sambaheet gulzameen aazmaney wara

[hafiz_aaskani1]

نوکیں پربندے باسکانی چمشانکءِ دورایگ

[Zahida Raees Raji]

برات اشی ءَ بلوچی یونیکوڈ ءَ ھم ٹائپ بہ کنت تاں تچکیں چمشانک ءِ دئیگ بیبیت۔

[hafiz_aaskani1]

در  کپیت   چہ  گس ءَ   ماہکان  ءِ     وڑا
سمبہیت      گلزمین      آزمان  ءِ      وڑا

درْوہ   اِتگ   ساہ ءَ    بوجے   زمین ءِ  سرا
مائیں    بے    تو    ہما  برپیں  جان ءِ  وڑا

راز     زندءِ    منا     وت    اشارہ   دینت
تئی     نگاہ ءِ    تہہ ء ِ   داستان   ءِ    وڑا

پمّا    دز   راہاں    ڈولے   وتا    سمبہینت
وت  نہ  لوٹ  اِت  بہ بئیں  اے  جہان ءِ وڑا

مانپتاتگ    غم  ءِ     تئی    کلات ءَ    منا
چو     بلوچیں    جنین  ءِ     گشان ءِ    وڑا

وشیانی       بہار   گاہ    بات   اَنت   مدام
دل    مہ   باتیں   تئی     زامران ءِ    وڑا

مارا جندئے  ہوں پر وت  نہ  زوراَنت  عطا
مائیں     مرچاں    بلوچی    زبان  ءِ    وڑا

[Zahida Raees Raji]

سلامت باتئے برات
تئ اے پربندءَ من ءَ وتی شائری ءِ اولی روچانی ترانگ ءَ دْور دات۔
مہ بات زندگی مئے شگان ءِ وڑ

من نزاناں کہ چہ من ءَ پیسر بلکیں کسے ءَ اے زمین ءِ سرا نبشتہ کُتگ ءُ منی چم نہ کپتگ
ھیر تئ دستونک ءِ سرا منی تچکیں چمشانک اِش انت۔

در  کپیت   چہ  گس ءَ   ماہکان  ءِ     وڑا
سمبہیت      گلزمین      آزمان  ءِ      وڑا

برات گلزمین ءِ گال پہ وتن، ءُ ملک ءَ کارمرز بیتیں ۔ شائر وتی ماتیں وتن ءَ وتی  دوست ءِِ نام ءَ تشبہیہ دئینت۔
 سمبھیت گلزمین آزمان ءِ وڑا ۔ اے شریں ترکیب انت  ءُ  چہ ادءَ ھمیں پدر انت کہ تؤ وتی ماتیں وتن ءِ  ِ کسہ ءَ کنگ ءَ ئےءُ ھما تئ دوست انت۔
 اگاں اے گپ راست انت گُڑا درکپیت چہ گس ءَ ماھکان ءِ وڑا چون بیت کنت؟
گلزمین چے وڑا درکپت کنت؟



درْوہ   اِتگ   ساہ ءَ    بوجے   زمین ءِ  سرا
مائیں    بے    تو    ہما  برپیں  جان ءِ  وڑا

برات اد ءَ ” بوجے “ پہ چے کارمرز بئگائیں؟
بوج بزاں بار اگاں نہ بوج بزاں بُوجگ ۔ پچ کنگ؟
اگاں اولی تھر من ءَ سرپد کنگ بیبیت شئر شرتر پہمگ بیت کنت۔


راز     زندءِ    منا     وت    اشارہ   دینت
تئی     نگاہ ءِ    تہہ ء ِ   داستان   ءِ    وڑا

وشیں ھیال انت بلے اے دگہ گپ انت کہ اد ءَ جُستے پاد کئیت کہ کجام راز ترا زند ءِ اشارہ دئینت ءُ آ تئ دوست ءِ نگاہ ءِ تہہ ءِ داستان ءِ وڑا انت؟؟؟

پمّا    دز   راہاں    ڈولے   وتا    سمبہینت
وت  نہ  لوٹ  اِت  بہ بئیں  اے  جہان ءِ وڑا


