءِ کلکشان ءَہیاداری ءِ پوشاک ءَ گورا دنت،تہ تہاری پُلیت۔چو کہ امروز ءِ تمردیں دستاں گوات ءِ نیمون اوں پہمت نہ کت۔ گوات وتسریں ہیالے کہ دارگ نہ بیت، بلے زوراک انت، چوکہ ہیال ءِ زرواکی چم ءِ جَنگ ءَ چہ پیسر دنیا ہے تاراج کنت۔
بلے نازرکی ءِ مسال پہ بنی آدم ءَ اوستانی لہمیں شنزے، سبکیں سمین برمشے، چوکہ رنگانی دریا پہ چم ءِ ندارگ ءَ آسر نہ بیت ،راستی ہمیش انت کہ من ہاک ءِ کلات ءِ ساہگ ءَ روچ ءَ چیر بدیاں،بلے ہاک ءَ چہ روچ ءَ پہریزت نکناں۔ روچ وَ روچ اِنت۔روچ ءِ میلانکی سگّءِ سیمسراں پُروشیت،تہ موجیں دیار ءِ سر سندیں جمرانی ساہیل پُرشیت۔کانچ بادگیر کریاب بنت۔برمش ءِ بے برمشی ءَ انچیں گمے تالان بیت کہ داں ازل انسان ءَ روچ ءِ وت واجہی ءِ گلام جوڑ کنت۔۔،،،،،،
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line