عندلیب گچکی ء آذمانک (دو ذندگیں لاش) ندر پہ باسکاں

[Andalib-Gichki]

           (دو ذندگیں لاش)
  **ندر پہ کلیں شھیدانی پت ء ماتانی نام ء**
عندلیب ::

اللہ اکبر  اللہ اکبر . . . .چل ء ناذھاتون ء چاہ پر کتگ اتاں ء وت مسلہ ء سرا نشتگ ات تسبیح وانگ ء ات . . .

سمیر ء پت پاد ء نماذ انت . . .
محمد جکگ ء لگت . . .ھر روچ چہ بانگ ء باذ پیسر محمد پاد اتکگ تہجد ء نماذی ونتگ ء فجر ء_ نماذ ء مسجد ء شتگ . . .
بلے دوشی آ سک تپ ء گپتگ ات. . .
زمستانی شپ ء اوں اھی ء دراھیں اندام گشے اشکرانی سرا ایر ات . . . سجاھیں شپ اھی  ء پہ نارگ ء جکگ گوازینت. . .ھمے فجر ء وھد بوتگ ات کہ اھی ء چم پہ واب ء شتگ اتاں . . .
سمیر ء پت من پسیل ء گرمیں آپ ایر کتگ . . . .سمیر ء مات ء مسلہ ء سرا چہ توار جت . . .

سمیر ء نام ء اشکنگ ء گوں پیریں محمد ء دل ء گشے یکے ء تیرے سوپت . . . .
آ پدا جکگ ء لگت . . .
اے بری اھی ء دل ء چہ ھون پیداک ات . . . .
سھرسھریں توک . . . .
ناذھاتون . . . .ناذ . . . .آ جکگ ء موہ نہ دات . . . .

ناذھاتون ء تسبیح مسلہ ء سرا ایر کت ء تیزی ء گوں شت . . .

ترا گشاں اینچو ھیال مہ کن . . .

خدا ء مال بوتگ خدا ء برتگ . . .

محمد ء وتی دل ء سرا دست داشتگ ات . . .آھی ء سر ذمین ء روگ ء ات. . .

پیریں ذال وت ء داشت نہ کنگ ء ات بلے محمد ء ناکامیں سہارہ دئیگے کوشت ء ات. . .

محمد ء گوں لرذتگیں توارے ء گشت . . .
ناذھاتوں اللہ ء مال چہ ما اللہ ء برتیں من صبر کتگ ات . . .
بلے ناشریں ذور آواراں برت . . .
منی چکے سک تکلیف دات . . .
من . . . .اھی گال پرشتاں . . . .ناذھاتوں ء دست سست بوتاں . . .
آ پدا تحت ء سرا انچو نشت پورا کپت. . .

چل ء  چاہ  اتاں آ انچو لاڈ وراگااتاں کہ کتلی ء دپیگ گشے وتی دلبند ء چو شیعہانی پیم ء جنگ ء ات. . . .

ناذھاتون تحت ء دیم ء نشت دوئیں دستی وتی سرا کتاں . . .
ناذھاتوں . . . .محمد ء آواذ گشے کورچاتے ء پیداک ات . . . .
ناذھاتوں ھسکارگ ء ات . . .
آھی ء محمد ء توار ء پسو دات نہ کت . . .
ناذھاتون مرچی گشنت ائید ء روچ انت . . .
 
برو منی سالونک ء پچاں بیار . . . .
برو بیارے من وتی پر آسیں دل ء داراں. . .
برو بیارے من وتی ستکگیں چمانی داراں . . .

اااف کہ پہ گم کسے مرتیں یعقوب پہ یوسف ء مرت. . .

یعقوب ء بچ ء دژمن اوں یعقوب ء وتی بچ اتاں . . .
منی سمیر ء دژمنی . . .منی بچ ء مخبری . . . .اے اوں بلوچ اتاں . . .

بزاں منی ھون . . .منی بچ . . .
او منی جندے بچاں اے تیر منی دل ء جت. . . .

جکگ پدا ذوران ات . . .محمد ءدپ دست شود ا سک ات. . .
اھی دل ء چہ ڈنک ذنکیں ھون دراھگ ء ات . . .
ناذھاتون دلترک بوت آ گوں تستگیں پاداں ذوت ذوت درواذگ ء دپ ء شت . . .
اسلم ء اسلم. . . .برو داکتر ء بیار . . .اسلم. . .
اسلم ایشانی ھمساھگ چک ات ء سمیر ء سنگتے ات. . .

محمد ء جکگ ء توار ء ناذھاتون پدا بان ء پترت . . . .
محمد  باذیںجکگاں چے بے جان بوتگ ات . . .
اھی دست پاد سرد تر اتگ اتاں ء سبز سبز اتاں. . .
ھید اھی ء پیشانی ء پٹگ ء اتاں . . .
کتلی چاہ ھشک بوتگ اتاں ء آس اوں مرتگ ات. . .

میتگ ء ملا ء ائید ء نماذ ء تکبیر چست کتگ ات. . . .

گوں نوکیں پچ ء وش بوھاں کماش و ورناہ ء گونڈوھاں گوں بچکندگیں چماں وتی دست چست کتاں. . . .
 بلے میتگے یک کنڈے ء یک بانے استت کہ دو کماشانی ذندگیں لاش ایر اتاں. . .

(ھلاس)

[Naguman]

شَرّیں آزمانک یے۔

[چاہ اَنچو لہڑ ورگااتاں کہ کیتلیءِ دپیگ گشے وتی دلبندءَ چو شیعہانی پیم ءَ جنگا ات۔]


پہ پُرسءِ جاورءِ بیان کنگءَ زبردستیں گال رِدیے۔

یکءُ دو لَبز برابر کنگ لوٹنت چو کہ مسجدءَ بلوچیءَ مَسِیت گشنت۔

[Andalib-Gichki]

منت وار  انت واجہ ناگمان شمے