اے دوتھرانی ربط سر پر نہ بیت


مانپتاتگ    غم  ءِ     تئی    کلات ءَ    منا
چو     بلوچیں    جنین  ءِ     گشان ءِ    وڑا

شریں ھیال انت


وشیانی       بہار   گاہ    بات   اَنت   مدام
دل    مہ   باتیں   تئی     زامران ءِ    وڑا

زاناں زامران بے بہاریں جاہ انت؟ اگاں ناں تؤ ادءَ وتی جند ءَِ گُشگائے؟ شئر جوان انت


مارا جندئے  ہوں پر وت  نہ  زوراَنت  عطا
مائیں     مرچاں    بلوچی    زبان  ءِ    وڑا

برات آگاں بلوچی زبان بلوچاں مہ زُرتیں گُڑا انچوکا وَ سر نہ بؤتگہ
تئ ھیال جوان انت۔

تئ سرجمیں دستونک ءِ توکا من اے مارگایاں کہ تؤ کمے بلوچی راھبند ءَ اڑیتگئے۔
کتابے = یک کتاب
نگنے = یک نگن
لوگے = یک لوگ
کنئے = تؤ کنئے
بہ دئے = تؤ بہ دئے
گوشئے = تو گُشئے
سارئے = تؤ سارئے

وت  نہ  لوٹ  اِت  بہ بئیں  اے  جہان ءِ وڑ
اے تھر بائد اے رنگ ءَ نبشتہ کنگ بیبیت ۔ اگاں دیم ءِ مردم ” آئ “ انت گڑا
 وت نہ لوٹ اِت بہ بئے اے جہان ءِ وڑا

اگاں تؤ وتارا اوور کنگ گوشگائے گُڑا اے رنگ ءَ بیتیں
وت نہ لوٹیں بہ بئیں اے جہان ءِ وڑا

اگاں ایوکا پہ وتا گُشگ لوٹئے گُڑا چُش
وت نہ لوٹاں بہ باں اے جہان ءِ وڑا

اگاں منی اے سر ءُ سوجانی توکا من جاھے ردی کُتگ پہ گُشگ ءَ دپا ھچ دوست مہ دار
تئ پسو ءِ راھچار
تئ ادّا
زاہدہ رئیس راجی

[hafiz_aaskani1]

•   
سلامت باتئے برات
تئ اے پربندءَ من ءَ وتی شائری ءِ اولی روچانی ترانگ ءَ دْور دات۔
مہ بات زندگی مئے شگان ءِ وڑا

من نزاناں کہ چہ من ءَ پیسر بلکیں کسے ءَ اے زمین ءِ سرا نبشتہ کُتگ ءُ منی چم نہ کپتگ
ھیر تئ دستونک ءِ سرا منی تچکیں چمشانک اِش انت۔
گہار کلاں چہ پیش من  شمئے لک منتءَ گراں کہ شماچہ وتی گراں بہائیں وہدءَ پہ ما لہتے وہد زوال کتءُ مارا شرپدار کت،منی اے دستونکءِ بندات چہ شمئے دستونکءِوانگءَ رند بوتگ،آئی بحرءُ زمینءُ قافیہ مناسک دوست بوت اَنت پمشکا من ہم قلم چست کتءُ ہمے قافیہ گچین کتءُنبشتہ بندات کت ،بلے  شمئے بحراَت،،فعولن  فعولن فعولن فعل۔ءُ من اے بحر گچین کت،فاعلن فاعلن فاعلن فاعلن ،بلے اے شعر سرجم نہ بوت پمشکءَ داں وہدےءَ انچو ایر بوت پدا من ہنو توام کنگءِ جہد ےکت

در  کپیت   چہ  گس ءَ   ماہکان  ءِ     وڑا
سمبہیت      گلزمین      آزمان  ءِ      وڑا

