برات منظور بسمل ءِ دستونک ءِ زمین ءِ سرا منی نوکیں دستونک ندر پہ باسک ءَ وتی تچکیں چمشانک ءُ راھشونی ءَ الم ءَ گون کنئے ، منہ وار بئیاں
دستونک
زاہدہ رئیس راجی
زہیراں، نالگ ءُ پریات ھمراہ
پمشکا پیسرا یلدات ھمراہ
دل ءَ چوں رُژنے ءِ واھگ بہ گواھیت
تہاری ءَ کُتگ نوں شات ھمراہ
پہ شات ءِ واھگ ءَ سرسر جتگ من
ھمک گام ءَ رسئیت ناشات ھمراہ
من ءَ وت واھی ءِ ویل ءَ نہ گپتگ
وتا پشگیتگوں، دیم دات ھمراہ
کئےءَ گُشتگ من ءَ چولاناں بُرتگ
تئ نیکیں دُعاایں مات ھمراہ
دُعا ھیر ءِ پُتینکاں زُورگایاں
پکار انت بس ھمیں سوگات ھمراہ
ما درد ءِ پتّر ءَ پیچگ نہ زانیں
مدام انت آزگیں سلوات ھمراہ
ھمیں کینگ ھمیں کَست ءِ کِشارایں
کسرکند ءَ بہ گر کوشات ھمراہ
بزانئے واجہاں، گران ایں گلامی
پہ چُنڈے نانے ءَ شھمات ھمراہ
کسے پہ رد دئیگ دیما نہ کنزاِت
بیبُوتیناں اگاں تئ برات ھمراہ
چنان ایں کُْنٹگاں امروز ءِ راجی
نزانت ایں چے کپیت باندات ھمراہ
