دستونک
وشی ءَ درد ءِ تام ھمبراہ انت
مرگ زند ءِ مدام ھمبراہ انت
راستی ءِ جہد تاں نہ بیت آسر
شرّی ءَ سلّیں نام ھمبراہ انت
”نیست“ پہ” است“ ءِ راہ ءَ دلمانگ
استی ءَ نیست ءِ گام ھمبراہ انت
ھُشک برشکہ سمانہ کت ھجبر
کئے سبارگ تاں شام ھمبراہ انت
اے چتوریں ھلارے کسہ جنت
ھر دپارءَ ھرام ھمبراہ اِنت
عشق ھاک ءِ، گْوشیت اول گام ءَ
مہرءَ درد ء رگام ھمبراہ انت
پرشتگ اَت کاروان امروزءِ
چُنڈ چُنڈا توام ھمبراہ انت
رُژن تُستگ بچار روزردءَ
شپ وَ پیشی سلام ھمبراہ انت
بل دمانے مساپریں گوں تؤ
راجی کرن ءِ کجام ھمبراہ انت؟
زاہدہ رئیس راجی