برات گلزمین ءِ گال پہ وتن، ءُ ملک ءَ کارمرز بیتیں ۔ شائر وتی ماتیں وتن ءَ وتی  دوست ءِِ نام ءَ تشبہیہ دئینت۔
 سمبھیت گلزمین آزمان ءِ وڑا ۔ اے شریں ترکیب انت  ءُ  چہ ادءَ ھمیں پدر انت کہ تؤ وتی ماتیں وتن ءِ  ِ کسہ ءَ کنگ ءَ ئےءُ ھما تئ دوست انت۔
 اگاں اے گپ راست انت گُڑا درکپیت چہ گس ءَ ماھکان ءِ وڑا چون بیت کنت؟
گلزمین چے وڑا درکپت کنت؟
منت وار  کہ اے چیز من نہ زانتگ پیسرءَ،اے شعر پیسرا من اے پئیم کتگ اَت کہ
در  کپیت   چہ  گس ءَ   ماہکان  ءِ     وڑا
سمبہیت اے زمین      آزمان  ءِ      وڑا
پدا رندءَ من ہمے ردیں رنگءَ نبشتہ کت کہ من اے گالءِ اصلی رنگءَبابلد بوتگاں ،بلے  خراب نہ بوت،پرچہ  کہ چیزے من نہ  زانتگ اَت نوں من زانت

درْوہ   اِتگ   ساہ ءَ    بوجے   زمین ءِ  سرا
مائیں    بے    تو    ہما  برپیں  جان ءِ  وڑا

برات اد ءَ ” بوجے “ پہ چے کارمرز بئگائیں؟
بوج بزاں بار اگاں نہ بوج بزاں بُوجگ ۔ پچ کنگ؟
اگاں اولی تھر من ءَ سرپد کنگ بیبیت شئر شرتر پہمگ بیت کنت۔
منی لوٹ اے بوتگ کہ ،ہنچوکہ ہماجان کہ آ ساہءَ دروہ اِتگ آ نوں بوجے(بارے) زمینءِ سرا،ما بے تو ہما پیمیں

راز     زندءِ    منا     وت    اشارہ   دینت
تئی     نگاہ ءِ    تہہ ء ِ   داستان   ءِ    وڑا

وشیں ھیال انت بلے اے دگہ گپ انت کہ اد ءَ جُستے پاد کئیت کہ کجام راز ترا زند ءِ اشارہ دئینت ءُ آ تئ دوست ءِ نگاہ ءِ تہہ ءِ داستان ءِ وڑا انت؟؟؟
من گشگ لوٹ اِتگ کہ زندءِ کلیں راز پہ من انچو پدّراَنت کہ تئی نگاہءِ تہہءِ داستان پہ من پدراَنت

پمّا    دز   راہاں    ڈولے   وتا    سمبہینت
وت  نہ  لوٹ  اِت  بہ بئیں  اے  جہان ءِ وڑا

اے دوتھرانی ربط سر پر نہ بیت
گشگ لوٹ اِت کہ دز راہ ماہم دیستگ اَنت بلے ما جہان ءِ مردمانی وڑا آیانی گچین کنگءَ اشتاپ نہ کتءُ آیلہ دات اَنت۔

مانپتاتگ    غم  ءِ     تئی    کلات ءَ    منا
چو     بلوچیں    جنین  ءِ     گشان ءِ    وڑا

شریں ھیال انت
(منت وار شمئے)

وشیانی       بہار   گاہ    بات   اَنت   مدام
دل    مہ   باتیں   تئی     زامران ءِ    وڑا

زاناں زامران بے بہاریں جاہ انت؟ اگاں ناں تؤ ادءَ وتی جند ءَِ گُشگائے؟ شئر جوان انت
زامرانءِ بہار آئی نندوک اِتنت،ءُ گیشتر کہ آیاں زامران ویل دات،اے پیما زامرانءِ بہار گاہ دائمی نہ بوت۔

مارا جندئے  ہوں پر وت  نہ  زوراَنت  عطا
مائیں     مرچاں    بلوچی    زبان  ءِ    وڑا

برات آگاں بلوچی زبان بلوچاں مہ زُرتیں گُڑا انچوکا وَ سر نہ بؤتگہ 
تئ ھیال جوان انت۔
اے ہبر دلیلے نہ ئے ،پرچہ کہ من  لہتےءِ ہبرءَ کنگایاں سرجمیں بلوچانی نہ،اگاں یکےءَ ماتءُ پت دوست داراَنتءُ آدگہ برات چہ آئی بیزاراَنت آ گشت کنت کہ جندئے ہوں منا پروت نہ زور اَنت،شاعرءُ زبان زانت بلوچی زبانءِ مات اَنت)

تئ سرجمیں دستونک ءِ توکا من اے مارگایاں کہ تؤ کمے بلوچی راھبند ءَ اڑیتگئے۔
کتابے = یک کتاب
نگنے = یک نگن
لوگے = یک لوگ
کنئے = تؤ کنئے
بہ دئے = تؤ بہ دئے
گوشئے = تو گُشئے
سارئے = تؤ سارئے

وت  نہ  لوٹ  اِت  بہ بئیں  اے  جہان ءِ وڑ
اے تھر بائد اے رنگ ءَ نبشتہ کنگ بیبیت ۔ اگاں دیم ءِ مردم ” آئ “ انت گڑا
 وت نہ لوٹ اِت بہ بئے اے جہان ءِ وڑا

اگاں تؤ وتارا اوور کنگ گوشگائے گُڑا اے رنگ ءَ بیتیں
وت نہ لوٹیں بہ بئیں اے جہان ءِ وڑا

اگاں ایوکا پہ وتا گُشگ لوٹئے گُڑا چُش
وت نہ لوٹاں بہ باں اے جہان ءِ وڑا
راستے کہ من بلوچی گالانی مزنیں بہرےءَ چہ زبہراں شوق اُن باز ہست بلے گوں وانگءَ ہنچو دزگٹاں کہ باز کم وہد رسیت،پمشکءَ من اناگتءَ گارباںءُ اناگتءَ کایاں ماں دیوانءَ پہ سکگءَ،بلے گالانی کارمرز کنگءَ کمو سرپد باں ءُ اے پیمیں چیزانی تہا من  وتی دلءَ گشاں کہ  بائداِنت من مہ اڑاں ان شاءَ  اللہ،
ادامن ماضیءِصیغہءَ کارمرز کگایاں ءُ شما مستقبلءِ،ءُ اے ماضی  متکلمءِ صیغہ اِنت،بزاں من وت نہ  لوٹ اِت۔ءُ منی ہیالءَ اے پیما اے جوان اِنت،ءُماضی(قریب)ءِ تہا منی ہیالءَ اے گال ہچ  وتی رنگءَ بدل نہ کنت،
پہ درورءَ:
من  نہ لوٹ اِت، ،،
تو نہ لوٹ اِت،،،
آئی  نہ لوٹ اِت،،،
شما نہ لوٹ اِت ،،،،
ما نہ لوٹ اِت۔
ءُ ماضی بعیداے پیم وتا یک رنگءَ داریت:
من نہ لوٹ اِتگ،
تو نہ لوٹ اِتگ،،ءُ ہمے پئیما آدگہ،،،
ءُ انگہ دور تریں ماضیءِ واستا ما گشیں ،،
من لوٹ اِتگ اَت،،   
    تو نہ لوٹ اِتگ اَت 

اگاں منی اے سر ءُ سوجانی توکا من جاھے ردی کُتگ پہ گُشگ ءَ دپا ھچ دوست مہ دار
تئ پسو ءِ راھچار
تئ ادّا
زاہدہ رئیس راجی
جاہے من رد بیتگاں ءُ جاہے شما منی ھبر نہ فہم اِتگ یاوَ من وتی ہبر آپیم کہ گشگ لوٹیت گشت نہ کتگ۔یک رندے پدا شمئے منتءَ گراں ءُ گشاں کہ اگاں ہمے پیم ایراد گری بہ بیت گڈا منی پیمیں باز سک اَنت،من پمشکءَ برے برے گوں وتی کم زانتیءَ ہمے پیم کنگءِ جہد کتگ داں کہ ہمے ماحول جوڑ بہ بیتءُ من ہمے  کہ  دستونکےنبشتہ کتگ گڈا چہ کلاں پیش باسک سائٹءِ تہا  دیم داتگ کہ اگاں شعرءِ تہا ردی ے مان اِنت گڈا زانتکار آئیءَ نشان جننتءُ منی رہشونی بیت،بلے باز کم اے پیم بیتگ۔
تئی برات:
حافظ عطا آسکانی